ا ق ش ۋكرايناداعى جاعدايدى رەتتەۋ جۇمىستارىن توقتاتۋى مۇمكىن - ماركو رۋبيو
استانا. KAZINFORM – ا ق ش مەملەكەتتىك حاتشىسى ماركو رۋبيو پاريجدە ۋكراينا بويىنشا كوپجاقتى كەلىسسسوزدەر جۇرگىزگەن سوڭ وسىنداي مالىمدەمە جاسادى، دەپ حابارلايدى Kazinform مەنشىكتى ءتىلشىسى.
Politico باسىلىمىنىڭ جازۋىنشا، ا ق ش مەملەكەتتىك حاتشىسى ۋكرايناداعى جاعدايدى رەتتەۋ بويىنشا ناقتىراق جاۋاپتاردى كەلەسى اپتادا لوندوندا وتەتىن كەزدەسۋ بارىسىندا الام دەگەن ۇمىتتە.
ەگەر بۇل ىستە قانداي دا ءبىر جەتىستىك بولماسا قۇراما شتاتتار بۇل پروبلەمامەن اينالىسۋدى توقتاتۋى مۇمكىن، دەلىنگەن ەۋروپالىق باسىلىمداعى ماتەريالدا.
- ءبىز كەشە جاقسى كەزدەسۋ وتكىزدىك. مەنىڭشە، فرانسيا، ۇلى بريتانيا، گەرمانيامەن كەلىسسوز ناتيجەلى، وتە پايدالى بولدى. ءبىز ولارعا وسى كەزدەسۋ ءۇشىن العىس ايتامىز. مەن كەلەسى اپتانىڭ باسىندا تاعى ءبىر كەزدەسۋ وتكىزەمىز جانە وندا ناتيجەگە قول جەتكىزۋگە قانشالىقتى جاقىنبىز دەگەن ماسەلە توڭىرەگىندە ناقتى جاۋاپ الامىز دەگەن ويدامىن. بۇل ءىستى سوزبالاڭعا سالىپ جۇرە بەرمەيمىز، - دەپ مالىمدەدى رۋبيو فرانسيادان ۇشار الدىندا.
ۋكراينا بويىنشا كەلىسسوزدەر كەلەسى اپتادا لوندوندا وتەدى، ۋاقىتى ازىرگە بەلگىسىز.
رۋبيو ول كەزدەسۋگە كىمدەر قاتىساتىنىن ازىرگە بىلمەيتىنىن، الايدا، ەگەر ونىڭ ناتيجەلى بولاتىنىنان ءۇمىت بولسا ءوزى قاتىسۋعا دايىن ەكەنىن ايتتى.
ونىڭ سوزىنشە، شيەلەنىستى اياقتاۋ مۇمكىن نەمەسە مۇمكىن ەمەستىگىن جاقىن اپتادا ەمەس، جاقىن كۇندەرى بىلۋگە تىرىسۋ قاجەت. ەگەر ول مۇمكىن بولسا اقش وعان كۇش سالۋعا دايىن.
مەمحاتشىنىڭ سوزىنشە، ەگەر تاراپتار كەلىسۋگە دايىن ەمەس بولسا، پرەزيدەنت دونالد ترامپ بۇل ءىستى توقتاتاتىنىن مالىمدەۋى مۇمكىن.
- ءبىز بۇل ىسكە قانشا ۋاقىت قاجەت بولسا سونشا قاتىسۋعا دايىنبىز، دەگەنمەن ول شەكسىز بولماۋى ءتيىس. ەگەر بولمايتىن بولسا بىزگە باسقا جۇمىستارمەن اينالىسۋ كەرەك، - دەدى رۋبيو.
مەن بىرنەشە اپتا تۋرالى ايتىپ تۇرمىن، بۇل ءىستى الداعى بىرنەشە اپتادا جۇزەگە اسىرا الامىز با؟ ەگەر ول مۇمكىن بولسا، وندا ءبىز وعان قاتىسامىز، ەگەر مۇمكىن بولماسا ءبىزدىڭ نازارعا الۋىمىز كەرەك باسقا باسىمدىقتارىمىز بار.
ماركو رۋبيو بەيسەنبى كۇنى اتىستى توقتاتۋ تۋرالى كەلىسسوزدەردى فرانسيا پرەزيدەنتى ەممانيۋەل ماكرونمەن جانە گەرمانيا، ۋكراينا مەن ۇلى بريتانيانىڭ جوعارى دەڭگەيدەگى دەلەگاتسيالارىمەن وتكىزۋ ءۇشىن فرانسيا استاناسىنا ارنايى ەلشى ستيۆ ۋيتكوفپەن جانە كەيت كەللوگپەن باردى.
ماكرون كەڭسەسى كەزدەسۋدى «ەۋروپالىقتار قاتىسقان ءۇمىت كۇتتىرەتىن پروتسەس رەتىندە» باعالادى جانە ولار تالقىلاۋلار كەلەسى اپتادا لوندوندا جالعاساتىنىن ايتتى.