اپات بولعان مايقايىڭعا مىندەتتى تۇردە بارامىن - جاڭا مينيستر

استانا. KAZINFORM - توتەنشە جاعدايلار ءمينيسترى شىڭعىس ءارىنوۆ «مايقايىڭ التىن» كەنىشى اۋماعىنداعى اۆتوبۋس اپاتىنىڭ سەبەپتەرىن اتاپ، وقيعا ورنىنا مىندەتتى تۇردە باراتىنىن ايتتى.

«24- قاڭتاردا قايعىلى وقيعانىڭ سەبەبىن انىقتاۋ ءۇشىن قۇرىلعان كوميسسيا ارنايى تەكسەرۋدى اياقتادى. كوميسسيا ساراپتاما ۇيىمدارىنىڭ قورىتىندىسى مەن كۋاگەرلەردىڭ بەرگەن جاۋابىنىڭ نەگىزىندە مىنانداي سەبەپتەردى انىقتادى. ولار - جاۋاپتى تۇلعالاردىڭ تاۋ-كەن جۇمىستارى قاۋىپسىز جۇرگىزىلۋىن جەتكىلىكتى دەڭگەيدە باقىلاماۋى، بلوكتاردى وڭدەۋ كەزىندە وپىرىلۋعا بەيىم تۇستار ءتيىستى دەڭگەيدە باقىلانباعان، كەن شوعىرىن 90+ دەڭگەيىندەگى كوكجيەكتەن جوعارى جانە تومەن وڭدەگەن كەزدە قازبا جۇرگىزىلەتىن اۋماق دۇرىس زەرتتەلمەگەن. سونداي-اق، كوميسسيا وسىنداي اپاتتاردى بولدىرماۋ جانە اپات سەبەبىن انىقتاۋ شارالارىن ازىرلەدى»، - دەدى ول ورتالىق كوممۋنيكاتسيالار قىزمەتىندە وتكەن بريفينگىدە.

سونداي-اق، ول كۇن وتكەن سايىن ىزدەستىرۋ جۇمىستارى قيىنداعانىنا قاراماستان، جۇمىس جالعاسىپ جاتقانىن ەسكە سالدى.

«اۋا رايىنىڭ ناشارلاعانىنا، سەكۋندىنا 28 مەتر جىلدامدىقپەن جەل تۇرعانىنا قاراماستان ىزدەۋ جۇمىستارى ءالى ءجۇرىپ جاتىر. قازىرگى تاڭدا پايدا بولعان ويىقتى تەرەڭدەتىپ، قابىرعاسىن كەڭەيتۋ جۇمىستارى تاۋلىك بويى ءجۇرىپ جاتىر - 9 تەحنيكا، 10 ادام جۇمىلدىرىلعان. كەشە كەشكى 20:00 دەن بۇگىن تاڭعا دەيىن عانا 170 رەيس جاسالىپ، 5100 توننا توپىراق شىعارىلدى. جۇمىس جالعاسىپ جاتىر»، - دەدى مينيستر.

ب ا ق وكىلدەرى ونىڭ الداعى جوسپارىن، «مايقايىڭ التىن» كاسىپورنىنىڭ اۋماعىنداعى اپات ورنىنا قاشان باراتىنىن سۇرادى.

«مىندەتتى تۇردە بارامىن. جوسپارىمدا بار»، - دەدى شىڭعىس ءارىنوۆ.