ا ق ش يرانعا قۇرلىقتاعى شەكارالار مەن كاسپي تەڭىزى ارقىلى قارۋ-جاراق جانە سانكتسيا سالىنعان باسقا دا تاۋارلاردىڭ جەتكىزىلۋىنە جول بەرمەۋ ءۇشىن ارنايى جەدەل توپ قۇرۋدى جوسپارلاپ وتىر، دەپ حابارلايدى DW.
ا ق ش قارۋلى كۇشتەرى ورتالىق قولباسشىلىعىنىڭ (CENTCOM) باسشىسى برەد كۋپەردىڭ مالىمەتىنشە، جاڭا بولىمشە شامامەن 20 اسكەري قىزمەتكەر مەن ازاماتتىق ماماننان جاساقتالادى. ول Iron Gate («تەمىر قاقپا») دەپ اتالىپ، فلوريدا شتاتىنداعى تامپا قالاسىندا ورنالاسادى.
جەدەل توپ ا ق ش-تىڭ باسقا دا ۆەدومستۆولارىمەن بىرلەسىپ، زاماناۋي قارۋ- جاراقتىڭ، قوس ماقساتتا پايدالانىلاتىن تەحنولوگيالار مەن سانكتسيا سالىنعان ماتەريالداردىڭ جەتكىزىلۋىنە جول بەرمەۋ، سونداي-اق يران شەكاراسى مەن كاسپي تەڭىزى ارقىلى وتەتىن زاڭسىز قارجى اعىندارىن توقتاتۋ جۇمىستارىن ۇيلەستىرەدى.
كۋپەردىڭ ايتۋىنشا، بۇل باستاما يران پورتتارىنا قاتىستى قولدانىستاعى تەڭىز بلوكاداسىن كۇشەيتۋگە باعىتتالعان.
- جاڭا جەدەل توپ يراننىڭ تەرروريزمدى قارجىلاندىرۋ، قارۋ-جاراق زاۋىتتارىن قالپىنا كەلتىرۋ جانە ارمياسىن قايتا قارۋلاندىرۋ مۇمكىندىكتەرىن ودان ءارى شەكتەيدى،- دەدى CENTCOM باسشىسى.
ال يران يسلام ريەۆوليۋتسياسى ساقشىلار كورپۋسى (يرسك) ۆاشينگتوننىڭ بۇل باستاماسىن سىنعا الىپ، ونىڭ ساتسىزدىككە ۇشىرايتىنىن مالىمدەدى.
- ا ق ش ءتۇرلى اتاۋلار مەن جوسپارلاردى پايدالانىپ جۇزەگە اسىرماق بولعان ەكونوميكالىق بلوكادانى ەشقاشان ورناتا المايدى،-دەدى يرسك وكىلى حۋسەين موحەبي. ونىڭ ءسوزىن Fars اگەنتتىگى كەلتىردى.
CENTCOM مالىمەتىنشە، يران پورتتارىنا ەنگىزىلگەن قازىرگى تەڭىز بلوكاداسى تەگەرانعا 25 ميلليارد دوللاردان استام مۇناي ەكسپورتتاۋعا كەدەرگى كەلتىرگەن.
ا ق ش پەن يران اراسىنداعى اسكەري قاقتىعىس اياسىندا الەمدىك مۇناي مەن گاز ساۋداسىنداعى ماڭىزدى باعىتتاردىڭ ءبىرى - ورمۋز بۇعازى ارقىلى كەمە قاتىناسىنا دا شەكتەۋلەر قويىلدى. ەنەرگيا رەسۋرستارىن جەتكىزۋدەگى ىركىلىستەر حالىقارالىق نارىقتاردا باعانىڭ وسۋىنە اكەلدى.
بۇعان دەيىن ديپلوماتيالىق كەلىسسوزدەر ءجۇرىپ جاتقان تۇستا ا ق ش-تىڭ يرانعا تاعى دا سوققى جاساعانى حابارلانعان بولاتىن.