ا ق ش-تىڭ يزرايلمەن جانجالعا ارالاسۋى يرانعا سوققىنى كۇشەيتەدى - ساياساتتانۋشى

استانا. KAZINFORM - ساياسات تانۋشى سۇلتان اكىمبەكوۆ يران مەن يزرايل اراسىنداعى قاقتىعىسقا قاتىستى پىكىر ءبىلدىردى.

- يراننىڭ اتوم بومباسىن وندىرۋگە قانشالىقتى جاقىن قالعانىن ايتۋ قيىن. ءارتۇرلى كوزقاراس بار. كەيبىرەۋلەر قازىردىڭ وزىندە يراننىڭ ۋراندى 60 پايىزعا دەيىن بايىتا العانىن العا تارتادى. 5-ماۋسىمدا اياتوللا حامەنەي يران ۋراندى 60 پايىزعا دەيىن بايىتۋ ويىنان باس تارتپايتىندىعىن مالىمدەگەنى بار. بالكىم، ول ورىندالعان دا شىعار. ءىس جۇزىندە ۋراندى 60 پايىزدان 90 پايىزعا دەيىن بايىتۋ شارتتى تۇردە 5 پايىزعا دەيىن بايىتۋدان الدەقايدا جەڭىل. 12- ماۋسىمدا ماگاتە ماماندارى جەكەلەي الىنعان ۇلگىلەردەن بايىتۋ دەڭگەيىنىڭ 80 پايىزعا دەيىن جەتكەنى انىقتالعانىن مالىمدەگەن ەدى. بۇل - قارۋ جاساۋ دەڭگەيىنە وتە جاقىن دەگەن ءسوز. سوعان وراي يزرايل يران اتوم بومباسىن جاساۋعا جاقىن قالدى دەپ ساناعانى انىق، - دەيدى ساياساتتانۋشى.

ونىڭ اتاپ وتۋىنشە، يزرايلدە يراننىڭ ۋراندى بايىتۋ دەڭگەيىنە قاتىستى بارلاۋ مالىمەتتەرى دە بولۋى ىقتيمال. 13-ماۋسىمدا يراندىق اسكەري باسشىلىق پەن يادرولىق تەحنولوگيالار بويىنشا ماماندارعا ءدال سوققى جاساۋ دا يزرايلدىڭ قولىندا يراننىڭ ىشكى جاعدايىنا قاتىستى ناقتى اقپاراتتىڭ بار ەكەن بىلدىرەدى.

- يزرايل 13- ماۋسىمدا يرانعا تەك قانا سوققى جاساپ قويماي، سونىمەن قاتار وعان قارسى ۇزاق مەرزىم اۋەدەن شابۋىلداۋ وپەراتسياسىن جۇرگىزبەك. تەل-اۆيۆ يرانعا 14 كۇن بويى شابۋىل جاساۋدى جوسپارلاپ وتىرعانىن مالىمدەدى. 200 شابۋىلداعىش ۇشاق بولعاننىڭ وزىندە، ءتىپتى يزرايل مەن يراندى ءبولىپ جاتقان 1500 شاقىرىمدى ەڭسەرگەننىڭ وزىندە 2 اپتا بويى اۋەدەن شابۋىل جاساۋ وتە كوپ، - دەيدى سۇلتان اكىمبەكوۆ.

ساراپشى يزرايل قارىمتا سوققىعا دايىن بولعانىن ايتادى.

- يراننىڭ قۋاتتى زىمىران اسكەرى، سونىمەن قاتار شابۋىلداۋشى كوپتەگەن ۇشقىشسىز اپپاراتى بار. وندا 2 مىڭنان 3 مىڭعا دەيىن بالليستيكالىق زىمىران بار دەپ ەسەپتەلىنەدى. تەگەران 13-ماۋسىم كۇنى كەشكىسىن قارىمتا شابۋىل جاسادى. دەگەنمەن، شابۋىلعا قارىمتا جاۋاپ تۇرعىسىنان ايتار بولساق، وندا وتە ۇزاققا سوزىلىپ كەتتى. بۇعان 13- ماۋسىم كۇنى ارميا مەن يسلام ريەۆوليۋتسياسى ساقشىلار كورپۋسىنىڭ كوپتەگەن كومانديرىنىڭ مەرت بولۋى سەبەپ، - دەدى ول.

سۇلتان اكىمبەكوۆ يران قارىمتا شابۋىل كەزىندە 100-دەن 200-گە دەيىن زىمىران ۇشىرعانىن، ونىڭ كەيبىرى يزرايلدىڭ اۋە قورعانىس كۇشى جۇيەسىن بۇزىپ وتكەنىن ايتادى.

- بۇل جاعدايدا يراننىڭ مۇمكىندىگى كوپ ەمەس. ءىس جۇزىندە ول امەريكالىق بازاعا، ماسەلەن كورشىلەس يراكتاعى جانە پارسى شىعاناعىنداعى وزگە اراب ەلدەرىندەگى بازالارعا سوققى جاساۋعا تىرىسۋى مۇمكىن. ءبىراق، ا ق ش- تىڭ ەڭ ءىرى بازاسى تاياۋ شىعىستىڭ جەرگىلىكتى گەوساياسي الاڭىندا ەڭ ماڭىزدى ويىنشىلاردىڭ ءبىرى سانالاتىن قاتاردا ورنالاسقان. قاتار بەلگىلى ءبىر دەڭگەيدە يراننىڭ ءالى دە پايداسىنا جارايدى. مۇنىڭ ۇستىنە، قاتاردىڭ تەگەرانمەن بارلىق ۋاقىتتا دا تىعىز بايلانىسى بولدى. ءبىراق، ەڭ ماڭىزدىسى ا ق ش- تىڭ جانجالعا ارالاسۋى يرانعا سوققىنى كۇشەيتە تۇسەدى. سالماعى 13 توننا بولاتىن امەريكالىق بۋنكەرگە قارسى بومبانى پايدالانۋ تەگەران ءۇشىن باستى پروبلەماعا اينالارى ءسوزسىز. يزرايلدە مۇنداي بومبا دا، ونى تاسىمالداي الاتىن ۇشاق تا جوق. سوندىقتان ول بايىتىلعان ۋران ساقتاۋلى تۇرعان فرودوداعى جەراستى ورتالىعىن جويا الماي وتىر، - دەدى ول.

وسىعان دەيىن ترامپتىڭ يزرايل مەن يران اراسىندا بەيبىتشىلىك ورناتۋعا ۋادە بەرگەنى تۋرالى جازعان ەدىك.

اۆتور

مارلان جيەمباي