ا ق ش- قا الماتىدان 49 جىلعا 70 مىڭ شارشى مەتر جەر جالعا بەرىلەدى
استانا. KAZINFORM - قازاقستان ۇكىمەتى امەريكا قۇراما شتاتتارىنا 49 جىل مەرزىمگە جاڭا امەريكا كونسۋلدىعىن سالۋ ءۇشىن اۋدانى 70 مىڭ شارشى مەتردەن اساتىن الماتىداعى جەر ۋچاسكەسىن جالعا بەرەدى، دەپ حابارلايدى inbusiness.kz سايتى.
«قوسا بەرىلىپ وتىرعان قازاقستان رەسپۋبليكاسىنىڭ ۇكىمەتى مەن امەريكا قۇراما شتاتتارىنىڭ ۇكىمەتى اراسىنداعى امەريكا قۇراما شتاتتارىنىڭ ۇكىمەتىنە الماتى قالاسىنداعى امەريكا قۇراما شتاتتارىنىڭ كونسۋلدىق مەكەمەسىنىڭ عيماراتىن سالۋ ءۇشىن جەر ۋچاسكەسىن جالعا بەرۋ تۋرالى كەلىسىمنىڭ جوباسى ماقۇلدانسىن»، - دەلىنگەن قازاقستان مينيسترلەر كابينەتىنىڭ قاۋلىسىندا.
قۇجاتقا سايكەس، ا ق ش كەلەسى كوشەلەر اراسىندا ورنالاسقان اۋدانى 70593 شارشى مەتر جەر ۋچاسكەسىن جالعا الادى: جاماقايەۆ كوشەسى، ءال-فارابي داڭعىلى، سەيفۋللين داڭعىلى، الدار كوسە كوشەسى. كونسۋلدىق مەكەمەنىڭ عيماراتىن سالۋ جانە پايدالانۋ ءۇشىن جەر ۋچاسكەسىن جالداۋ شارتى جاسالعان كۇننەن باستاپ 49 جىل مەرزىمگە بەرىلەدى. ايتا كەتەتىنى جالداۋ مەرزىمى تاعى 49 جىلعا ۇزارتىلۋى مۇمكىن.
«باستاپقى 49 جىلدىق جالداۋ مەرزىمى ءۇشىن جانە ودان كەيىنگى بارلىق 49 جىلدىق ۇزارتۋ كەزەڭدەرى ءۇشىن (جالپى ۇزاقتىعى شەكتەۋسىز) جالداۋ اقىسىنىڭ مولشەرى 25301016 دوللاردى قۇرايدى جانە وسى كەلىسىم كۇشىنە ەنگەن كۇننەن باستاپ 30 كۇنتىزبەلىك كۇن ىشىندە ءبىرىڭعاي تولەممەن تولەنەتىن بولادى»، - دەلىنگەن قۇجاتتا.