ا ق ش گرەنلانديا مۇنايىنا كوز تىكتى

ا ق ش كومپانياسى بريتاندىق 80 Mile كومپانياسىمەن بىرلەسىپ، گرەنلاندياداعى ءىرى مۇناي كەن ورنىن يگەرۋگە كىرىسۋى مۇمكىن.

گرەنلانديا ۇكىمەتى مۇناي ءوندىرۋدىڭ ەكولوگياعا اسەرىنە الاڭداپ، 2021-جىلى مۇناي مەن گاز وندىرۋگە جاڭا رۇقسات بەرۋدى توقتاتتى. بۇعان دەيىن بەرىلگەن ليتسەنزيالار كۇشىندە، الايدا ءوندىرۋ ءۇشىن ۇكىمەتتىڭ قوسىمشا رۇقساتى قاجەت.

گرەنلانديانىڭ كاسىپكەرلىك جانە مينەرالدىق رەسۋرستار مينيسترلىگىنىڭ مالىمەتىنشە، 80 Mile كومپانياسىنا تيەسىلى 2015-جىلى ەكى، ال 2018-جىلى گرەنلانديانىڭ شىعىسىنداعى دجەيمسون-لەند اۋماعىندا مۇنايدى بارلاۋ جانە ءوندىرۋ ءۇشىن ءۇشىنشى رۇقسات العان. ال Greenland Energy كومپانياسى جوباعا ينۆەستور ءارى وپەراتور رەتىندە قاتىسۋ ءۇشىن بريتاندىق كومپانيامەن سەرىكتەستىك ورناتتى.

Greenland Energy كومپانياسىنىڭ باس ديرەكتورى روبەرت پرايستىڭ ايتۋىنشا، تاۋەلسىز ينجەنەرلىك ەسەپ بويىنشا، بۇرعىلاۋ جوسپارلانعان اۋماقتا 13 ميلليارد باررەلگە دەيىن مۇناي قورى بولۋى مۇمكىن.

پرايستىڭ سوزىنشە، ا ق ش- تىڭ شەتەلدەن مۇناي جەتكىزۋگە تاۋەلدى بولماۋى ءۇشىن ساياسي بايلانىسى جاقىن ەلدەردەن جاڭا مۇناي كوزدەرىن ىزدەۋ قاجەت.

ال گرەنلانديا ۇكىمەتىنىڭ مالىمەتىنشە، Jameson Land جوباسى ءالى بارلاۋ ساتىسىندا. قوعام مەن قورشاعان ورتاعا اسەرىن باعالاۋ قۇجاتتارى ماقۇلدانعاننان كەيىن عانا بۇرعىلاۋعا كىرىسۋگە بولادى.

بۇعان دەيىن ا ق ش، دانيا جانە گرەنلانديا ۆاشينگتوننىڭ ارالداعى اسكەري مۇمكىندىكتەرىن ەداۋىر ارتتىرۋعا جانە ا ق ش قارسىلاستارىنىڭ وندا اسكەري بازا سالۋىنا جول بەرمەۋگە قاتىستى كەلىسىمگە كەلگەنى حابارلانعان بولاتىن.