ا ق ش-تا وتانداسىمىزدىڭ كىتابىنا سۇرانىس جوعارى
استانا. قازاقپارات – ا ق ش-تا تۇراتىن وتانداسىمىز بيزنەسكە ارنالعان كەشەندى وقۋ قۇرالىن جازىپ شىقتى. جەرلەسىمىزدىڭ بۇل شىعارماسىنا قاراپايىم وقىرمانداردان بولەك الپاۋىت كومپانيالار قىزىعۋشىلىق تانىتىپ جاتىر.
الەمگە بەلگىلى كاسىپكەرلەردىڭ تاجىريبەسىنە سۇيەنىپ، جاساندى ينتەللەكتتىڭ كومەگىمەن جازىلعان وقۋلىق قالاي تابىسقا جەتۋ جولىن ۇيرەتەدى.
Amazon-عا ساتىلىمعا شىققان انار ءومىرزاقتىڭ بيزنەس وقۋ قۇرالى كەز كەلگەن كاسىپكەر ءۇشىن جول سىلتەيتىن باعدار ىسپەتتەس. سەبەبى، بۇعان دەيىن دە ستارتاپتارعا سەرپىن بەرۋمەن اينالىسىپ كەلگەن وتانداسىمىز سەگىز جىل بويى سالانىڭ قىر-سىرىن جان-جاقتى زەرتتەگەن. ناتيجەسىندە جاساندى ينتەللەكتتىڭ كومەگىمەن جيىرما مىڭ تاقىرىپتى قامتيتىن كىتاپ جازىپ شىقتى.
انار ءومىرزاق، كاسىپكەر:
- كىتاپتىڭ شىعارىلۋى ول ۇلكەن زەرتتەۋ جۇمىسىنىڭ قورتىندىسى بولدى. ەڭ بىرىنشىدەن، ءبىز بارلىق ون مىڭنان استام ساعاتتىق ۆيدەوكونتەنتتى ءبىر مالىمەتتىك بازاعا ەندىرىپ، سونىڭ ۆەكتورلارىن قورتىندىلاپ، ناتيجەلەرىن قاراپ شىقتىق. ول ەڭ بىرىنشىدەن ادامنىڭ قولىنان كەلمەيتىن دۇنيە. كاسىپكەر دەگەن ەڭ بىرىنشىدەن ادام، ونىڭ پسيحولوگياسى بار جانە دە ول وتە كوپ بيزنەسكە اسەر ەتەدى. ءبىز وسى زەرتتەۋدىڭ قورتىندىسىنان كورىپ تۇرامىز.
جاس كاسىپكەرلەردەن باستاپ، الپاۋىت كومپانيالارعا دەيىن بيزنەس ترەنينگتەر وتكىزىپ جۇرگەن انار الداعى ۋاقىتتا جوباسىن جانداندىرۋعا نيەتتى. ونىڭ ىسكەرلىكتى ارتتىرىپ، كاسىپكەرلەردىڭ ۋاقىتىن ۇنەمدەۋگە باعىتتالعان كىتابى قازىردىڭ وزىندە ۇلكەن سۇرانىسقا يە.
انار ءومىرزاق، كاسىپكەر:
- كىتاپ تەك قانا وسى 1-ماۋسىمنان باستاپ ساتىلا باستادى. بۇل كىتاپتىڭ بولاشاعى زور دەپ ويلايمىن. وسىدان كەيىن باسقا ادامدارعا دا جاساندى ينتەللەكتتى قولدانىپ، قالاي كىتاپ شىعارۋعا، پروەكت جاساۋعا جانە دە بيزنەستەگى رەسۋرستارىڭىزدى كوبەيتۋگە ارنالعان پروەكتتەردى جاسايمىن دەگەن جوسپارلارىم بار.
وقىرمان ءۇشىن بارىنشا قاراپايىم ءارى تۇسىنىكتى تىلمەن جازىلعان جيناققا الىپ بىرلەستىكتەر دە قىزىعۋشىلىق بىلدىرۋدە. سالا وكىلدەرى وقۋلىق بيزنەستە ءوز ءىسىن باستاپ، مول تابىسقا جەتۋدى ماقسات ەتكەن جاندارعا وتە قۇندى شىعارما دەپ باعالاپ وتىر.
چاد مورتون، جىلجىمايتىن مۇلىك اگەنتتىگىنىڭ باسشىسى:
- ءوز بيزنەسىڭىزدى دامىتىپ، كىرىسىڭىزدى كوبەيتكىڭىز كەلسە نەمەسە بيزنەستە دۇرىس قادام جاساپ جاتقانىڭىزعا كوز جەتكىزبەك بولساڭىز بۇل تاپتىرماس قۇرال، كەرەمەت رەسۋرس. اسىرەسە كاسىبىن قالاي باستاپ، دامىتۋدى بىلمەي جۇرگەن ادامدار ءۇشىن وتە قۇندى دۇنيە دەر ەدىم.
قازىر اناردىڭ اۆتورلىعىمەن جارىق كورگەن كىتاپتىڭ نەگىزىندە كومپانيالاردا بيزنەس ترەنينگتەر ۇيىمداستىرىلۋدا. وسىلايشا كاسىپكەرلىكتىڭ ءتۇرلى كەزەڭىن جان جاقتى تالداعان كىتاپتىڭ كۇن وتكەن سايىن اۋديتورياسى كەڭەيىپ، بيزنەس الەمىنە اياق باسقان ازاماتتار ءۇشىن تاپتىرماس ادىستەمەلىك قۇرالعا اينالىپ وتىر.
اۆتورى: ايجان سىدىقوۆا