تاراپتار ابۋ-دابيدە وتكەن رەسەي، ا ق ش جانە ۋكراينا اراسىنداعى ءۇشجاقتى كەلىسسوزدەردىڭ قورىتىندىلارىن، گۋمانيتارلىق ماسەلەلەردى، اۋماقتىق رەتتەۋدى جانە الداعى ديالوگتىڭ بولاشاعىن تالقىلادى، دەپ حابارلايدى اگەنتتىكتىڭ مەنشىكتى ءتىلشىسى.
كەزدەسۋگە رەسەي تاراپىنان پرەزيدەنتتىڭ كومەكشىلەرى يۋري ۋشاكوۆ پەن ۆلاديمير مەدينسكي، سونداي-اق رەسەيدىڭ تىكەلەي ينۆەستيتسيالار قورىنىڭ باس ديرەكتورى كيريلل دميتريەۆ قاتىستى.
كەلىسسوزدەردىڭ باسىندا پۋتين ا ق ش پرەزيدەنتى دونالد ترامپقا ۋكراينالىق تاراپپەن بايلانىس ورناتۋعا ىقپال ەتكەنى ءۇشىن العىس ايتتى. ونىڭ اتاپ وتۋىنشە، گۋمانيتارلىق باعىتتا بەلگىلى ءبىر وڭ ناتيجەلەر بار، اتاپ ايتقاندا، تاراپتار ۇستاپ وتىرعان ادامداردى كەزەكتى رەت الماسۋ جۇمىستارى دايىندالىپ جاتىر.
ءوز كەزەگىندە ۋيتكوفف 10-11 قاراشادا ابۋ-دابيدە وتكەن كەلىسسوزدەرگە وڭ باعا بەردى. ونىڭ ايتۋىنشا، رەسەي مەن ۋكراينا وكىلدەرى ءبىر ۇستەل باسىندا وتىرىپ، ناقتى ماسەلەلەردى تالقىلاعان.
- ءبىزدىڭ باعالاۋىمىزشا، كەلىسسوزدەر وتە وڭ اتموسفەرادا ءوتتى. رەسەي مەن ۋكراينا وكىلدەرىنىڭ ەكى تاراپتان دا بەلسەندى جۇمىس ىستەگەنىن بايقادىق. دەلەگاتسيالار ءبىر ۇستەل باسىندا وتىرىپ، ناقتى ماسەلەلەردى تالقىلاپ، ولاردى شەشۋ جولدارىن قاراستىردى،- دەدى ا ق ش پرەزيدەنتىنىڭ ارنايى وكىلى.
ول سونداي-اق ەكى ەل اراسىنداعى اۋقىمدى تۇتقىن الماسۋ شاراسىنا دايىندىق ءجۇرىپ جاتقانىن حابارلاپ، ونى وسى ۋاقىتقا دەيىنگى ەڭ ءىرى الماسۋلاردىڭ ءبىرى دەپ اتادى.
- مەنىڭ ويىمشا، بۇل - قاقتىعىستى رەتتەۋ باعىتىندا ىلگەرىلەۋشىلىككە قول جەتكىزىپ جاتقانىمىزدىڭ كورسەتكىشى،- دەپ اتاپ ءوتتى ۋيتكوفف.
ءوز كەزەگىندە پۋتين رەسەي مەن ۋكراينا ومبۋدسمەندەرىنىڭ قاتىسۋىمەن گۋمانيتارلىق ىنتىماقتاستىقتى جالعاستىرۋدى ۇسىندى.
كەزدەسۋ بارىسىندا اۋماقتىق ماسەلەلەر مەن بولاشاق قاۋىپسىزدىك ارحيتەكتۋراسى دا تالقىلاندى. كۋشنەر قاقتىعىستى اياقتاۋ ءۇشىن تاراپتاردىڭ ءالى دە بىرقاتار قادامداردى كەلىسۋى قاجەت ەكەنىن مويىندادى.
كۋشنەردىڭ ايتۋىنشا، ا ق ش تاراپى ەۋروپالىق سەرىكتەستەرىمەن رەسەيدىڭ، ۋكراينانىڭ جانە ەۋروپا مەملەكەتتەرىنىڭ مۇددەلەرىن ەسكەرەتىن ىقتيمال قاۋىپسىزدىك ارحيتەكتۋراسىن تالقىلاپ جاتىر.
كەزدەسۋگە قاتىسۋشىلار كەلىسسوزدەر ۇدەرىسىندەگى ەۋروپانىڭ ءرولىن دە سوز ەتتى. ۋيتكوفف ەۋروپالىق وكىلدەردىڭ ابۋ-دابيدە بولعانىن، الايدا كەلىسسوزدەر ۇستەلىنە تىكەلەي قاتىسپاعانىن ناقتىلادى. سونىمەن بىرگە ا ق ش تاراپى ولاردى تالقىلاۋلاردىڭ بارىسى تۋرالى حاباردار ەتىپ وتىرعان.
پۋتين ماسكەۋدىڭ ەۋروپالىق مەملەكەتتەرمەن ديالوگتان باس تارتپاعانىن ايتىپ، ۆاشينگتوندى ەۋروپالىق وداقتاستارىمەن ورتاق ۇستانىمدى كەلىسۋگە ىقپال ەتۋگە شاقىردى.
ماسكەۋدەگى كەلىسسوزدەردەن كەيىن ۋيتكوفف پەن كۋشنەر ۋكراينا پرەزيدەنتى ۆلاديمير زەلەنسكيمەن كەزدەسۋدى جوسپارلايتىندارىن ايتقان. ا ق ش وكىلدەرى وعان كرەملدەگى تالقىلاۋلاردىڭ ناتيجەلەرى تۋرالى اقپارات بەرمەك.
ۋيتكوفف الداعى ۋاقىتتا ءۇشجاقتى فورماتتاعى كەلەسى كەزدەسۋدى جوسپارلاۋ تۋرالى رەسمي تۇردە جاريالاۋعا مۇمكىندىك بولادى دەگەن ءۇمىت ءبىلدىردى.
ەسكە سالايىق، بۇعان دەيىن امەريكالىق كەلىسسوز جۇرگىزۋشىلەر ۆلاديمير پۋتينمەن كەزدەسۋ ءۇشىن سانكت-پەتەربۋرگكە بارعانى تۋرالى حابارلاعان ەدىك.