ا ق ش قىتاي مەن رەسەيدىڭ وزىق AI چيپتەرىنە قول جەتكىزۋىن شەكتەمەك: جاڭا ەرەجە نەنى وزگەرتەدى

استانا. KAZINFORM – ا ق ش قىتاي، رەسەي جانە يران سياقتى ءبىرقاتار ەلدەردىڭ وزگە مەملەكەتتەردە ورنالاسقان دەرەكتەر ورتالىقتارى ارقىلى ەڭ وزىق جاساندى ينتەللەكت چيپتەرىنە قول جەتكىزۋ مۇمكىندىگىن شەكتەيتىن جاڭا ەرەجە ازىرلەپ جاتىر. بۇل تۋرالى Euronews جازدى.

Фото: Kazinform\ЖИ

دۇيسەنبى كۇنى ا ق ش ساۋدا مينيسترلىگىنىڭ ونەركاسىپ جانە قاۋىپسىزدىك بيۋروسى (BIS) وزىق ەسەپتەۋ جۇيەلەرىنە، سونداي-اق سۋپەرينتەللەكت (SI) تەحنولوگيالارىنا ارنالعان چيپتەر مەن سەرۆەرلەرگە قاشىقتان قول جەتكىزۋدى رەتتەيتىن ۋاقىتشا تۇپكىلىكتى ەرەجەنى جاريالادى.

بيۋرو مالىمدەمەسىندە بۇلتتى ەسەپتەۋ تەحنولوگيالارى مەن سۋپەرينتەللەكت ينفراقۇرىلىمىنىڭ قارقىندى دامۋى ا ق ش-تىڭ وزىق ەسەپتەۋ قۋاتتارىن قاشىقتان پايدالانۋدى جەڭىلدەتكەنى ايتىلعان. مۇنداي مۇمكىندىك ءتىپتى ا ق ش-تىڭ ەكسپورتتىق شەكتەۋلەرى قولدانىلاتىن ەلدەردەن تىس ورنالاسقان دەرەكتەر ورتالىقتارى ارقىلى دا جۇزەگە اسىرىلىپ كەلگەن.

ا ق ش بۇعان دەيىن قىتايدىڭ جاساندى ينتەللەكت سالاسىنداعى باسەكەلەستىكتە باسىمدىققا يە بولۋىنا جول بەرمەۋ ماقساتىندا ەلگە ەڭ وزىق چيپتەردى ساتۋعا شەكتەۋ قويعان ەدى. بۇل شارا بۇرىنعى پرەزيدەنت دجو بايدەن تۇسىندا قابىلدانىپ، CHIPS زاڭىمەن بەكىتىلگەن.

الايدا كەيبىر ەلدەر امەريكالىق شەكتەۋلەردى اينالىپ ءوتۋ جولىن تاپقان. قىتاي كومپانيالارى Nvidia سياقتى وندىرۋشىلەردىڭ ەڭ وزىق چيپتەرىن تىكەلەي ساتىپ الا الماعانىمەن، ولاردى وڭتۇستىك-شىعىس ازيا ەلدەرىندەگى دەرەكتەر ورتالىقتارىنان جالعا الىپ پايدالانعان.

جاڭا ەرەجەگە سايكەس، شەتەلدىك دەرەكتەر ورتالىقتارى ءوز كليەنتتەرىنىڭ سەنىمدىلىگىن مىندەتتى تۇردە تەكسەرۋگە ءتيىس. بۇل شارا اتالعان ەلدەردەگى كومپانيالاردىڭ امەريكالىق چيپتەردى وزىق جاساندى ينتەللەكت مودەلدەرىن وقىتۋ ءۇشىن پايدالانۋ مۇمكىندىگىن شەكتەۋگە باعىتتالعان.

سونىمەن قاتار قىتاي، رەسەي جانە يران سياقتى تاۋەكەلى جوعارى ەلدەردە باس كەڭسەسى ورنالاسقان كومپانيالارعا ايتارلىقتاي كولەمدە ەسەپتەۋ قۋاتىن ۇسىناتىن شەتەلدىك دەرەكتەر ورتالىقتارىنىڭ قىزمەتىنە دە شەكتەۋلەر ەنگىزىلەدى.

جاڭا تالاپ 90 كۇننەن كەيىن كۇشىنە ەنەدى. ا ق ش اكىمشىلىگىنىڭ مالىمەتىنشە، كونتراباندا قاۋپى جوعارى ەلدەردەگى كومپانيالارعا وزىق چيپتەردى ەكسپورتتاۋ ءۇشىن ارنايى ليتسەنزيا تالاپ ەتىلەدى. ولاردىڭ قاتارىندا يندونەزيا، مالايزيا، سينگاپۋر، تايلاند جانە برازيليا بار.

بۇل شەكتەۋلەر Nvidia كومپانياسىنا قاتىستى تىڭشىلىق كۇدىگى تۋىنداعان تۇستا ەنگىزىلىپ وتىر. امەريكالىق تەرگەۋشىلەر سينگاپۋردىڭ Megaspeed بۇلتتى قىزمەتتەر كومپانياسى قىتايداعى كليەنتتەرىنە ەكسپورتتىق باقىلاۋعا جاتاتىن Nvidia چيپتەرىن الۋعا كومەكتەستى مە دەگەن ماسەلەنى تەكسەرگەن.

Nvidia كومپانياسىنىڭ نەگىزىن قالاۋشىلاردىڭ ءبىرى دجەنسەن حۋانگ وتكەن اپتادا باس ديرەكتور قىزمەتىنەن كەتكەن بولاتىن. بۇعان ونىڭ Megaspeed كومپانياسىنىڭ بۇرىنعى باسشىسى ەليس حۋانگپەن نەكەدەن تىس قارىم-قاتىناستا بولعانىن مويىنداۋى سەبەپ بولعان. ەليس حۋانگ قىتاي مۇددەسى ءۇشىن تىڭشىلىق جاسادى دەگەن كۇدىككە ىلىنگەن. الايدا ونىڭ دجەنسەن حۋانگپەن تۋىستىق بايلانىسى جوق.

ءوز كەزەگىندە Megaspeed كومپانياسى قىتايعا چيپ جەتكىزدى دەگەن ايىپتاۋلاردى جوققا شىعاردى.

ا ق ش-تىڭ بۇل قادامى پرەزيدەنت دونالد ترامپتىڭ قىتايعا جوسپارلانعان ساپارى قارساڭىندا جاسالىپ وتىر. ساپار اياسىندا ەكونوميكالىق سامميت ءوتىپ، امەريكالىق كوشباسشى قىتاي ءتوراعاسى شي جينپيڭمەن كەزدەسەدى.