ا ق ش كونگرەسى تيكتوكقا تىيىم سالاتىن زاڭ جوباسىن ماقۇلدادى

استانا. KAZINFORM – ا ق ش كونگرەسىنىڭ وكىلدەر پالاتاسى قىتايلىق TikTok موبيلدى قوسىمشاسىنا بۇكىل ەل بويىنشا تىيىم سالاتىن زاڭ جوباسىن ماقۇلدادى.

قۇجاتتى 352 كونگرەسسمەن قولداسا، 65- ءى قارسى شىققان. زاڭ جوباسىنا سايكەس، ينتەرنەت-پلاتفورمانىڭ يەسى ByteDance التى اي ىشىندە TikTok-تى ساتۋى كەرەك. ايتپەسە، الەۋمەتتىك جەلى بارلىق قولدانبالار دۇكەندەرىنەن جويىلادى.

زاڭ شىعارۋشىلار TikTok ا ق ش- تىڭ ۇلتتىق قاۋىپسىزدىگىنە قاۋىپ توندىرەدى دەپ الاڭداپ وتىر.

بىلتىر ناۋرىزدا ا ق ش كونگرەسىندە TikTok الەۋمەتتىك جەلىسى باسشىسىنىڭ قاتىسۋىمەن جيىن ءوتىپ، دەموكراتتار مەن رەسپۋبليكالىقتار بۇل الەۋمەتتىك جەلىنىڭ قاۋىپسىزدىگىنە كۇمان كەلتىرەتىن ايتتى. زاڭ شىعارۋ ورگاندارىنىڭ وكىلدەرى بەيجىڭدەگى ByteDance كومپانياسى TikTok الەۋمەتتىك جەلىسىن پايدالانۋشىلاردىڭ جەكە دەرەكتەرىن قىتاي بيلىگىنە جەتكىزەدى دەپ قاۋىپتەنەتىنىن مالىمدەدى. ال بۇل ا ق ش-تىڭ ۇلتتىق قاۋىپسىزدىگىنە نۇقسان كەلتىرۋى مۇمكىن.

TikTok امەريكالىق قۇندىلىقتارعا يە امەريكالىق كومپانياعا اينالىپ، پلاتفورما قىتاي كوممۋنيستىك پارتياسىمەن بايلانىسىن ءۇزۋى كەرەك، - دەگەن ەدى كونگرەسس دەپۋتاتى داررەن سوتو.

TikTok پلاتفورماسىنىڭ باس ديرەكتورى شوۋ جى چۋ ا ق ش كونگرەسىندە وتكەن جيىندا «ءبىز قىتايدىڭ كومپارتياسىمەن جۇمىس ىستەمەيمىز، ولارعا بارلاۋشى قىزمەتىن اتقارمايمىز» دەپ اقتالدى.

«بىرىنشىدەن، ءبىز جەلى قولدانۋشىلار اراسىندا جاسوسپىرىمدەردىڭ قاۋىپسىزدىگىن قامتاماسىز ەتۋگە ءمان بەرەمىز. ەكىنشىدەن، ا ق ش ازاماتتارىنىڭ جەكە دەرەكتەرى سىرتتان ۇرلانباۋ ءۇشىن ءجىتى باقىلاۋ جۇرگىزەمىز. ۇشىنشىدەن، ءبىز ۇكىمەت تاراپىنان TikTok-تى باسقارۋعا نەمەسە ونىڭ جۇمىسىنا ارالاسۋعا جول بەرىلمەيدى دەپ ۋادە ەتەمىز»، - دەگەن بولاتىن. شوۋ جى چۋ.

ايتا كەتۋ كەرەك، بۇگىندە پلاتفورمانى 170 ميلليوننان استام امەريكاندىقتار پايدالانادى.

اۆتور

ورالحان قوجانوۆ