ا ق ش- تىڭ يەمەنگە جاساعان اۋە سوققىسىنان قازا تاپقاندار سانى 38 گە جەتتى
استانا. KAZINFORM - ا ق ش اسكەري- اۋە كۇشتەرىنىڭ يەمەن اۋماعىنا جاساعان اۋە شابۋىلدارىنان 38 ادام قازا تاۋىپ، 102 ادام ءتۇرلى جاراقات العان. بۇل تۋرالى ەلدەگى حۋسيتتىك «انسار اللاح» قوزعالىسىنا قاراستى Al Masirah تەلەارنا حابارلادى، دەپ جازادى ت ا س س.
شابۋىل 18-ساۋىرگە قاراعان ءتۇنى قىزىل تەڭىز جاعالاۋىنداعى ەل-حودەيدا پروۆينتسياسىندا ورنالاسقان راس- يسا پورتىنا جاسالعان. بۇل جەردە مۇناي تەرمينالى ورنالاسقان. اۋە سوققىسى سالدارىنان نىساندا ءورت شىققان.
ا ق ش اسكەري ۇشاقتارى كەمىندە 14 رەت سوققى جاساعان. بومبالاۋ اياقتالعاننان كەيىن وقيعا ورنىنا دارىگەرلەر مەن ازاماتتىق قورعانىس قىزمەتكەرلەرى كەلگەن. الايدا شابۋىلدار جالعاسىپ، ولاردىڭ اراسىندا دا قازا تاپقاندار تىركەلگەن.
ا ق ش قارۋلى كۇشتەرىنىڭ ورتالىق قولباسشىلىعى (CENTCOM) ءوز مالىمدەمەسىندە راس- يسا پورتىن جويعاندارىن راستادى. ولاردىڭ ايتۋىنشا، بۇل حۋسيتتەردى مۇناي ونىمدەرىن زاڭسىز ساتىپ، پايدا تابۋ مۇمكىندىگىنەن ايىردى جانە وتىن كوزدەرىنە قولجەتىمدىگىن شەكتەدى.
ەسكە سالايىق، 2023 -جىلى گازا سەكتورىندا قاقتىعىس ۋشىعا تۇسكەننەن كەيىن حۋسيتتەر يزرايل اۋماعىنا زىمىرانمەن سوققى جاسايتىندارىن جانە يزرايلمەن بايلانىستى كەز كەلگەن كەمەنىڭ قىزىل تەڭىز بەن باب- ەل- ماندەب بۇعازى ارقىلى وتۋىنە جول بەرمەيتىندەرىن مالىمدەگەن ەدى.
قاڭتار ايىندا گازا ايماعىندا ۋاقىتشا ءبىتىم ورناعان كەزدە بۇل شابۋىلدار توقتاعان بولاتىن. الايدا ناۋرىزدا ءبىتىم بۇزىلعاننان كەيىن حۋسيتتەر قايتادان يزرايل كەمەلەرى مەن نىساندارىنا شابۋىل جاساي باستاعان.
2025 -جىلعى 15- ناۋرىزدا ا ق ش پرەزيدەنتى دونالد ترامپتىڭ بۇيرىعىمەن حۋسيتتەر باقىلاۋىنداعى يەمەن ايماقتارىنا جاپپاي اۋە سوققىلارى باستالدى. ا ق ش ورتالىق قولباسشىلىعى بۇل وپەراتسيانىڭ ماقساتى - امەريكالىق مۇددەلەردى قورعاۋ جانە تەڭىز جولدارىنداعى قاۋىپسىزدىكتى قامتاماسىز ەتۋ ەكەنىن اتاپ ءوتتى.
جاۋاپ رەتىندە «انسار اللاح» قوزعالىسى قىزىل تەڭىزدىڭ سولتۇستىگىندە ورنالاسقان Harry Truman امەريكالىق اۋە تاسىمالداۋشى كەمەسىنە زىمىراندار مەن دروندار ارقىلى شابۋىل جاساعان. كەمەگە زاقىم كەلگەنى تۋرالى اقپارات جوق.