باسىلىمنىڭ مالىمەتىنشە، 2026 -جىلعى ارالىق سايلاۋ ناتيجەسىندە دەموكراتتار كونگرەستىڭ ەكى پالاتاسىندا دا باقىلاۋعا يە بولىپ، ءبىرقاتار شتاتتاعى گۋبەرناتور سايلاۋىندا جەڭىسكە جەتكەن.
دونالد ترامپتىڭ ءوزى بۇل سايلاۋعا قاتىسقان جوق. الايدا ناتيجەلەر ونىڭ پرەزيدەنتتىك مەرزىمىنىڭ سوڭعى ەكى جىلىنداعى ساياسي مۇمكىندىكتەرىنە اسەر ەتۋى ىقتيمال.
ەۋروپالىق ديپلوماتتاردىڭ پىكىرىنشە، كونگرەستەگى قارسىلىق كۇشەيگەن جاعدايدا ترامپ ىشكى ساياساتتان گورى پرەزيدەنتتىڭ وكىلەتتىگى كەڭىرەك سىرتقى ساياساتقا كوبىرەك نازار اۋدارۋى مۇمكىن.
- ول «اقساق ۇيرەكتەن» گورى «قۇتىرعان يتكە» كوبىرەك ۇقسايتىن بولادى. قازىرگى جاعدايعا شىنايى قارايمىز. ەشكىم بۇگىنگى پروبلەمالار وزدىگىنەن جويىلادى دەپ كۇتىپ وتىرعان جوق، - دەدى Euronews باسىلىمىنا ە و ديپلوماتتارىنىڭ ءبىرى.
ەۋرو پارلامەنتتىڭ ا ق ش- پەن بايلانىس جونىندەگى دەلەگاتسياسىن باسقاراتىن براندو بەنيفەي دە وسىنداي الاڭداۋشىلىق ءبىلدىردى.
ونىڭ ايتۋىنشا، ترامپ الداعى ەكى جىلدا سىرتقى ساياساتتا بۇرىنعىدان دا كۇتپەگەن شەشىمدەر قابىلداۋى مۇمكىن. اسىرەسە ۋكراينا مەن تاياۋ شىعىسقا قاتىستى قادامدارى ەۋروپاعا تىكەلەي اسەر ەتەدى.
ەۋروپا ءۇشىن وزەكتى ماسەلەلەردىڭ ءبىرى - يرانداعى سوعىس سالدارىنان تۋىنداعان ەنەرگەتيكالىق داعدارىس.
28-اقپاندا سوعىس باستالعالى يران ورمۋز بۇعازى ارقىلى كەمە قاتىناسىن ەداۋىر شەكتەگەن. ماۋسىم ايىندا تەڭىز جولى قىسقا مەرزىمگە اشىلعانىمەن، كەيىنگى شەكتەۋلەر ەنەرگيا تاسىمالداۋشىلار باعاسىنىڭ وسۋىنە ىقپال ەتىپ وتىر.
ەۋروپارلامەنت دەپۋتاتى ۆيردجيل-دانيەل پوپەسكۋدىڭ ايتۋىنشا، ا ق ش- تاعى سايلاۋ ناتيجەسى ەنەرگيا باعاسىن بىردەن تومەندەتپەيدى. نەگىزگى ماسەلە - ۆاشينگتون مەن تەگەراننىڭ شيەلەنىستى باسەڭدەتۋگە دايىن بولۋى.
دەموكراتتاردىڭ كونگرەستەگى ىقپالىنىڭ ارتۋى ترامپقا يرانمەن قاقتىعىستى توقتاتۋ جونىندەگى قىسىمدى كۇشەيتۋى مۇمكىن. الايدا پرەزيدەنتتىڭ زاڭدارعا ۆەتو قويۋ قۇقىعى ساقتالادى.
ناتو اياسىندا ا ق ش اسكەرىنىڭ ەۋروپاداعى سانى دا ماڭىزدى ماسەلە بولىپ وتىر. بيىل مامىردا ۆاشينگتون گەرمانيادان 5 مىڭ اسكەري قىزمەتشىسىن شىعاراتىنىن جاريالاعان. ال ماۋسىمدا ەۋروپاداعى امەريكالىق كۇشتەردىڭ قۇرىلىمىن التى اي بويى قايتا قاراۋ باستالعان.
ەۋروپالىق وداقتاستار بۇل ۇدەرىس اسكەر سانىن ودان ءارى قىسقارتۋعا اكەلمەيدى دەپ ۇمىتتەنەدى.
- ساياسي كۇشتەر اراسىنداعى تەپە-تەڭدىكتىڭ وزگەرۋى وزدىگىنەن جاڭا شەشىمدەر قابىلداناتىنىنا كەپىلدىك بەرمەيدى. ەۋروپا ءوزىنىڭ قورعانىسى مەن قاۋىپسىزدىگىن قامتاماسىز ەتۋ ءۇشىن بۇرىنعىدان دا كوپ جۇمىس ىستەۋى كەرەك، - دەدى ەۋروپارلامەنتتىڭ سىرتقى ىستەر كوميتەتىنىڭ ءتوراعاسى داۆيد ماكالليستەر.
ساۋدا قاتىناستارىندا ايتارلىقتاي وزگەرىس بولماۋى مۇمكىن. سەبەبى ترامپ كەدەندىك تاريفتەر مەن ساۋدا كەلىسىمدەرىنە قاتىستى وكىلەتتىگىن ساقتاپ وتىر.
2025 -جىلعى شىلدەدە جاسالعان كەلىسىمگە سايكەس، ا ق ش ەۋرووداق تاۋارلارىنىڭ باسىم بولىگىنە كەدەندىك باج ەنگىزگەن. ءوز كەزەگىندە ە و امەريكالىق ونەركاسىپ تاۋارلارىنا سالىناتىن باجداردى الىپ تاستاۋعا مىندەتتەنگەن.
قازىر بريۋسسەل ا ق ش- تىڭ بولاتقا ەنگىزگەن P تاريفىن تومەندەتۋ جانە ەۋروپالىق تاۋارلاردىڭ جەكەلەگەن ساناتتارىن باجدان بوساتۋ ماسەلەسىن تالقىلاپ جاتىر.
ەۋرو پارلامەنتتەگى كەيبىر دەپۋتاتتار ترامپتىڭ ساياسي ۇستانىمى السىرەگەن تۇستا ۆاشينگتونمەن جاسالعان ساۋدا كەلىسىمىن قايتا قاراۋدى ۇسىنىپ وتىر.
ايتا كەتەيىك، بۇعان دەيىن ا ق ش- تاعى ارالىق سايلاۋدا دەموكراتتاردىڭ سەنات پەن وكىلدەر پالاتاسىندا باسىمدىققا يە بولاتىنى حابارلانعان ەدى. NBC News بولجامىنا سايكەس، دەموكراتتار سەناتتا قوسىمشا جەتى ورىن جەڭىپ الىپ، وكىلدەر پالاتاسىندا كەمىندە 258 ماندات يەلەنۋى مۇمكىن. دەگەنمەن جەكەلەگەن وكرۋگتەردە داۋىس ساناۋ ءالى جالعاسىپ جاتىر.