بۇل جونىندە باس پروكۋرور تودد بلانش مالىمدەپ، ديللونعا 18 اي بويى اتقارعان قىزمەتى مەن ادالدىعى ءۇشىن العىس ايتتى.
ديللون - ارالىق سايلاۋدان كەيىن ترامپ اكىمشىلىگىنەن كەتكەن پرەزيدەنتتىڭ جوعارى لاۋازىمدى العاشقى جاقتاسى. كەيبىر دەرەكتەرگە قاراعاندا، ونىڭ قىزمەتتەن كەتەتىنى الدىن الا بەلگىلى بولعان. بۇعان ديللون جاۋاپتى بولعان ءبىرقاتار سوت ىستەرىندەگى جەڭىلىستەرگە پرەزيدەنتتىڭ كوڭىلى تولماۋى سەبەپ بولعان.
سونداي-اق ديللون ترامپقا ونىڭ اكىمشىلىگىندە قىزمەت ەتۋگە مۇمكىندىك بەرگەنى ءۇشىن العىس ايتتى. ونىڭ سوزىنشە، ءوزى باسقارعان ۆەدومستۆو قوعامداعى تەڭدىك پەن ينكليۋزيانى ىلگەرىلەتۋگە باعىتتالعان ءبىرقاتار باستامانىڭ كۇشىن جويۋعا قول جەتكىزگەن. سونداي-اق ايەلدەر سپورتىن قورعاۋ باعىتىندا جۇمىس ىستەگەن.
ديللون باسقارعان كەزەڭدە باسقارما بەدەلدى ۋنيۆەرسيتەتتەردىڭ قىزمەتىنە قاتىستى تەرگەۋ جۇرگىزىپ، سايلاۋشىلار تىزىمىنە قول جەتكىزۋ ماسەلەسى بويىنشا سوت ىستەرىنە قاتىستى.
بۇدان بولەك ديللون قىزمەت اتقارعان كەزەڭدە ۆەدومستۆودان جۇزدەگەن تاجىريبەلى زاڭگەر كەتتى. كونگرەسكە ۇسىنىلعان مالىمەتتەرگە سايكەس، وسى جىلدىڭ باسىندا باسقارما قىزمەتكەرلەرىنىڭ شامامەن 75 پايىزى جۇمىستان شىققان.
ديللون بۇل قىزمەتكە تاعايىندالعانعا دەيىن ترامپتىڭ جەكە ادۆوكاتى بولدى. ول 2020-جىلعى پرەزيدەنت سايلاۋىنىڭ قورىتىندىسىنا داۋ ايتۋ ارەكەتتەرىنە قاتىسىپ، 6-قاڭتارداعى وقيعالارعا بايلانىستى سوت پروتسەستەرىندە ترامپتىڭ مۇددەسىن قورعاعان.
ناسىلدىك كەمسىتۋشىلىككە قارسى ۇلتتىق قاۋىمداستىقتىڭ باس زاڭ كەڭەسشىسى، بايدەن اكىمشىلىگى كەزىندە ازاماتتىق قۇقىقتار جونىندەگى باس پروكۋروردىڭ كومەكشىسى بولعان كريستەن كلارك:
- ول بارلىق امەريكالىقتىڭ ازاماتتىق قۇقىقتارىن قورعاۋدىڭ ورنىنا، ىستەردى جاۋىپ، قىزمەتكەرلەردى جۇمىستان شىعارىپ، باسقارمانى زاڭسىز ءارى پارتيالىق ماقساتتارعا جەتۋ قۇرالىنا اينالدىردى، - دەگەن بولاتىن.
بۇعان دەيىن ا ق ش مەملەكەتتىك حاتشىسى ماركو رۋبيو قىزمەتىنەن كەتەتىنى تۋرالى قاۋەسەتتى جوققا شىعارعانىن جازعان ەدىك.