ا ق ش- تا تورنادودان بەس ادام قازا تاپتى

استانا. KAZINFORM – ا ق ش- تىڭ ورتالىق شتاتتارىندا بولعان ونداعان تورنادو سالدارىنان كەم دەگەندە بەس ادام قازا بولدى، ونىڭ ىشىندە ءتورت ايلىق نارەستە بار، دەپ حابارلايدى BBC.

جۇما كۇنى باستالعان تورنادودان ون مىڭداعان تۇرعىن ەلەكتر قۋاتىنسىز قالدى.

ون شاقتى وكرۋگتە توتەنشە جاعداي جاريالاندى، وكلاحوما شتاتىندا ءتورت ادام قازا تاپتى.

ايوۆا شتاتىندا بەسىنشى ادام العان جاراقاتتارىنان قايتىس بولدى، دەپ حابارلادى جەرگىلىكتى ب ا ق.

ا ق ش ۇلتتىق اۋا رايى قىزمەتىنىڭ الدىن الا مالىمەتى بويىنشا، سەنبى كۇنى كەيبىر تورنادولاردىڭ ەكپىنى 218 ك م/ساع جەتكەن.

اسىرەسە وكلاحومانىڭ شىعىسىندا ورنالاسقان سالفەر قالاسى قاتتى زارداپ شەكتى. وقيعادان كەيىنگى ۆيدەودا قيراعان ۇيلەر مەن اۋدارىلعان كولىكتەر كورسەتىلگەن. مالىمەتتەرگە سايكەس، 100 گە جۋىق ادام جاراقات العان.

شتات گۋبەرناتورى كيەۆين ستيتت سالفەرگە بارىپ، مۇنداي اپات بيلىكتە قىزمەت ەتكەن التى جىل ىشىندە بولماعانىن ايتتى.

«قالانىڭ قالاي قيراعانىن ەلەستەتە دە المايسىز. قالا ورتالىعىنداعى بارلىق بيزنەس جويىلعان سياقتى»، - دەدى ول.

اق ءۇي ا ق ش پرەزيدەنتى دجو بايدەننىڭ كيەۆين ستيتتپەن سويلەسكەنىن جانە فەدەرالدى ۇكىمەتتىڭ تولىق قولداۋىن ۇسىنعانىن ايتتى.