لوس-اندجەلەس فەدەرالدىق سوتى داماسك ورتالىق تۇرمەسىنىڭ بۇرىنعى باستىعى سامير ۋسمان اش-شەيحتى 60 جىلعا باس بوستاندىعىنان ايىردى. بۇل تۋرالى SANA اگەنتتىگى ا ق ش ادىلەت مينيسترلىگىنە سىلتەمە جاساپ حابارلايدى.
اش-شەيح 2005-2008-جىلدارى سيريا پرەزيدەنتى باشار اسادتىڭ بيلىگى تۇسىندا ادرا تۇرمەسىن باسقارعان.
تەرگەۋ مالىمەتتەرىنە سايكەس، ول سيريا بيلىگىنە قارسى شىققانداردى باسۋ ءۇشىن قىزمەتكەرلەرىنە تۇتقىندارعا فيزيكالىق جانە پسيحولوگيالىق زورلىق كورسەتۋگە بۇيرىق بەرىپ، كەي جاعدايلاردا ازاپتاۋ ارەكەتتەرىنە ءوزى دە قاتىسقان.
ناۋرىز ايىندا القابيلەر 74 جاستاعى اش-شەيحتى ازاپتاۋعا قاتىستى ءسوز بايلاسۋ جانە ازاپتاۋدىڭ ءۇش دەرەگى بويىنشا كىنالى دەپ تانىعان. سوتتا بۇرىنعى ءۇش تۇتقىن تۇرمەدە وزدەرىنە جانە باسقا دا تۇتقىندارعا جاسالعان زورلىق-زومبىلىقتى باياندادى.
ول سونداي-اق يمميگراتسيالىق الاياقتىق جاساعانى ءۇشىن دە كىنالى دەپ تانىلدى. 2020-جىلى ا ق ش- قا كەلگەن اش-شەيح ۆيزا جانە تۇرۋعا ىقتيارحات الۋ كەزىندە سيرياداعى قىزمەتى تۋرالى جاسىرعان. بۇدان بولەك امەريكا ازاماتتىعىن الۋعا ءوتىنىش بەرگەندە دە جالعان دەرەك ۇسىنعان.
پروكۋراتۋرا اش-شەيحتى كەمىندە 80 جىلعا باس بوستاندىعىنان ايىرۋدى سۇرادى. ال قورعاۋ تاراپى سوتتالۋشىنىڭ جاسى مەن دەنساۋلىق جاعدايىن ەسكەرە وتىرىپ، بەس جىلدىق جازا تاعايىنداۋدى تالاپ ەتتى. بۇعان دەيىن اش-شەيح ءوز كىناسىن مويىنداماعان.
ا ق ش ادىلەت مينيسترلىگى ونى سيريادان تىس جەردە جەكە سوتتالىپ، كىنالى دەپ تانىلعان باشار اساد ۇكىمەتىنىڭ بۇرىنعى ەڭ جوعارى لاۋازىمدى وكىلى دەپ اتادى.
ساۋىردە سيريا سوتى بۇرىنعى پرەزيدەنت باشار اساد پەن ونىڭ اعاسىنا قاتىستى ءىستى سىرتتاي قاراۋعا كىرىستى. تامىز ايىندا ەكس-پرەزيدەنتكە ءولىم جازاسى كەسىلدى.
بۇعان دەيىن سيريا دەموكراتيالىق كۇشتەرى ءوزىن تاراتاتىنىن مالىمدەگەنىن حابارلاعان بولاتىنبىز.