كارتينانى ساتۋعا ونىڭ قازىرگى يەلەرى مەن نەمىس باسپاگەرى سامۋەل فيشەردىڭ مۇراگەرلەرى اراسىنداعى داۋ كەدەرگى بولعان. فيشەر وتباسى تۋىندىنى ەكىنشى دۇنيەجۇزىلىك سوعىسقا دەيىن يەلەنگەن. الايدا اۋكسيون باستالاردان ءبىر كۇن بۇرىن تاراپتار كەلىسىمگە كەلىپ، تۋىندى ساتىلىمعا قويىلدى.
ۆان گوگ كارتينانى 1890 -جىلعى مامىردا فرانسيانىڭ وۆەر-سيۋر-ۋاز قالاسىندا، قايتىس بولارىنان ەكى اي بۇرىن سالعان. وندا جول بويىندا گۇلدەگەن تالشىن اعاشتارى مەن جولمەن كەتىپ بارا جاتقان ەر ادام جانە ءۇش ايەل بەينەلەنگەن.
S. Fischer باسپاسىنىڭ نەگىزىن قالاعان ەۆرەي كوللەكسيونەرى سامۋەل فيشەر كارتينانى 1909 -جىلى پاريجدەن ساتىپ العان. ول قايتىس بولعاننان كەيىن تۋىندى جۇبايىنا مۇراعا قالعان. تۋىندى 1936 -جىلى باسقا وتباسىنىڭ قولىنا وتكەن. 1975 -جىلى كارتينانى ارگەنتينانىڭ بلاكە- اررەتا وتباسى ساتىپ الىپ، شامامەن جارتى عاسىر ساقتاعان.
سامۋەل فيشەردىڭ مۇراگەرلەرى كارتينانىڭ 1936 -جىلى ەرىكتى تۇردە ساتىلماعانىن العا تارتتى. ولاردىڭ پىكىرىنشە، گەرمانيادا ەۆرەيلەر قۋدالانعان كەزەڭدە وتباسى تۋىندىدان امالسىز ايىرىلعان. مۇراگەرلەردىڭ ادۆوكاتى گۋننار شنابەل سول كەزدەگى ساۋدانىڭ نارىقتىق باعامەن جاسالعانىن جانە كەمسىتۋشىلىكتىڭ سالدارى بولماعانىن دالەلدەۋدى تالاپ ەتتى.
ال sotheby’s اۋكسيون ءۇيى كارتينانىڭ يەلىك تاريحىن جان-جاقتى زەرتتەگەنىن مالىمدەدى. زەرتتەۋ قورىتىندىسى بويىنشا تۋىندى 1932-1933 -جىلدارى امستەردامدا ساقتالىپ، 1936 -جىلعى ماۋسىمدا 68 مىڭ شۆەيتسار فرانكىنە ساتىلعان. اۋكسيون ءۇيى كارتينانىڭ ءماجبۇرلى تۇردە نەمەسە نارىقتىق باعادان تومەن ساتىلعانىن راستايتىن دالەل تاپپاعانىن حابارلادى.
ساۋدا الدىندا ەكى وتباسىنىڭ مۇراگەرلەرى كەلىسىمگە كەلگەن. ونىڭ شارتتارى جاريالانعان جوق. Sotheby’s بۇل كەلىسىم فيشەر وتباسىنىڭ حولوكوست جىلدارىنداعى كورگەن قاسىرەتىن مويىنداۋعا جانە كارتينانى ساتۋعا مۇمكىندىك بەرگەنىن اتاپ ءوتتى.
بۇعان دەيىن ۆان گوگتىڭ اۋكسيوندا ەڭ قىمبات ساتىلعان تۋىندىسى «كيپاريستەر اراسىنداعى جەمىس باعى» كارتيناسى بولاتىن. ول 2022 -جىلى 117,2 ميلليون دوللارعا باعالانعان.
ەسكە سالايىق، بيىل قىركۇيەك ايىندا ۆان گوگتىڭ بارلىق كارتيناسى 40 جىلدا العاش رەت ءبىر كورمەگە قويىلادى.