ا ق ش يەمەندەگى حۋسيتتەر بەكىنىسىنە سوققى بەردى

استانا. KAZINFORM - ا ق ش ناۋقانىنا جاۋاپ رەتىندە يەمەندىك حۋسيتتەر جەتەكشىسى شابۋىلدى كۇشەيتۋگە ۋادە بەردى، دەپ حابارلايدى Kazinform ءتىلشىسى.

بەيسەنبىگە قاراعان ءتۇنى ا ق ش يەمەنگە اۋە شابۋىلدارىن جالعاستىردى، ونىڭ ىشىندە ەل استاناسى سانا، قىزىل تەڭىز جاعالاۋىنداعى حودەيدا پورتى جانە يەمەننىڭ حۋسيت جەتەكشىلەرىنە ۇزاق ۋاقىت بويى پانا بولعان ساادا پروۆينتسياسى بار.

يەمەننىڭ حۋسيلەرمەن بايلانىسى بار Al Masirah تەلەارناسى ءارتۇرلى جەرلەرگە، سونىڭ ىشىندە ساادانىڭ ءال- سافرا ايماعىنا 10 نان استام سوققى بەرىلگەنىن حابارلادى.

بۇل ايماقتا قارۋ-جاراق قويمالارى مەن وقۋ-جاتتىعۋ پوليگوندارى بار جانە توپتىڭ ەڭ ماڭىزدى جانە جاقسى نىعايتىلعان اسكەري بەكىنىستەرىنىڭ ءبىرى سانالادى، دەپ حابارلادى Reuters يەمەندىك دەرەككوزدەرگە سىلتەمە جاساپ.

سونداي-اق ەل استاناسىنداعى اۋەجاي ماڭىندا ورنالاسقان سانانىڭ ءال-دجارراف اۋدانىنا دا شابۋىلدار جاسالدى. سانانىڭ ءال-ءتاۋرا اۋدانىنا جاسالعان سوققىدان توعىز ادام، ايەلدەر مەن بالالار جارالاندى. بۇل تۋرالى X الەۋمەتتىك جەلىسىندە حۋسيتتەردىڭ دەنساۋلىق ساقتاۋ مينيسترلىگىنىڭ وكىلى انيس ءال-اسباحي حابارلادى.

Al Masirah تەلەارناسىنىڭ حابارلاۋىنشا، سوققىنىڭ يەمەننىڭ وڭتۇستىگىندەگى ءال-بايدا پروۆينتسياسىنداعى ءال- سۋۆەيديا پروۆينسياسى دا نىساناعا الىنعان. پروۆينتسيادا حۋسيتتەرگە تيەسىلى اسكەري نىساندار مەن قارۋ قويمالارى بار ەكەنى بەلگىلى.

ا ق ش ورتالىق قولباسشىلىعى حۋسيتتەرگە قارسى وپەراتسيانى تاۋلىك بويى جالعاستىرىپ جاتقانىن مالىمدەدى.

حۋسيت جەتەكشىلەرى ا ق ش-تىڭ اسكەري كامپانياسىنا جاۋاپ رەتىندە شابۋىلدارىن كۇشەيتەتىنىن مالىمدەدى.

- قازىر يەمەن ا ق ش- پەن سوعىس جاعدايىندا ەكەنىن كورىپ وتىرمىز، بۇل ءوزىمىزدى بارلىق مۇمكىن تاسىلدەرمەن قورعاۋعا قۇقىعىمىز بار دەگەندى بىلدىرەدى. سوندىقتان شيەلەنىستىڭ كۇشەيۋى ىقتيمال، - دەدى حۋسيتتەردىڭ سىرتقى ىستەر ءمينيسترى دجامال امەر Reuters اگەنتتىگىنە سانادان بەرگەن سۇحباتىندا.

حۋسيتتەر ۇكىمەتىنىڭ يەمەن قارۋلى كۇشتەرى بەيسەنبى كۇنى يزرايلدىڭ تەڭىز ساۋداسىن بۇعاتتاۋدى جالعاستىراتىنىن جانە گازانى قولدايتىنىن مالىمدەدى. ولار بۇل ارەكەتتەرىن اگرەسسيا توقتاپ، انكلاۆ قورشاۋدان شىققانعا دەيىن جالعاستىراتىنىن اتاپ ءوتتى.

سارسەنبى كۇنى حۋسيتتەر ا ق ش-تىڭ اۋە كەمەسىنە تاعى ءبىر شابۋىل جاسادى. ال بەيسەنبى كۇنى تاڭەرتەڭ ولار تەل-اۆيۆ اۋەجايىندا پالەستينا-2 بالليستيكالىق زىمىرانىن ۇشىردى. يزرايل قورعانىس كۇشتەرى يەمەننەن اتىلعان زىمىراندى ەلدىڭ اۋە كەڭىستىگىنە كىرمەس بۇرىن اۋە كۇشتەرى اتىپ تۇسىرگەنىن حابارلادى.

15- ناۋرىز، سەنبى كۇنى حۋسيتتەردىڭ قىزىل تەڭىزدەگى كەمەلەرگە جاساعان شابۋىلدارىنا جاۋاپ رەتىندە باستالعان سوققىلار ا ق ش پرەزيدەنتى دونالد ترامپ قاڭتاردا بيلىككە كەلگەننەن بەرگى تاياۋ شىعىستاعى ەڭ ءىرى اسكەري وپەراتسيا بولدى.

ترامپ سونداي-اق يراندى حۋسيتتەردىڭ الداعى شابۋىلى ءۇشىن جاۋاپكەرشىلىككە تارتامىن دەپ قورقىتىپ، ونىڭ سالدارى اۋىر بولاتىنىن ەسكەرتتى.

يزرايلدىڭ حاماس- پەن سوعىسى 2023 -جىلدىڭ اياعىندا باستالعاننان بەرى يران قولدايتىن حۋسيتتەر گازا سەكتورىنداعى پالەستينالىقتارمەن ىنتىماقتاستىقتا ارەكەت ەتىپ جاتىر دەپ، تەڭىز كەمەلەرىنە 100-دەن استام شابۋىل جاسادى. شابۋىلدار جاھاندىق ساۋدانى بۇزىپ، جۇك تاسىمالداۋشى كومپانيالاردى افريكا قۇرلىعىندا ۇزاعىراق جول جۇرۋگە ءماجبۇر ەتتى.

ايتا كەتەيىك، بيىل ا ق ش- تىڭ جاڭا اكىمشىلىگى يەمەندىك حۋسيتتەردى «تەررورلىق ۇيىم» دەپ تاعى دا مويىندادى.

اۆتور

ەركەجان سماعۇلوۆا