ا ە س قۇرىلىسى بويىنشا كونسورسيۋمعا ارى كەتكەندە 5 ەل كىرۋى مۇمكىن

استانا. KAZINFORM – ا ە س قۇرىلىسى بويىنشا كونسورسيۋمعا ارى كەتكەندە 5 ەل كىرۋى مۇمكىن. بۇل تۋرالى پرەمەر-ءمينيستردىڭ ورىنباسارى رومان سكليار ايتتى.

«مەنىڭشە، بۇل كونسورسيۋمدا ارى كەتكەندە 5 ەل بولادى. اتوم ەلەكتر ستانساسى - بۇل جاي عانا ءبىر نىسان ەمەس. ول قۇرىلىمدىق بولىمىندە ءتۇرلى ەلدەر كوشباسشى سانالاتىن ءبىرقاتار نىساننان تۇرادى»، - دەدى ول ۇكىمەت وتىرىسىنان كەيىنگى بريفينگتە.

ونىڭ اتاپ وتۋىنشە، ستانسانى جوبالاۋ بارىسىندا ءتۇرلى ەلدەردىڭ ەڭ وزىق تەحنولوگيالارىن الۋ ءۇشىن جۇمىس جۇرگىزىلەدى. سوعان وراي قۇرىلىس بارىسىنا ءتۇرلى كومپانيالار، سۋب مەردىگەرلەر جۇمىلدىرىلادى. الەمدە مۇنداي تاجىريبە بار. ويتكەنى، يادرولىق ارالدى ءبىر ەل، تۋربينانى ەكىنشى ەل سالۋى مۇمكىن.

«سول سەبەپتى ءبىز قانداي دا ءبىر جەتكىزۋشىگە، مەردىگەرگە قادالىپ قالماي كونسورتسيۋم قۇرۋىمىز قاجەت»، - دەدى رومان سكليار.

ايتا كەتەيىك، بۇگىن ورتالىق رەفەرەندۋم كوميسسياسى 6-قازاندا وتكەن رەسپۋبليكالىق رەفەرەندۋمنىڭ تۇپكىلىكتى قورىتىندىسىن جاريالادى.

وعان سايكەس، داۋىس بەرۋگە قاتىسقان ازاماتتاردىڭ 71,12 پايىزى نەمەسە 5561937 ادام قازاقستاندا اتوم ەلەكتر ستانساسىن سالۋ ماسەلەسىن قولدادى. ال قارسى داۋىس بەرگەندەر سانى - 2045271 ادام.

اۆتور

مارلان جيەمباي