ا ە س قۇرىلىسىنا قاتىستى رەفەرەندۋمعا 30 ەلدەن بايقاۋشى كەلەدى

استانا. KAZINFORM - ا ە س قۇرىلىسىنا قاتىستى رەفەرەندۋمدى 30 ەلدىڭ بايقاۋشىسى قاداعالايدى. بۇل تۋرالى ورتالىق رەفەرەندۋم كوميسسياسىنىڭ حاتشىسى مۇحتار ەرمان ايتتى.

«بيىل 3-قىركۇيەكتە قابىلدانعان قاۋلى نەگىزىندە اككرەديتاتسيا 2024 -جىلعى 30-قىركۇيەكتە، استانا ۋاقىتى بويىنشا ساعات 18.00-دە اياقتالدى. وسىلايشا، بارلىعى 177 بايقاۋشى رەسمي تىركەۋدەن ءوتتى. 30 شەت مەملەكەتتەن جانە 4 حالىقارالىق ۇيىمنىڭ وكىلدەرى بار. سىرتقى ىستەر مينيسترلىگى بايقاۋعا 5 ءىرى حالىقارالىق ۇيىمعا، ونىڭ ىشىندە ەۋروپاداعى قاۋىپسىزدىك جانە ىنتىماقتاستىق ۇيىمى دەموكراتيالىق ينستيتۋتتار جانە ادام قۇقىعى جونىندەگى بيۋروسىنا، تاۋەلسىز مەملەكەتتەر دوستاستىعىنا، شاڭحاي ىنتىماقتاستىق ۇيىمىنا، تۇركى مەملەكەتتەرىنىڭ ۇيىمىنا جانە ازياداعى ءوزارا ءىس-قيمىل جانە سەنىم شارالارى جونىندەگى كەڭەسكە شاقىرۋ جولدادى»، - دەدى ول كوميسسيا وتىرىسىندا.

ونىڭ اتاپ وتۋىنشە، ە ق ى ۇ تاراپىنان بايقاۋشى بولمايدى. ويتكەنى، ۇيىمنىڭ الداعى ايلارعا جوسپارلانعان سايلاۋلارعا بايلانىستى ءىس-شارالارى كوپ. سوندىقتان ەلىمىزگە ميسسيا جىبەرە المايدى.

«قازىرگى تاڭدا بايقاۋعا قاتىساتىن حالىقارالىق ۇيىمداردىڭ قاتارىندا ت م د، ش ى ۇ، تۇركى مەملەكەتتەرىنىڭ ۇيىمى، ازياداعى ءوزارا ءىس-قيمىل جانە سەنىم شارالارى جونىندەگى كەڭەس بار. جالپى رەسپۋبليكالىق رەفەرەندۋمعا 30 شەت مەملەكەتتىڭ وكىلدەرى قاتىسادى. ولاردىڭ ىشىندە ەرەكشە اتاپ وتەتىن، 4 ورتالىق سايلاۋ ورگانىنىڭ ءتوراعالارى كەلەدى. ولار: ازەربايجان ورتالىق سايلاۋ كوميسسياسىنىڭ ءتوراعاسى مازاير پاناحوۆ، بەلارۋس ورتالىق سايلاۋ كوميسسياسىنىڭ ءتوراعاسى يگور كارپەنكو، تاجىكستان ورتالىق سايلاۋ جانە رەفەرەندۋم كوميسسياسىنىڭ ءتوراعاسى باحتير حۋدورزودا، وزبەكستان ورتالىق سايلاۋ كوميسسياسىنىڭ ءتوراعاسى زيينيددين نيزامحودجايەۆ»، - دەدى مۇحتار ەرمان.

اۆتور

مارلان جيەمباي