اركانزاس شتاتىنىڭ بۇرىنعى گۋبەرناتورى، رەسپۋبليكاشىلدار پارتياسىنان پرەزيدەنتتىككە ۇمىتكەرلەردىڭ ءبىرى ەيسا حاتچينسون سەيسەنبى كۇنى سايلاۋشىلاردىڭ جەتكىلىكتى قولداۋىنا يە بولا الماعاندىقتان سايلاۋالدى دودادان شىعىپ قالدى.
ساۋىردە 2024-جىلى رەسپۋبليكاشىلدار اتىنان كانديداتۋراسىن ۇسىناتىنىن جاريالاعان حاتچينسون ساۋالنامالاردا ەشقاشان ءبىر پايىزدىق تارماقتان جوعارى كوتەرىلمەدى جانە قىركۇيەكتەگى پارتيانىڭ ەكىنشى دەباتىنا وتپەدى.
حاتچينسون دونالد ترامپتىڭ كانديداتۋراسىنا قارسى شىعىپ، بۇرىنعى پرەزيدەنت 2021 -جىلى 6-قاڭتاردا ءوز جاقتاستارىنىڭ كاپيتوليگە جاساعان شابۋىلى ءۇشىن «ماڭىزدى جاۋاپكەرشىلىكتى» موينىنا الادى جانە قايتا پرەزيدەنت بولۋعا قۇقى جوق دەپ مالىمدەدى.
حاتچينسون 2015 -جىلدان باستاپ 2023 -جىلدىڭ باسىنا دەيىن اركانزاس گۋبەرناتورى قىزمەتىن اتقاردى. بۇعان دەيىن ول فەدەرالدى پروكۋرور بولدى، وكىلدەر پالاتاسىندا ءۇش مەرزىمگە سايلانىپ، دجوردج بۋش اكىمشىلىگىندە جوعارى لاۋازىمداردى اتقاردى.
ەستەرىڭىزگە سالا كەتەيىك، كەشە ا ق ش پرەزيدەنتتىگىنە رەسپۋبليكاشىلدار پارتياسىنان ۇمىتكەر ۆيۆەك راماسۆامي دە سايلاۋعا قاتىسۋدان باس تارتقان بولاتىن.
ا ق ش- تاعى سايلاۋ 2024 -جىلدىڭ 5-قاراشاسىنا بەلگىلەنگەن. دونالد ترامپقا پرەزيدەنتتىك سايلاۋعا قاتىسۋعا رۇقسات بەرىلدى. ميچيگان شتاتىنىڭ سوتى ونىڭ شتاتتاعى نەگىزگى بيۋللەتەندە قالۋى تۋرالى شەشىم شىعاردى.