ا ق ش- تاعى فەستيۆالدە جۇلدە العان فيلم استانادا كورسەتىلدى

استانا. KAZINFORM - استانادا «شەكتەۋسىز ءۇمىت» اتتى دەرەكتى فيلمنىڭ رەسمي تانىستىرىلىمى ءوتتى. ا ق ش- تا جۇلدە العان تۋىندىنى العاشقىلاردىڭ ءبىرى بولىپ تاماشالاعانداردىڭ ىشىندە Kazinform ءتىلشىسى دە بار.

«بۇل بالا ەمدەلۋ ءۇشىن ءومىر سۇرمەسىن. ءومىر ءسۇرۋ ءۇشىن ەمدەلمەسىن دە! ءومىرى ەمدەلۋمەن وتپەسىن». دەرەكتى فيلم كادر سىرتىنداعى وسىنداي سوزدەردەن باستالادى. سەرتتىڭ يەسى - سەرەبرالدى سال بولىپ تۋعان، بيىل عانا 17 جاسقا تولعان شىمكەنتتىك بوزبالانىڭ اكەسى. 30 مينۋتتىق شاعىن تۋىندىنىڭ ونە بويى وسىنداي كەسەك سوزدەرگە، ەموتسيا مەن شىنايى اڭگىمەگە قۇرىلعان. بالاجاندىلىق دەگەن قۇر وبەكتەۋ مەن ەموتسيا عانا ەمەس، ناقتى ارەكەت، مولشەرمەن بەرىلگەن قامقورلىق، مولشەرگە سىيمايتىن ماحاببات ەكەنىن تۋىندىداعى 5 كەيىپكەردىڭ ءومىرى نانىمدى جەتكىزەدى.

وسىنداي شىنايىلىعى باعالانسا كەرەك، ا ق ش- تىڭ كاليفورنيا شتاتىندا وتكەن قىسقا مەتراجدى دەرەكتى فيلمدەر كونكۋرسىندا ەكى بىردەي اتالىم بويىنشا جەڭىمپاز اتانىپتى. ءبىرى - «ۇزدىك دەرەكتى قىسقا مەتراجدى فيلم»، ەكىنشىسى - بالالار مۇگەدەكتىگى ماسەلەسىن باياندايتىن ۇزدىك فيلم».

ەلورداداعى «كەرۋەن» ساۋدا-ويىن-ساۋىق ورتالىعىندا وتكەن تانىستىرىلىمعا نەگىزىنەن ەرەكشە بالا تاربيەلەپ وتىرعان اتا-انالار جينالدى. ۇيىمداستىرۋشىلار بالاسىمەن بىرگە كەلگەن اتا-انالارعا فيلمدەگى ەموتسياعا تولى ساتتەر بالاعا اۋىر ءتيۋى مۇمكىن ەكەنىن ەسكەرتىپ، قالاعان ۋاقىتتا زالدان شىعۋعا بولاتىنىن الدىن الا ايتقان. ءبىراق فيلم اياقتالعانشا تىرپ ەتكەن جان بولمادى. تەك اراسىندا كەيىپكەرمەن بىرگە قۋانىپ، كەيىپكەرمەن بىرگە كۇرسىنگەن داۋىستار زالدىڭ ءار تۇسىنان ەستىلىپ قالىپ تۇردى.

فيلمگە ءومىرى ارقاۋ بولعان بەس كەيىپكەردىڭ بارىنە ورتاق ەكى دەرەك بار. ءبارى سەرەبرالدى سال اۋرۋىمەن كۇرەسىپ كەلە جاتقان جەتكىنشەكتەر جانە شىمكەنتتەگى «شەكتەۋسىز ءۇمىت» وڭالتۋ ورتالىعىنان ەم الادى. دەرەكتى تۋىندىنىڭ اتى دا «شەكتەۋسىز ءۇمىت». قىزىنان ەرتە ايىرىلعان انانىڭ باسقا ءبىر ايەلدەن سال بوپ تۋعان قىزدى اسىراپ الۋى، بالاسىنىڭ دياگنوزىن بىلمەگەن انانىڭ «وزگە بالالارداي نەگە دۇرىس تۇرا المايسىڭ» دەپ قول كوتەرۋى، بەتىن كوزدەن پارلاعان جاس پەن ماڭدايدان سورعالاعان تەر جاپسا دا، جاتتىعۋىن توقتاتپاعان قايسار ۇلدىڭ تالپىنىسى، ءبارى-ءبارى قاز قالپىندا بەرىلگەن.

