ا ق ش قازاقستاننان 49 جىلعا جەر تەلىمىن جالعا الادى - سەنات زاڭدى ماقۇلدادى
استانا. KAZINFORM - سەنات «قازاقستان رەسپۋبليكاسىنىڭ ۇكىمەتى مەن ا ق ش ۇكىمەتى اراسىنداعى الماتى قالاسىندا ا ق ش- تىڭ كونسۋلدىق مەكەمەسىن سالۋعا جەر ۋچاسكەسىن جالعا بەرۋ تۋرالى كەلىسىمدى راتيفيكاتسيالاۋ تۋرالى» زاڭدى ماقۇلدادى.
- اتالعان كەلىسىم مەملەكەت باسشىسىنىڭ بىرىككەن ۇلتتار ۇيىمىنىڭ 74- سەسسياسىنا قاتىسۋ قورىتىندىسى بويىنشا بەرگەن تاپسىرماسىن ىسكە اسىرۋ ماقساتىندا ازىرلەندى. قۇجات شەڭبەرىندە ا ق ش ۇكىمەتىنە الماتى قالاسىندا كونسۋلدىق مەكەمە عيماراتتارىن سالۋ ءۇشىن 70593 شارشى مەتر جەر ۋچاسكەسى 49 جىل مەرزىمگە جالعا بەرىلەدى. بۇل شەشىم حالىقارالىق ديپلوماتيالىق تاجىريبەگە تولىقتاي ساي كەلەدى. ماسەلەن، كورەي حالىق دەموكراتيالىق رەسپۋبليكاسى ەلشىلىگىنە ۇلى بريتانيادا جانە ا ق ش كونسۋلدىعىنا گونكونگتا 999 -جىلعا جالعا جەر بەرىلگەن. بۇل سەرىكتەستىك قاتىناستاردىڭ ۇزاقمەرزىمدىلىگى مەن سەنىمگە نەگىزدەلگەن قالىپتى پراكتيكا، - دەدى سەنات دەپۋتاتى امانگەلدى نۇعمانوۆ سەنات وتىرىسىندا.
سەناتوردىڭ مالىمدەۋىنشە، الماتى قالاسىنداعى باس كونسۋلدىقتىڭ اۋماعىندا ا ق ش- تىڭ ەسىرتكىمەن كۇرەس اگەنتتىگى، قازاقستان رەسپۋبليكاسىنداعى ساۋدا مينيسترلىگىنىڭ وكىلدىگى كىرەدى.
ونىڭ نەگىزگى مىندەتى - امەريكالىق كومپانيالاردىڭ قازاقستاندىق نارىققا شىعۋىنا جاردەمدەسۋ، سونداي-اق ا ق ش پەن قازاقستان اراسىنداعى ساۋدا-ەكونوميكالىق ىنتىماقتاستىقتى دامىتۋ.
- كەلىسىم بويىنشا جەر ۋچاسكەسىن بەرۋ ءتارتىبى مەن شارتتارى ناقتى بەلگىلەنگەن. جالعا الۋ مەرزىمى ءۇشىن جالداۋ اقىسى 25 ميلليون ا ق ش دوللارىن قۇرايدى جانە بۇل سوما كەلىسىم كۇشىنە ەنگەن كۇننەن باستاپ 30 كۇن ىشىندە بىردەن تولەيدى. سونىمەن قاتار ا ق ش ۇكىمەتى جەر ۋچاسكەسى مەن كونسۋلدىق عيماراتقا قاتىستى بارلىق سالىق پەن باسقا دا تولەمدەردەن بوساتىلادى. سونداي-اق كونسۋلدىق عيماراتتىڭ قۇرىلىسىنا، ونىڭ كۇتىمى مەن جوندەۋىنە، بايلانىس قىزمەتى مەن ەلەكتر، گاز، سۋ، جىلۋ جانە باسقا دا كوممۋنالدىق قىزمەتكە قاتىستى بارلىق شىعىن ا ق ش ۇكىمەتىنىڭ ەسەبىنەن جۇزەگە اسىرىلادى. كونسۋلدىقتى جابدىقتاۋ مەن جيھازداۋ ءۇشىن ا ق ش ۇكىمەتى يمپورتتايتىن بارلىق ماتەريال مەن تاۋار كەدەندىك تولەمدەردەن، يمپورت سالىعىنان جانە رۇقسات الۋعا قاتىستى تالاپتاردان بوساتىلادى، - دەيدى ول.
ودان بولەك، تاراپتار اراسىنداعى كەلىسىمگە سايكەس، قۇجات راتيفيكاتسيالانعاننان كەيىن ا ق ش تاراپى قازاقستان رەسپۋبليكاسىنىڭ حيۋستون قالاسىندا باس كونسۋلدىق اشۋىنا رۇقسات بەرەدى.
- حيۋستون - جاساندى ينتەللەكتتى پايدالانا وتىرىپ شەشىمدەر ازىرلەيتىن جەتەكشى تەحنولوگيالىق كومپانيالار مەن ستارتاپتاردىڭ ورتالىعى، سونداي-اق يننوۆاتسيا، ەنەرگەتيكا جانە مەديتسينا سالاسىندا ۇلكەن مۇمكىندىكتەرگە يە قالا. حيۋستوندا كونسۋلدىق اشۋ ا ق ش- پەن ينۆەستيتسيالىق جانە ەكونوميكالىق ىنتىماقتاستىقتى نىعايتۋعا مۇمكىندىك بەرەدى، سونداي-اق قازاق دياسپوراسى ءۇشىن كونسۋلدىق جانە نوتارياتتىق قىزمەتتەرگە قولجەتىمدىلىكتى ارتتىرادى. الماتىداعى ا ق ش باس كونسۋلدىعى ورتالىق ازياداعى ەڭ ءىرى ۆيزالىق ورتالىققا اينالادى. بۇل قازاقستاننىڭ ينۆەستيتسيالىق تارتىمدىلىعىن ارتتىرىپ، تىكەلەي شەتەلدىك ينۆەستيتسيانى تارتۋعا، جاڭا جۇمىس ورىندارىن قۇرۋعا جانە بيزنەس پەن قىزمەت كورسەتۋ سالاسىنىڭ دامۋىنا ىقپال ەتەدى، - دەپ تولىقتىردى دەپۋتات.
سونداي-اق سەناتور كەلىسىمدى راتيفيكاتسيالاۋ حالىقارالىق سەرىكتەستەردىڭ ەلىمىزگە دەگەن سەنىمى ارتاتىنىن ايتىپ وتىر.
ەسكە سالايىق، بيىل ناۋرىزدا ءماجىلىس ا ق ش- قا الماتىدا كونسۋلدىق عيمارات سالۋعا 49 جىلعا جالعا جەر بەرۋ تۋرالى زاڭ جوباسىن قابىلدادى.