ا ق ش- قا تىكەلەي رەيستىڭ اشىلۋى تالاپقا ساي ۇشاقتىڭ بولۋىنا بايلانىستى - پيتەر فوستەر

الماتى. قازاقپارات - Air Astana توبىنىڭ پرەزيدەنتى پيتەر فوستەر قازاقستاندىق اۋە كومپانيانىڭ ا ق ش- قا تىكەلەي رەيس اشۋعا قانشالىقتى دايىن ەكەنىن ايتتى.

Kazinform ءتىلشىسى Air Astana اۋە كەمەلەرى مۇحيت اسىپ ا ق ش-قا ۇشۋىنا قانشالىقتى دايىن ەكەنىن سۇرادى.

- بۇل 787 Boeing اۋە كەمەسىنىڭ جەتكىزىلۋىنە بايلانىستى. وزدەرىڭىز بىلەتىندەي، Boeing كومپانياسىنىڭ جەتكىزۋ قىزمەتى كۇنى كەشە اياقتالعان ەرەۋىلدەن زارداپ شەكتى. سوندىقتان ايتىلعان اۋە كەمەسى 2025 -جىلدىڭ اياعى نە 2026 باسىنان ەرتە جەتكىزىلۋى ەكىتالاي. وسىنى ەسكەرە وتىرىپ، ا ق ش- قا تىكەلەي رەيستەردىڭ اشىلۋى تالاپقا ساي ۇشاقتىڭ بولۋىنا بايلانىستى دەپ ايتا الامىن، - دەدى كومپانيا پرەزيدەنتى.

سونداي-اق، پيتەر فوستەر بولجامداعى اۋە باعىتىنىڭ باعاسى تۋرالى ايتتى.

- ءبىز بۇل باعىتتاعى رەيستىڭ باعاسىن ءالى ەسەپتەمەدىك، سەبەبى بۇل الىس جوسپار. 787 Boeing اۋە كەمەسىنىڭ جەتكىزىلۋىنىڭ ناقتى ۋاقىتى بەلگىلى بولعان كەزدە ءبىز باعا تۋرالى شەشىم قابىلداي الامىز. ارينە، ا ق ش تىكەلەي رەيسىنە سۇرانىس بار جانە تەك قازاقستان تاراپىنان عانا ەمەس، جالپى ورتالىق ازيادان بار. ناقتى ايتارىم، ا ق ش-تان بۇرىن 2026 -جىلدىڭ ناۋرىزىندا توكيوعا رەيس اشىلادى، - دەدى ول.

اۆتور
دوسبول اتاجان