اپاتقا ۇشىراعان رايسي تىكۇشاعى: قايعىلى وقيعانىڭ تىڭ ءمان-جايى ايتىلدى

استانا. KAZINFORM - يران پرەزيدەنتى اكىمشىلىگىنىڭ باسشىسى رولام حۋسەين ەسمايلي ەل پرەزيدەنتى رايسي مىنگەن تىكۇشاقپەن قاتارلاسا ۇشقان اۋە كەمەسىندە بولعان. ول قايعىلى وقيعاعا قاتىستى تىڭ ءمان-جايدى ايتىپ بەردى.

ونىڭ ايتۋىنشا، تىكۇشاقتار اۋەگە كوتەرىلگەن كۇنى - دۇيسەنبىدە كۇن رايى وتە قولايلى بولعان. دەگەنمەن، تىكۇشاق ۇشقاننان سوڭ شامامەن 1,5 ساعاتتا شىعىس ازەربايجان ولكەسىندەگى سۋنگۋن مىس كەنىشى شاحتاسىنا تاقاۋ تۇستا بۇلت بايقالعان.

«ۇشىپ شىققاننان كەيىن 1,5 ساعاتتان سوڭ سۋنگۋن مىس كەنى تۇسىندا بۇلت بايقالدى. تۇمان بولعان جوق. مۇمكىن شاتقالدىڭ تومەنگى جاعىندا تۇمان بولعان دا شىعار. الايدا ءبىزدىڭ ۇشۋ تراەكتوريامىزدا تۇمان بولعان ەمەس. بۇلت تىكۇشاقتان ءبىرشاما جوعارى بولدى. پرەزيدەنت مىنگەن تىكۇشاقتىڭ ۇشقىشى كوماندير رەتىندە بىزگە جوعارى كوتەرىلىپ، بۇلتتاردىڭ ۇستىمەن ۇشۋدى جالعاستىرۋعا نۇسقاۋ بەردى»، - دەدى ەسمايلي.

اكىمشىلىك باسشىسىنىڭ سوزىنە قاراعاندا، تىكۇشاق بۇلتتاردىڭ ۇستىمەن 30 سەكۋند ۇشقان كەزدە پرەزيدەنت مىنگەن اۋە كەمەسى كوزدەن تاسا بولعان. ال قاتارلاسىپ كەلە جاتقان تىكۇشاق ۇشقىشى پرەزيدەنتتىك تىكۇشاق قونۋعا ءماجبۇر بولدى دەپ بولجام جاساپ، سول اۋداندى بىرنەشە رەت شولىپ شىققان. 1,5 مينۋت بويى ەشقانداي بايلانىس بولماعان. سول كەزدە عانا پرەزيدەنتتىك Bell 212 تىكۇشاعىنىڭ اپاتقا ۇشىراۋ مۇمكىندىگىنە قاتىستى بولجام جاسالىپ، ەسمايلي مىنگەن اۋە كەمەسى سۋنگۋن كەنىشى تۇسىنا قونعان.

«ماعان تىكۇشاقتىڭ اپاتقا ۇشىراۋى مۇمكىن ەكەندىگىن ايتتى. ويتكەنى، 1,5 مينۋت بويى بايلانىسقا شىعا المادىق. ۇشاعىمىز بىرنەشە رەت اينالا ۇشىپ، راديوبايلانىس ورناتا المادى. 30 سەكۋندتان كەيىن سۋنگۋن شاحتاسىنا قوندىق»، - دەپ مالىمدەدى يران پرەزيدەنتى اكىمشىلىگىنىڭ باسشىسى.

پرەزيدەنت كەڭسەسىنىڭ باسشىسى تىكۇشاق قونعاننان كەيىن دە اپاتقا ۇشىراعان اۋە كەمەسى بورتىندا بولعان جولاۋشىلارمەن بايلانىسقا شىعۋعا تىرىسقانىمەن ەشقانداي جاۋاپ بولماعان. سودان كەيىن وعان كاپيتان مۋستافابيدىڭ ۇيالى تەلەفونىنا حابارلاسۋ مۇمكىن بولعانىن، قوڭىراۋعا ءال-حاشەمي (يران جوعارعى كوشباسشىسىنىڭ شىعىس ازەربايجانداعى وكىلى سەيەد موحاممەد ءالي ءال-حاشەمي) جاۋاپ بەرگەنىن جەتكىزگەن. ءال-حاشەمي شاتقالعا قۇلاپ كەتكەنىن ايتقان. ءبىراق، نە بولعانى جايلى ايتا الماعان.

«ءوزىمدى جايسىز سەزىنىپ تۇرمىن. نە بولعانىن بىلمەيمىن. اعاشتاردىڭ استىندامىن، ەشكىمدى كورىپ تۇرعان جوقپىن، جالعىزبىن»، - دەپ جاۋاپ بەرگەن قوڭىراۋعا ءال-حاشەمي.

ونىڭ سوزىنەن پرەزيدەنتتىك Bell 212 تىكۇشاعىنىڭ قۇلاعانى بەلگىلى بولعان. يمام مەرت بولعانعا دەيىن بىرنەشە ساعات بايلانىسقا شىعىپ وتىرعان. ءسال كەيىنىرەك، تىكۇشاق جولاۋشىلارى مەن ەكيپاج مۇشەلەرى بىردەن، ال ءال-حاشەمي بىرنەشە ساعاتتان كەيىن قازا تاپقانى انىقتالدى. جارىلىس داۋىسى ەستىلمەگەن، قىزىل جالىن، ءتۇتىن بايقالماعان.

ەسمايليدىڭ ايتۋىنشا، ساعات 15:30 عا دەيىن اۋا رايى ۇشاقتىڭ ۇشۋىنا قولايلى بولعان.

«بۇلتتى شاتقالداردىڭ بىرىنەن ءارى وتە شەكتەۋلى ايماقتان عانا بايقادىق. سوندىقتان دا ول ۇشۋعا كەدەرگى فاكتور بولعانىن نە بولماعاندىعىن ايتا المايمىن»، - دەدى ەسمايلي.