ا ق ش سوتى ترامپتىڭ ۋنيۆەرسيتەتتەرگە قارجىلاي شەكتەۋىن زاڭسىز دەپ تانىدى
استانا. KAZINFORM - ا ق ش- تىڭ بوستون قالاسىنداعى سوت دونالد ترامپتىڭ ۋنيۆەرسيتەتتەرگە ۇلتتىق عىلىمي قوردان (NSF) تولەمدەردى شەكتەۋ ساياساتىن زاڭسىز دەپ تانىدى، دەپ جازدى DW.
ماسساچۋسەتس شتاتىنىڭ فەدەرالدى وكرۋگتىك سوتىنىڭ سۋدياسى ينديرا تالۆاني بيىل مامىردا قابىلدانعان ۇلتتىق عىلىمي قورىنىڭ ساياساتىن جارامسىز دەپ تاپتى. بۇل ساياسات ۋنيۆەرسيتەتتەرگە گرانتتىق زەرتتەۋلەرگە جاناما قاتىسى بار اكىمشىلىك جانە ماتەريالدىق شىعىندار ءۇشىن وتەماقى الۋ مۇمكىندىگىن شەكتەيتىن ەدى. بۇل تۋرالى 20 -ماۋسىم كۇنى Reuters جانە Bloomberg اگەنتتىكتەرى حابارلادى.
وسى شەشىم ارقىلى سوت ا ق ش-تىڭ بۇرىنعى پرەزيدەنتى دونالد ترامپ اكىمشىلىگىنىڭ ۋنيۆەرسيتەتتەرگە مەملەكەتتىك قولداۋدى قىسقارتۋ ارەكەتىنە تاعى ءبىر زاڭدى توسقاۋىل قويدى. سۋديا تالۆاني ترامپ ۇكىمەتىنىڭ بۇل ارەكەتىن «ەركىن جانە نەگىزسىز» دەپ اتادى.
بۇعان دەيىن NSF رەسپۋبليكاشىل اكىمشىلىكتىڭ باسىمدىقتارىنا سايكەس كەلمەيتىن جۇزدەگەن گرانتتى توقتاتقان. سونداي-اق، گارۆارد سەكىلدى بەدەلدى ۋنيۆەرسيتەتتەرگە ميللياردتاعان دوللار مەملەكەتتىك قارجىلاندىرۋدى تولەمەۋ تۋرالى شەشىم قابىلدانعان ەدى.
سوت گارۆارد ۋنيۆەرسيتەتىنە شەتەلدىك ستۋدەنتتەردى قايتا قابىلداۋعا رۇقسات بەردى
بۇعان دەيىن بوستونداعى فەدەرالدى سوت ترامپتىڭ گارۆارد ۋنيۆەرسيتەتىنە شەتەلدىك ستۋدەنتتەردى قابىلداۋعا تىيىم سالۋ شەشىمىن بەلگىسىز مەرزىمگە توقتاتقان. مۇنداي ۇكىمدى 29 -مامىردا بۇرىنعى پرەزيدەنت باراك وباما تاعايىنداعان سۋديا ەلليسون بەرروۋز شىعارعان. ول بۇل شەشىم «قالىپتاسقان جاعدايدى ساقتاۋعا كومەكتەسەدى» دەپ مالىمدەگەن.
20- ماۋسىمدا بەرروۋز بۇل ۋاقىتشا تىيىمنىڭ مەرزىمىن تاعى دا ۇزارتتى.
Politico: ا ق ش-تا ستۋدەنتتىك ۆيزالار بويىنشا سۇحباتتار توقتاتىلۋى مۇمكىن
مامىر ايىنىڭ سوڭىندا Politico باسىلىمى ترامپ اكىمشىلىگىنىڭ ستۋدەنتتىك ۆيزا الۋ ءۇشىن جاڭا سۇحباتتاردى ۋاقىتشا توقتاتۋ تۋرالى بۇيرىق بەرگەنىن جازدى. باسىلىمنىڭ دەرەگىنشە، ا ق ش بيلىگى ستۋدەنتتىك ۆيزا العىسى كەلەتىن ۇمىتكەرلەردىڭ الەۋمەتتىك جەلىلەرىن كەڭىنەن تەكسەرۋ مۇمكىندىگىن قاراستىرماق.
Politico مالىمەتى بويىنشا، بۇل شارالار - ا ق ش-قا وقۋعا كەلگىسى كەلەتىن بارلىق ۇمىتكەرلەردىڭ الەۋمەتتىك جەلى اككاۋنتتارىن مىندەتتى تۇردە تەكسەرۋگە باعىتتالعان «ايتارلىقتاي كەڭەيتىلگەن» شارالار بولماق.
ا ق ش- تىڭ مەملەكەتتىك حاتشىسى ماركو رۋبيو ءتيىستى قۇجاتقا قول قويعان دەپ كورسەتىلگەن.
ەسكە سالا كەتەيىك، بۇعان دەيىن گارۆارد ۋنيۆەرسيتەتى دونالد ترامپ اكىمشىلىگىنىڭ وعان شەتەلدىك ستۋدەنتتەردى قابىلداۋعا تىيىم سالۋ شەشىمىنە قارسى شىققان ەدى. ەلدىڭ ەڭ كونە جانە ەڭ بەدەلدى ۋنيۆەرسيتەتىنىڭ اكىمشىلىگى جۇما كۇنى ۇلتتىق قاۋىپسىزدىك مينيسترلىگى شەتەلدىك ستۋدەنتتەردى وقىتۋ قۇقىعىنان ايىرعانى تۋرالى مالىمەت جاريالانعان سوڭ 24 ساعاتتان كەيىن ترامپ اكىمشىلىگىنە قارسى سوتقا شاعىم ءتۇسىردى.
ترامپ گارۆارد ۋنيۆەرسيتەتىنىڭ اۋزىنان جىرعان قارجىنى كاسىپتىك مەكتەپتەرگە بەرمەكشى ەكەنى ايتىلدى.
بۇگىنگى تاڭدا قازاقستاننان «بولاشاق» باعدارلاماسى بويىنشا گارۆاردتا 7 ادام ءبىلىم الىپ جاتىر.