عالىمنىڭ قازاسى تۋرالى قارالى حاباردى كاليفورنياداعى MCC East Bay مۇسىلمان قاۋىمداستىق ورتالىعى مەن شەتەلدەگى وتاندىق زەرتتەۋشىلەردىڭ باسىن قوساتىن QIST (قازاق حالىقارالىق عىلىم مەن تەحنولوگيالار قاۋىمداستىعى) رەسمي تۇردە راستاپ، مارقۇمنىڭ وتباسى مەن جاقىندارىنا تەرەڭ قايعىرىپ كوڭىل ايتتى.
مانات ماۋلەنباي ۇلى قىتايدىڭ شينجاڭ-ۇيعىر اۆتونوميالىق اۋدانىنا قاراستى التاي ايماعىنىڭ بۋىرشىن اۋدانىندا دۇنيەگە كەلگەن ەتنيكالىق قازاق. ول 1983 -جىلى شينجاڭ ۋنيۆەرسيتەتىنىڭ فيزيكا فاكۋلتەتىن ءتامامداپ، قىتاي عىلىم اكادەمياسىنىڭ شينجاڭداعى فيليالىندا عىلىمي قىزمەتكەر بولىپ جۇمىس ىستەگەن. جاس عالىمنىڭ الەۋەتىن بايقاعان نوبەل سىيلىعىنىڭ لاۋرەاتى، ماسساچۋسەتس تەحنولوگيالىق ينستيتۋتىنىڭ (MIT) پروفەسسورى سەميۋەل تينگ ونى كۆانتتىق فيزيكا سالاسىنداعى حالىقارالىق زەرتتەۋ توبىنا شاقىرادى.
1988 -جىلى شۆەيتسارياعا قونىس اۋدارعان عالىم جەنيەۆا قالاسىنداعى ەۋروپالىق يادرولىق زەرتتەۋلەر ۇيىمىندا (CERN) ۇلكەن ادروندى كوللايدەردەگى ىرگەلى زەرتتەۋلەرگە قاتىسىپ، سيۋريحتەگى شۆەيتساريا جوعارى تەحنيكالىق مەكتەبىندە (ETH Zurich) قىزمەت اتقاردى. وسى ەلدە كۆانتتىق ەلەكتروديناميكا جانە اتوم فيزيكاسى باعىتىندا دوكتورلىق (Ph.D) ديسسەرتاتسياسىن قورعادى.
1995 -جىلدان باستاپ ا ق ش- قا قونىس اۋدارىپ، ونكولوگيا فيزيكاسىنا بەت بۇردى. ول Reflection Medical كومپانياسىندا باس ينجەنەر قىزمەتىن اتقارىپ، وكپە وبىرىن لازەر ساۋلەسى ارقىلى ەمدەۋگە ارنالعان تەحنولوگيالاردى ازىرلەۋگە اتسالىستى. ال 2025 -جىلى ارىپتەستەرىمەن بىرگە جاساندى ينتەللەكت پەن مەديتسينالىق سكانەرلەۋدى ۇشتاستىراتىن AIxSCAN ستارتاپىنىڭ نەگىزىن قالادى. بۇل جوبا وكپە وبىرىن ەرتە كەزەڭدە جوعارى دالدىكپەن انىقتاپ، مىڭداعان ادامنىڭ ءومىرىن ساقتاپ قالۋعا باعىتتالعان بولاتىن. ونىڭ بۇل باعىتتاعى عىلىمي ەڭبەكتەرى مەن پاتەنتتەرى ءومىرىنىڭ سوڭعى كۇندەرىنە دەيىن حالىقارالىق بازالاردا جاڭادان تىركەلىپ جاتتى.
مانات ماۋلەنباي ۇلىنىڭ حالىقارالىق عىلىم مەن يننوۆاتسياعا قوسقان وراسان زور ۇلەسى مەن ارتىندا قالدىرعان وشپەس مۇراسى كەلەسى بۋىن زەرتتەۋشىلەرى ءۇشىن ءارقاشان جارقىن ۇلگى بولىپ قالا بەرمەك.
اۆتورى: باقىتجول كاكەش