- سەرەبرالدى سال بوپ تۋعان بالالاردىڭ بارىندە ەركەلىك بار. ءبىراق بەكنۇردى وبەكتەسەڭ، قاسارىسىپ جاتتىعۋ ىستەمەي قوياتىنى بار. ونىمەن ەرەسەك ادامشا عانا سويلەسۋ كەرەك. مۇنداعى 150 گە جۋىق بالانىڭ بارىنە وسىنداي ەرەكشە قاتىناس كەرەك، - دەيدى وڭالتۋ ورتالىعىنىڭ مامانى. فيلمدەگى جىلاپ ءجۇرىپ جاتتىعاتىن بالا وسى بەكنۇر.

بەس بالانىڭ ءبىرى اسپاز بولۋدى ارمانداسا، ءبىرى ساقشى بولاتىنىن، تاعى ءبىرى IT مامانى بولاتىنىن ايتادى. ال اتا-انالاردىڭ ءبارى «بالام ءۇيلى بولىپ، ۇرپاق سۇيسە» دەپ تەبىرەنەدى.

- «شەكتەۋسىز ءۇمىت» قورىن 2019-جىلى قۇردىق. وڭالتۋ ورتالىعىنداعى 150 گە جۋىق بالانىڭ ىشىندە ءوز ۇلىم دا بار. جاسى17 دە. ەلىمىزدە ەرەكشە بالالاردى وقىتاتىن ارنايى مەكتەپتەر بىرنەشەۋ بولعانىمەن، وزدىگىنەن قوزعالا المايتىن بالالارعا ءبىلىم بەرەتىن جالعىز مەكتەپ وسى شىمكەنتتە. بالام سوندا ورتا ءبىلىم الىپ جاتىر. مەكتەپتەن بوس كەزدە ورتالىقتا ەم الادى. مەكتەپ بىتىرگەن سوڭ جوعارى ءبىلىم الۋعا كوندىردىك. ءيا، كوندىردىك. ويتكەنى وزىنە سەنىمسىز بولاتىن ساتتەرى كوپ. ونىڭ ءبارىن ەڭسەرۋ ءۇشىن شەشەسى ەكەۋمىزگە ەڭسەمىزدى تۇسىرۋگە بولمايدى، - دەپ باستادى اڭگىمەسىن مارات تەلقوجا.

تۇڭعىشتارى سال بولىپ تۋاتىنىن بىلگەندە دارىگەرلەر جاس جۇبايعا بالانى ارنايى مەكەمەگە وتكىزۋگە كەڭەس بەرەدى. فيلمنىڭ باسىندا ايتىلعان سەرتتى مارات ەڭ العاش رەت سول دارىگەرلەردەن شىققان كەزدە ايتادى. سەرتتىڭ ۇدەسىنەن شىعۋ ءۇشىن دوستارىن جيناپ، قور قۇرادى. سول قوردىڭ دەمەۋىمەن وڭالتۋ ورتالىعىن اشادى.

- ورتالىققا بارعاندا اكەمىزدىڭ ۇيىنە كەلگەندەي بولامىز، - دەيدى ساپاركۇل ەسىمدى كەيىپكەردىڭ اناسى جانات بەيسەنوۆا. بالاسىنا لايىقتى قامقورلىق كورسەتۋ ءۇشىن مەيىربيكە ماماندىعىن يگەرگەن انانىڭ اڭگىمەسى دە اسەرلى.

