ا ق ش- تاعى دەرەكتەر ورتالىقتارى تۇتاس ءبىر ەلگە جەتەتىن ەلەكتر ەنەرگياسىن تۇتىنادى

استانا. قازاقپارات - 2024-2025-جىلدارى ا ق ش- تاعى ەڭ ءىرى دەرەكتەر ورتالىقتارى 82 تەراۆاتت-ساعات ەلەكتر ەنەرگياسىن تۇتىنعان. بۇل ەلدىڭ جالپى ەنەرگيا تۇتىنۋىنىڭ 1,8 پايىزىن قۇرايدى.

Фото: Abalone Technology Group

مۇنداي كورسەتكىش ميسسۋري شتاتىنىڭ نەمەسە دانيا سياقتى تۇتاس ءبىر ەلدىڭ ءبىر جىلدىق ەلەكتر ەنەرگياسىن تۇتىنۋ كولەمىمەن شامالاس، دەپ حابارلايدى CBS News اگەنتتىگى.

Nature Sustainability جۋرنالىندا جاريالانعان گارۆارد ۋنيۆەرسيتەتى عالىمدارىنىڭ زەرتتەۋى جاساندى ينتەللەكتىنىڭ دەرەكتەر ورتالىقتارىنا تاۋەلدىلىگىن جانە ولاردىڭ قورشاعان ورتاعا اسەرىن ايقىندايدى. عالىمدار بۇل ورتالىقتاردىڭ نەلىكتەن وراسان كوپ ەلەكتر ەنەرگياسىن تۇتىناتىنىن ءتۇسىندىردى.

- ءسىز جىبەرگەن ءاربىر ەلەكتروندى حات، جاريالاعان ءاربىر فوتوسۋرەتىڭىز، كورگەن ءاربىر باعدارلاماڭىز جانە گەنەراتيۆتى ج ي- گە جولداعان ءاربىر سۇراعىڭىز دەرەكتەر ورتالىقتارى ارقىلى وتەدى. تەرەزەسىز عيماراتتاردا تاۋلىك بويى جۇمىس ىستەيتىن ونداعان مىڭ كومپيۋتەر ورنالاسقان. ولار جۇمىس ىستەگەندە كوپ جىلۋ بولىنەدى. سوندىقتان مۇنداي ورتالىقتاردى ۇزدىكسىز سالقىنداتىپ وتىرۋ كەرەك. بۇل - ءبىر ءسات تە توقتامايتىن زاۋىت ىسپەتتى، - دەدى گارۆارد ۋنيۆەرسيتەتىنىڭ عالىمى دجانلۋكا گۋيدي.

ونىڭ ايتۋىنشا، سوڭعى جىلدارى ا ق ش- تاعى ءىرى دەرەكتەر ورتالىقتارىنىڭ سانى ەكى ەسەدەن استام وسكەن. تاعى 2 مىڭعا جۋىق نىساننىڭ قۇرىلىسى جوسپارلانىپ جاتىر نەمەسە قازىر سالىنىپ جاتىر.

وسىعان بايلانىستى گۋيدي تەحنولوگيالىق كومپانيالار مەن بيلىك وكىلدەرىن جاڭا دەرەكتەر ورتالىقتارىن سالۋ كەزىندە اشىقتىقتى قامتاماسىز ەتۋگە شاقىردى. سونداي-اق ول قۇرىلىس باستالماي تۇرىپ نىسانداردىڭ قورشاعان ورتاعا اسەرىن باعالاپ، جەرگىلىكتى تۇرعىنداردىڭ پىكىرىن ەسكەرۋدىڭ ماڭىزىن اتاپ ءوتتى.

- ءبىز جاساندى ينتەللەكتىنى قىسقا مەرزىمدە دامىتا الاتىنىمىزدى دالەلدەدىك. ەندى ونى دۇرىس دامىتا الاتىنىمىزدى دا كورسەتەيىك، - دەدى ول.

بۇعان دەيىن قازاقستاندا قۋاتى 1 گۆت دەرەكتەر ورتالىقتارى القابى سالىناتىنى حابارلانعان بولاتىن.