اۋا رايىنىڭ بۇزىلۋىنا بايلانىستى ەكى وبلىستاعى رەسپۋبليكالىق جولدار جابىلدى

استانا. KAZINFORM - قازاۆتوجول ەكى وبلىستاعى رەسپۋبليكالىق جولداردا كولىك قوزعالىسى شەكتەلگەنىن حابارلادى.

2-ناۋرىز ساعات 08:00 جاعداي بويىنشا 2 وبلىستاعى 2 رەسپۋبليكالىق ماڭىزى بار اۆتوموبيل جولدارىندا كولىك قوزعالىسىنا شەكتەۋ قويىلدى.

اقتوبە وبلىسى:

- «ر ف شەكاراسى - مارتوك - اقتوبە - قارابۇتاق - قىزىلوردا - شىمكەنت - تاراز - قورداي - الماتى - قورعاس - ق ح ر شەكاراسى» اۆتوجولىنىڭ 776-1240 شاقىرىم ارالىعى (اقتوبە ق. - قىزىلوردا وبلىسىنىڭ شەكاراسى).

سونىمەن قاتار اقتوبە وبلىسىندا 2-ناۋرىز ساعات 09:30-دا اۋا رايىنىڭ بۇزىلۋىنا بايلانىستى كەلەسى رەسپۋبليكالىق اۆتوجولداردا جۇك كولىكتەرى مەن قوعامدىق كولىك تۇرلەرى قوزعالىسىنا شەكتەۋ قويىلادى:

- «اقتوبە- قاندىاعاش- دوسسور- اتىراۋ- رف شەكاراسى» اۆتوجولىنىڭ 14-104-شاقىرىم ارالىعىنداعى ۋچاسكەسىندە (اقتوبە قالاسى - قاندىاعاش قالاسى)؛

جولدى 2-ناۋرىز ساعات 13:00-دە اشۋ جوسپارلانعان.

قىزىلوردا وبلىسى:

- «ر ف شەكاراسى - مارتوك - اقتوبە - قارابۇتاق - قىزىلوردا - شىمكەنت - تاراز - قورداي - الماتى - قورعاس - ق ح ر شەكاراسى» اۆتوجولىنىڭ 1240-1362 شاقىرىم ارالىعى (اقتوبە وبلىسىنىڭ شەكاراسى - ارال ق. ).

قازىر رەسپۋبليكالىق جولداردى كۇتىپ- ۇستاۋعا 206 ارنايى تەحنيكا مەن 376 مامان جۇمىلدىرىلدى.

1403 بايلانىس ورتالىعىنا حابارلاسىپ، تاۋلىك بويى قوسىمشا اقپارات الۋعا بولادى.

2-ناۋرىزدا اۋا رايىنا بايلانىستى ەلىمىزدىڭ 16 وبلىسىندا داۋىلدى ەسكەرتۋ جاريالانعانىن جازعان بولاتىنبىز.