ا ق ش- تا رەيستەر توقتاتىلعاننان كەيىن اۋە قاتىناسى قالپىنا كەلە باستادى

استانا. KAZINFORM - جۇما كۇنى ا ق ش فەدەرالدىق اۆياتسيا باسقارماسىنىڭ (FAA) جۇمىسىندا بولعان اۋقىمدى اقاۋدان كەيىن جەكسەنبى كەشكە قاراي ەلدەگى اۋە قاتىناسى بىرتىندەپ قالىپتى رەجيمگە ورالا باستادى، دەپ حابارلايدى Kazinform اگەنتتىگىنىڭ ۆاشينگتونداعى مەنشىكتى ءتىلشىسى CBS News باسىلىمىنا سىلتەمە جاساپ.

Фото: flight-report.com

FlightAware رەيستەردى باقىلاۋ سەرۆيسىنىڭ دەرەگىنە سۇيەنسەك، جۇما كۇنى 9159 رەيس توقتاتىلىپ، تاعى 7190 رەيس كەشىككەن. جەكسەنبىدە جاعداي بىرتىندەپ تۇزەلگەنىمەن، 1400 دەن استام رەيس ورىندالماي، 2200 گە جۋىق رەيس كەستەدەن كەشىگىپ ۇشقان.

ال ا ق ش كولىك ءمينيسترى شون داففي جەكسەنبى كۇنى دۇيسەنبىگە قاراي اۋە قاتىناسى تولىق قالپىنا كەلۋگە ءتيىس ەكەنىن ايتتى.

FAA جۇيەسىندەگى اقاۋعا ەسكىرگەن ينفراقۇرىلىم سەبەپ بولعان. الدىن الا مالىمەت بويىنشا، مىس سىمداردى تالشىقتى-وپتيكالىق كابەلدەرگە اۋىستىرۋ كەزىندە مەردىگەر L3Harris كومپانياسى مارشرۋتيزاتوردىڭ اقاۋىن انىقتاعان. بۇل وزگە قۇرىلعىلارعا شامادان تىس جۇكتەمە ءتۇسىرىپ، جۇيە جۇمىسىنىڭ بۇزىلۋىنا اكەلگەن. اقاۋ اۋە قوزعالىسىن باسقارۋ قىزمەتىنىڭ 17 نىسانىنا اسەر ەتكەن.

فەدەرالدىق اۆياتسيا باسقارماسىنىڭ باسشىسى برايان بەدفورد سىمداردى اۋىستىرۋ باسقارما بىرنەشە جىلدان بەرى جوسپارلى تۇردە جۇرگىزىپ كەلە جاتقان تەحنيكالىق جۇمىس ەكەنىن ايتتى. قازىر جۇيەنىڭ شامامەن 70 پايىزى مىس سىمداردىڭ ورنىنا تالشىقتى-وپتيكالىق كابەلدەرگە قوسىلعان.

سونداي-اق ا ق ش ىشكى قاۋىپسىزدىك ءمينيسترى ماركۆەين ماللين اقاۋعا كيبەرشابۋىل سەبەپ بولعانىن راستايتىن ەشقانداي بەلگى جوق ەكەنىن مالىمدەدى. بيلىك وكىلدەرىنىڭ حابارلاۋىنشا، اۋە قوزعالىسى ۋاقىتشا توقتاتىلعان كەزدە اسپاندا بولعان بارلىق ۇشاق اۋەجايلارعا امان-ەسەن قونعان.

FAA باسشىسى برايان بەدفورد رەيستەردى توقتاتۋ تۋرالى شەشىم قاۋىپسىزدىك ماقساتىندا قابىلدانعانىن اتاپ ءوتتى. ال L3Harris كومپانياسى وقيعانىڭ سەبەپتەرىن تەرگەۋ بارىسىندا باسقارماعا قولداۋ كورسەتىپ جاتقانىن مالىمدەدى.

بۇل جاعداي ا ق ش- تىڭ اۋە قوزعالىسىن باسقارۋ جۇيەسىن جاڭارتۋ ماسەلەسىن قايتا كوتەردى. كونگرەسس بۇل ماقساتقا 12,5 ميلليارد دوللار بولگەن.

سونداي-اق جۇما كۇنى كەشكە ترامپ اكىمشىلىگى اۋە قوزعالىسىن باسقارۋ جۇيەسىن قارجىلاندىرۋعا سۇراعان قاراجات كولەمىن 30 ميلليارد دوللارعا دەيىن ۇلعايتتى.

ا ق ش- تىڭ رەسمي وكىلدەرى اۋە قاتىناسىنىڭ قاۋىپسىز ەكەنىنە سەندىردى. سوعان قاراماستان، جولاۋشىلارعا رەيستەردىڭ جاي-كۇيىن اۋە كومپانيالارىنان الدىن الا ناقتىلاپ الۋ ۇسىنىلدى. Delta ،American Airlines جانە Southwest كومپانيالارى رەيستەردىڭ كەشىگۋى مەن ۇشۋ كەستەسىنىڭ وزگەرۋى جالعاسۋى مۇمكىن ەكەنىن حابارلاپ، بيلەتتەردى باسقا ۋاقىتقا قايتا برونداۋ مۇمكىندىگىن ۇسىندى. بيلىك پەن اۋە تاسىمالداۋشىلارىنىڭ بولجامىنشا، اقاۋدىڭ اسەرى تاعى بىرنەشە كۇنگە سوزىلۋى مۇمكىن.

بۇعان دەيىن بۇكىل ا ق ش اۋماعىندا بايلانىس ءۇزىلىپ ۇشاقتار ۇشپاي قالعانى حابارلانعان بولاتىن.