- ءوزىم كىشىگىرىم بيزنەسمەنمىن. ءوز بالامنىڭ تاعدىرى ارقىلى ەرەكشە بالا تاربيەلەۋدىڭ مەديتسينالىق الەۋمەتتىك جاعىنان بولەك پسيحولوگيالىق قىرى بار ەكەنىن تۇسىندىك. ول بىلگەنىمىزدى ءوز ورتامىزدى ۇنەمى ايتىپ جۇرەمىز. ءبىراق جەكە تانىستىق ارقىلى ارى كەتسە مىڭ ادامعا ايتۋعا بولاتىن شىعار. ال مىڭداعان ادامنىڭ، بارشا قازاقستاندىقتاردىڭ نازارىن وسى ماسەلەگە اۋدارۋ ءۇشىن فيلم ءتۇسىرۋ كەرەك دەگەن يدەيا پايدا بولدى. ول يدەيانىڭ اۆتورى - دوسىمىز، پروديۋسەر دانيار ۆاليۋللا. قازاق ءتىلدى ورتانىڭ مەنتاليتەتى ءسال باسقاشالاۋ. مۇگەدەك بالامىزدان ۇيالامىز. قوناققا اپارماۋعا، تىعىپ ۇستاۋعا تىرىسامىز. مەن مۇنى ەكىنشى تۇرمە دەيمىن. ءبىرىنشى تۇرمە دەنەسىنىڭ كەمىستىگى بولسا، ەكىنشى تۇرمە - وتباسىنداعى وقشاۋ قاتىناس. قۇدايعا شۇكىر، مەنىڭ بالام تۋعاننان ەكىنشى تۇرمەگە تۇتقىن بولىپ كورگەن جوق. ويتكەنى وزىمە سەرت بەردىم. بالامدى ەل قاتارىنا قوسۋ ءۇشىن ەڭ اۋەلى ونداي بالانىڭ بار ەكەنىن ورتام ءبىلۋى كەرەك دەپ ويلادىم»، - دەيدى «شەكتەۋسىز ءۇمىت» قورىنىڭ نەگىزىن قالاۋشى.

رەجيسەر مارات تولەۋوۆ وسى تۋىندىنى ءتۇسىرۋ ارقىلى وزىنە جاڭا الەم اشقانىن ايتادى.

- فيلم 30 مينۋتتىق قانا بولعانىمەن ءتۇسىرۋ وڭاي بولعان جوق. مەن پراكتيكالىق قيىندىقتاردى ايتىپ تۇرعان جوقپىن. ەرەكشە بالالاردىڭ تابيعاتىن اشامىن دەپ ءجۇرىپ جانىنا جارا سالىپ المايمىن با، اتا-اناسىنىڭ كوڭىلىنە قاياۋ ءتۇسىرىپ قويمايمىن با» دەپ ۋايىمدادىم. بارىنەن دە سول جاعى اۋىر بولدى، - دەيدى رەجيسەر.

دەرەكتى فيلم ا ق ش- تا توپ جارعاننان كەيىن ەلدە دە قىزىعۋشىلىق ارتىپتى. شىمكەنت پەن استانادان كەيىن الماتىدا دا تانىستىرىلىمى وتەدى.

- كينوتەاترلار تاراپىنان دا، حالىق تاراپىنان دا قولداۋ بار ەكەنىن سەزىنىپ ءجۇرمىز. رەسمي تانىستىرىلىمدار عانا ارقىلى حالىقتىڭ كوپ بولىگىنە ءۇنىمىز جەتپەيتىنىن تۇسىنەمىز. سوندىقتان كەلەشەكتە الەۋمەتتىك جەلىگە دە سالاتىن شىعارمىز. قازىر You Tube-تە جابىق سىلتەمەسى عانا بار. فيلمنىڭ الداعى تاعدىرىن بۇكىل ۇجىممەن اقىلداسىپ شەشەمىز، - دەيدى پروديۋسەر.