ا ق ش-تىڭ ۋكرايناداعى ەلشىسى قىزمەتىنەن كەتەدى
استانا. KAZINFORM - ا ق ش-تىڭ كيەۆتەگى ەلشىسى بريدجيت برينك وتستاۆكاعا كەتىپ، ۆاشينگتونعا ورالادى. بۇل تۋرالى امەريكا استاناسىندا وتكەن بريفينگتە ا ق ش مەملەكەتتىك دەپارتامەنتىنىڭ رەسمي وكىلى تەممي بريۋس مالىمدەدى، دەپ جازادى انادولى.
تەممي بريۋس ديپلوماتيالىق ميسسيا باسشىسى «قاقتىعىستىڭ 3 جىلىندا وسى قىزمەتتى اتقارعاننان كەيىن» وتستاۆكاعا كەتكەنىن اتاپ ءوتتى.
- ول ءوز مىندەتىن تاماشا اتقاردى، ءبىز وعان بار جاقسىلىقتى تىلەيمىز، - دەدى مەملەكەتتىك دەپارتامەنت وكىلى.
ديپلومات ەلشىنىڭ وتستاۆكاعا كەتۋى تۋرالى ەگجەي-تەگجەيلى مالىمەت بەرمەدى. بريۋس امەريكا قۇراما شتاتتارى ۋكراينا مەن رەسەي اراسىنداعى قاقتىعىستى توقتاتۋعا باعىتتالعان كۇش-جىگەرگە باسا نازار اۋداراتىنىن ايتتى.
ايتا كەتەيىك، بۇعان دەيىن ىستامبۇلداعى رەسەي باس كونسۋلدىعىنىڭ عيماراتىندا رەسەي مەن ا ق ش دەلەگاتسيالارى اراسىنداعى كونسۋلتاتسيالاردىڭ ەكىنشى راۋندى وتكەنىن جازدىق.