اباي اتىنداعى مەملەكەتتىك سىيلىققا ۇمىتكەرلەردىڭ ءتىزىمى انىقتالدى
استانا. KAZINFORM - مەملەكەتتىك كەڭەسشى اباي اتىنداعى ادەبيەت پەن ونەر سالاسىنداعى مەملەكەتتىك سىيلىقتى بەرۋ جونىندەگى كوميسسيانىڭ قورىتىندى وتىرىسىن وتكىزدى.
ەرلان قاريننىڭ توراعالىعىمەن 2024-جىلعى قازاقستان رەسپۋبليكاسىنىڭ اباي اتىنداعى ادەبيەت پەن ونەر سالاسىنداعى مەملەكەتتىك سىيلىعىن بەرۋ جونىندەگى كوميسسيانىڭ قورىتىندى وتىرىسى ءوتتى.
زيالى قاۋىم وكىلدەرىنەن قۇرالعان كوميسسيا مۇشەلەرى ادەبيەت، كينو، تەاتر، مۋزىكا، ساۋلەت جانە بەينەلەۋ ونەرى سالالارى بويىنشا مەملەكەتتىك سىيلىقتى بەرۋ جونىندەگى كونكۋرستىڭ ەكىنشى كەزەڭىنە وتكەن 21 جۇمىستى قارادى.
مادەنيەت جانە اقپارات ءمينيسترى ايدا بالايەۆا ەكىنشى كەزەڭگە وتكەن شىعارمالاردىڭ قوعامدا تالقىلانۋ بارىسى تۋرالى بايانداما جاسادى.
كوميسسيا مۇشەلەرى جاسىرىن داۋىس بەرۋ ارقىلى 2024-جىلعى قازاقستان رەسپۋبليكاسىنىڭ اباي اتىنداعى ادەبيەت پەن ونەر سالاسىنداعى مەملەكەتتىك سىيلىعى لاۋرەاتتىعىنا ۇمىتكەرلەردى انىقتادى. ولار مەملەكەت باسشىسىنىڭ قاراۋىنا ۇسىنىلادى.
مەملەكەتتىك سىيلىق لاۋرەاتتارىن ماراپاتتاۋ رەسپۋبليكا كۇنى قارساڭىندا وتەدى.