ادۆوكاتتارىنىڭ مالىمەتىنشە، كريستا پايك قىركۇيەك ايىنىڭ سوڭىندا جۇزەگە اسپاي قالعان ءولىم جازاسىنان كەيىن اۋرۋحانادا ەم قابىلداعان. قازىر ونىڭ جاعدايى تۇراقتانىپ، سوڭعى 30 جىلىن وتكىزگەن تۇرمەسىنە قايتارىلدى.
30-قىركۇيەكتە پايككە ءولىم جازاسىن ورىنداۋ ءۇشىن پەنتوباربيتال پرەپاراتى ەكى رەت ەنگىزىلگەن. الايدا ول ءتىرى قالىپ، اۋىر جاعدايدا اۋرۋحاناعا جەتكىزىلگەن.
وسى اپتانىڭ باسىندا ايەل ەسىن جيىپ، سويلەي باستاعان. بۇل جاعداي مەديتسينا قىزمەتكەرلەرىن، ساراپشىلار مەن ادۆوكاتتارىن تاڭعالدىرعان.
قورعاۋشىلارىنىڭ ايتۋىنشا، ەسىن جيعان كەزدە ونىڭ العاشقى سوزدەرى «مەن قايدامىن؟» جانە «ءسىز كىمسىز؟» دەگەن سۇراقتار بولعان.
- ول وسىنداي توتەنشە جاعدايدا وزىنە قامقورلىق كورسەتكەن شۇعىل قىزمەت ماماندارى مەن مەديتسينا قىزمەتكەرلەرىنە العىسىن بىلدىرەدى، - دەلىنگەن ادۆوكاتتارىنىڭ مالىمدەمەسىندە.
كريستا پايكتىڭ وقيعاسى بۇرىن-سوڭدى بولماعان جاعداي رەتىندە باعالانىپ وتىر. قولدا بار مالىمەتتەرگە سايكەس، ول ولىمگە اكەلەتىن ينەكسيا ارقىلى جازالاۋ ارەكەتىنەن امان قالعان جالعىز بەلگىلى ادام سانالادى.
سارسەنبى كۇنى وتكەن سوت وتىرىسىندا تەننەسسي شتاتى باس پروكۋرورىنىڭ كومەكشىسى ۋيلل ەيەرس كريستا پايككە قاتىستى ءولىم جازاسىنىڭ جاڭا كۇنى بەلگىلەنەتىنى ازىرگە بەلگىسىز ەكەنىن مالىمدەدى.
سونىمەن قاتار سۋديا تەننەسسي شتاتىنىڭ بيلىگىنە جۇزەگە اسپاي قالعان ءولىم جازاسىنا قاتىستى بارلىق دالەلدەمەنى ساقتاۋدى مىندەتتەدى. بۇل ماتەريالدار الداعى ۋاقىتتا شتاتقا قارسى سوت ءىسىن قوزعاۋعا نەگىز بولۋى مۇمكىن.
كريستا پايك 18 جاسىندا اۋىر قىلمىس جاساعانى ءۇشىن سوتتالعان. ول سول كەزدەگى جىگىتى تاداريل شيپپەن بىرگە 19 جاستاعى كوللين سلەممەردى ۇرىپ-سوعىپ، ازاپتاپ ولتىرگەن.
ولار تۇرمىسى تومەن وتباسىلاردان شىققان جاستارعا ارنالعان وقۋ ورتالىعىندا تانىسقان.
ايتا كەتەيىك، بۇعان دەيىن ا ق ش پرەزيدەنتى دونالد ترامپ سوڭعى 60 جىلدا العاش رەت اسكەري قىزمەتكەرگە قاتىستى ءولىم جازاسىن ورىنداۋدى ماقۇلداعان بولاتىن.