ا ق ش- تا 5 ادامدى ولتىرگەن قىلمىسكەر 190 جىلعا سوتتالدى

استانا. KAZINFORM - ءوزىن «بينارلى ەمەس» ادامدار ساناتىنا جاتقىزاتىن جاس جىگىت وسىدان ەكى جىل بۇرىن كولورادو شتاتىندا ل گ ب ت كلۋبىنا كەلۋشىلەردى اتىپ ولتىرگەن ەدى. ول سەيسەنبىدە ءومىر بويىنا باس بوستاندىعىنان ايىرۋ جازاسىنا كەسىلىپ، 190 جىلعا سوتتالدى، دەپ جازادى ВВС.

وسىلايشا 24 جاستاعى اندەرسون ولدريچ پوليتسيامەن كەلىسىمگە كەلىپ، ونداعان پۋنكت بويىنشا كىناسىن مويىندادى جانە بۇل وعان ءولىم جازاسىنان قۇتىلۋعا مۇمكىندىك بەردى.

سەيسەنبىدە ۇكىم جاريالانعان فەدەرالدى ءىس بولاتىن، ال شتات دەڭگەيىندەگى ءىس بويىنشا ولدريچ وتكەن جىلى تاعى دا وسىلاي تەرگەۋمەن كەلىسىم جاساپ، بەس ءومىر بويىنا باس بوستاندىعىنان ايىرۋ جازاسىن العان.

سۋديا شارلوتتا سۋيني ۇكىمدى جاريالاي وتىرىپ اندەرسون ولدريچتىڭ كلۋبقا كەلۋشىلەرگە «جىنىستىق وريەنتاتسياسىنا» بايلانىستى وق جاۋدىرعانىن مويىنداعانىن ەسكە سالدى.

اندەرسون ولدريچتىڭ ادۆوكاتتارىنىڭ ايتۋىنشا، ول ءوزىن «بينارلى ەمەس» (ادامداردىڭ قوس جىنىسقا قاتاڭ ءبولىنۋىن جوققا شىعاراتىن) تۇلعا سانايدى جانە ءوزىن قازىرگى اعىلشىن تىلىندە ادامنىڭ جىنىسى بەلگىسىز بولعان كەزدە قولدانىلاتىن «ولار» ەسىمدىگىمەن اتاعاندى ءجون كورەدى.

ولدريچتىڭ ءوزى كولورادو- سپرينگس قالاسىنداعى Q كلۋبىندا بىرنەشە رەت بولعان، ال 2022 -جىلدىڭ 19 -قاراشاسىندا بەس ادامدى اتىپ ءولتىرىپ، تاعى 19 ادامدى جاراقاتتادى.

ونى پوليتسيا كەلگەنگە دەيىن وسى كلۋب قوناعى، بۇرىنعى اسكەري ريچارد فيەررو جانە وعان كومەككە كەلگەن تاعى ەكى ادام توقتاتىپ ۇلگەردى.

سوتتا پروكۋرورلار ولدريچتىڭ بۇعان دەيىن ل گ ب ت قاۋىمداستىعىنداعى ادامدار مەن پوليتسيا جايىندا جەككورىنىشپەن ايتقانىن جەتكىزدى.

اۆتور

جانات قاپالبايەۆا