ا ق ش- تا ءبىر اي ىشىندە مىڭنان استام شەتەلدىك ستۋدەنتتىڭ ۆيزاسى جويىلدى

استانا. KAZINFORM - كوپتەگەن ستۋدەنت ۆيزالارىنىڭ جويىلۋىنا بايلانىستى ترامپ اكىمشىلىگىن سوتقا بەردى. بۇل تۋرالى انادولى حابارلادى.

 ا ق ش پرەزيدەنتى دونالد ترامپ اكىمشىلىگىنىڭ ۆيزالار مەن تۇرۋعا رۇقساتتاردى جويۋ شارالارى اياسىندا، پالەستينانى قولدايتىن ۋنيۆەرسيتەت ستۋدەنتتەرىن قوسا العاندا، ءبىر اي شاماسىندا مىڭنان استام شەتەلدىك ستۋدەنتتىڭ قۇقىقتىق مارتەبەسى مەن ۆيزالارى جويىلدى.

پالەستينانى قولداۋ ماقساتىندا ا ق ش- تا وتكەن نارازىلىقتارعا قاتىسقان شەتەلدىك ازاماتتاردىڭ، سونىڭ ىشىندە ستۋدەنتتەردىڭ ۆيزالارى مەن تۇرۋ رۇقساتتارىنىڭ جويىلۋى تۋرالى اقپاراتتار بۇقارالىق اقپارات قۇرالدارىندا كەڭىنەن جاريالانىپ جاتىر.

Associated Press (AP) اگەنتتىگى 160 ۋنيۆەرسيتەتتەن جيناعان دەرەكتەرگە سۇيەنە وتىرىپ جاساعان ەسەپكە سايكەس، ۆيزالاردى جويۋ شارالارى ا ق ش اۋماعىندا كەڭ كولەمدە جالعاسىپ جاتىر.

ۆيزاسى جويىلعان ستۋدەنتتەردىڭ اراسىندا ءۇندىستان مەن قىتاي ازاماتتارى ءجيى كەزدەسەدى، سونداي- اق گازاداعى شابۋىلدارعا قارسى شىققان شەتەلدىك ستۋدەنتتەر دە بار.

ناۋرىز ايىندا مىڭنان استام ستۋدەنتتىڭ ۆيزاسى مەن قۇقىقتىق مارتەبەسى جويىلدى. ولارعا بۇل تۋرالى ەلەكتروندىق پوشتا ارقىلى حابارلانعان.

ا ق ش- تا جۇزدەگەن ستۋدەنت ۆيزالارىنىڭ جويىلۋ قاۋپىمەن بەتپە-بەت كەلىپ وتىر. ۆيزاسى جويىلعان ستۋدەنتتەر ەلدەن شىعارىلۋى مۇمكىن.

ۆيزالارى جويىلعان ستۋدەنتتەر نە سەبەپتى مۇنداي شەشىم قابىلدانعانىن بىلە الماي وتىر.

كوپتەگەن ستۋدەن ترامپ اكىمشىلىگىن سوتقا بەردى.

فەدەرالدىق سۋديا دارتمۋت ۋنيۆەرسيتەتىنىڭ دوكتورانتى شياوتيان ءليۋدىڭ قۇقىقتىق مارتەبەسىن قالپىنا كەلتىرۋ ءۇشىن ۆيزانى جويۋعا ۋاقىتشا تىيىم سالۋ تۋرالى شەشىم شىعاردى.

مونتانا شتاتى ۋنيۆەرسيتەتىنىڭ ەكى ستۋدەنتىنىڭ دە ۆيزاسى جويىلعان ەدى، ءبىراق سوت شەشىمىنەن كەيىن ولاردىڭ قۇقىقتىق مارتەبەسى قالپىنا كەلتىرىلىپ، ەلدەن شىعارىلۋ قاۋپى جويىلدى.

30 -قاڭتاردا ا ق ش پرەزيدەنتى دونالد ترامپ «انتيسەميتيزمگە قارسى كۇرەس» تۋرالى جارلىققا قول قويدى. بۇل قۇجات پالەستينانى قولداعان شەرۋلەرگە قاتىسقان ستۋدەنتتەردى ەلدەن شىعارۋعا مۇمكىندىك بەردى.

27- ناۋرىزدا ا ق ش مەملەكەتتىك حاتشىسى ماركو رۋبيو «حاماس- تى قولدايدى» دەگەن ايىپپەن 300-دەن استام شەتەلدىك ستۋدەنتتىڭ ۆيزاسى جويىلعانىن مالىمدەدى.

25 -ناۋرىز كەشكىسىن ماسساچۋسەتس شتاتىنداعى ۇيىنەن اۋىزاشارعا بارا جاتقان كەزدە فيلوسوفيا دوكتورانتى ريۋمەيسا وزتۇرىكتى يمميگراتسيا جانە كەدەن قىزمەتىنىڭ (ICE) ازاماتتىق كيىمدەگى قىزمەتكەرلەرى ۇستاپ الىپ كەتكەن.