ا ق ش سوققىدان كەيىن يرانمەن كەزدەسۋگە دايىن - ماركو رۋبيو

استانا. KAZINFORM - مەملەكەتتىك حاتشى ماركو رۋبيو ا ق ش- تىڭ يراننىڭ ءۇش يادرولىق نىسانىن بومبالاعان سوڭ يرانمەن كەزدەسۋگە دايىن ەكەنىن مالىمدەدى، دەپ حابارلايدى CBS News.

رۋبيو «Face the Nation with Margaret Brennan» باعدارلاماسىندا سويلەگەن سوزىندە يراندى ديپلوماتيانى جالعاستىرۋعا شاقىرىپ، ا ق ش- تىڭ يرانعا قارسى بۇدان ءارى شابۋىل جاساۋ جوسپارى جوق ەكەنىن حابارلادى.

رۋبيونىڭ مالىمدەۋىنشە، ا ق ش ميسسياسى «يرانعا، يران حالقىنا شابۋىل جاساۋ ەمەس. بۇل رەجيمدى وزگەرتۋگە باعىتتالعان قادام بولعان جوق. بۇل قادام يادرولىق قارۋ جاساۋ امبيتسيالارىمەن بايلانىستى ءۇش يادرولىق نىساندى جويۋعا باعىتتالدى جانە ول كەشە ورىندالدى».

- ەندى نە بولاتىنى يراننىڭ ءارى قارايعى شەشىمىنە بايلانىستى بولادى. ولار ديپلوماتيا جولىن تاڭداسا، ءبىز دايىنبىز. ءبىز ولار ءۇشىن دە، يران حالقى ءۇشىن دە، الەم ءۇشىن دە ءتيىمدى مامىلە جاساي الامىز. ەگەر ولار باسقا جولدى تاڭداسا، ونىڭ سالدارى بولادى، - دەپ حابارلادى ماركو رۋبيو.

رۋبيو پرەزيدەنت ترامپ ءالى دە ديپلوماتيالىق جولدى قولدايتىنىن ايتىپ، ا ق ش- تىڭ يراندى يادرولىق قارۋعا قاتىستى امبيتسيالارىنان باس تارتۋ تۋرالى كەلىسىمگە كەلۋگە يتەرمەلەگەنىن اتاپ ءوتتى.

- ەگەر ولار قوڭىراۋ شالىپ، «ءبىز كەزدەسىپ، سويلەسكىمىز كەلدى» دەسە، ءبىز سولاي ىستەۋگە دايىنبىز، - دەپ حابارلادى مەملەكەتتىك حاتشى.

سونىمەن بىرگە رۋبيو يرانعا ماڭىزدى ورمۋز بۇعازىن جابۋ يران رەجيمى ءۇشىن «وزىنە قول جۇمساۋ» ارەكەتى بولاتىنىن ەسكەرتتى.

- بۇل (يراننىڭ) ءوز- وزىنە قول جۇمساۋ ارەكەتى بولار ەدى، ويتكەنى مەنىڭ ويىمشا، ەگەر ولار مۇنى ىستەسە، بۇكىل الەم ولارعا قارسى شىعادى، - دەپ مالىمدەدى ماركو رۋبيو.

بۇعان دەيىن يراننىڭ سىرتقى ىستەر ءمينيسترى ماسكەۋگە كەلگەنىن جازعان بولاتىنبىز.