يللينويس شتاتىنداعى 102 وكرۋگتىڭ 33 ءى چيكاگو ورنالاسقان كۋك وكرۋگىنەن ءبولىنۋ ماسەلەسى بويىنشا مىندەتتى كۇشى جوق رەفەرەندۋم وتكىزدى. تاعى 11 وكرۋگ بۇل ماسەلەنى الداعى ارالىق سايلاۋدا داۋىسقا سالماق.
Illinois Separation ناۋقانىنىڭ مالىمەتىنشە، رەفەرەندۋم وتكىزگەن 33 وكرۋگتىڭ بارلىعى كۋك وكرۋگىن قوسپاي، ا ق ش- تاعى 51-شتاتتى قۇرۋدى قولداپ داۋىس بەرگەن.
ءبولىنۋدى جاقتاۋشىلار شتات بيلىگى اۋىلدىق ايماقتاردىڭ ماسەلەلەرىنە جەتكىلىكتى كوڭىل بولمەيدى دەپ سانايدى. ولار چيكاگونىڭ يللينويس ساياساتىنا ىقپالىن، دەموكراتتاردىڭ بيلىگىن جانە قىلمىس دەڭگەيىنىڭ جوعارىلىعىن سىنعا الادى. Illinois Separation ۇيىمىنىڭ جەتەكشىسى لورەت نيۋليننىڭ ايتۋىنشا، تۇرعىندار ءوز مۇددەسى ەسكەرۋسىز قالىپ وتىر دەپ ەسەپتەيدى.
وكرۋگتەردىڭ باسىم بولىگى رەسپۋبليكاشىلداردى قولداعانىمەن، شتات حالقىنىڭ كوبى دەموكراتتار باسىم قالالاردا تۇرادى. كۋك وكرۋگىندە حالىقتىڭ 41 پايىزى، ال كورشىلەس ءتورت ءىرى وكرۋگتە تاعى 22 پايىزى شوعىرلانعان. دەموكرات گۋبەرناتور دجەي پريتتسكەر بۇل باستامانى ساياسي ايلا دەپ اتاپ، شتاتتىڭ بولىنبەيتىنىن مالىمدەدى.
جاڭا شتات قۇرۋ ءۇشىن الدىمەن يللينويس زاڭ شىعارۋشى ورگانىنىڭ، كەيىن ا ق ش كونگرەسىنىڭ ماقۇلداۋى قاجەت. شتاتتىڭ زاڭ شىعارۋشى ورگانىنىڭ ەكى پالاتاسىندا دا دەموكراتتار باسىم بولعاندىقتان، بۇل باستامانىڭ جۇزەگە اسۋى ەكىتالاي. دەگەنمەن ونى قولداۋشىلار باتىس ۆيردجينيا مەن مەن شتاتتارىنىڭ قۇرىلۋ تاريحىن مىسالعا كەلتىرىپ، مۇنداي قادامنىڭ مۇمكىن ەكەنىن العا تارتادى.
1960-1970-جىلدارى يللينويس شتاتىنان ءبولىنۋ ارەكەتتەرى جاسالىپ، 16 وكرۋگ «فورگوتتونيا رەسپۋبليكاسىن» قۇرۋدى قولدادى. باستاما جۇزەگە اسپاسا دا، ينفراقۇرىلىم مەن قارجى تاپشىلىعىنا نازار اۋدارىپ، جولداردى جوندەۋگە، كوپىرلەر سالۋعا جانە تەمىرجول قاتىناسىن قالپىنا كەلتىرۋگە ىقپال ەتتى.
بۇعان دەيىن ترامپ كانادانىڭ ا ق ش قۇرامىنا قوسىلاتىنىنا سەنىمدى ەكەنىن مالىمدەگەنىن حابارلاعان ەدىك.