قۇجاتتا امەريكالىقتارعا نەمەسە ولاردىڭ وداقتاستارىنا، سونداي-اق وتباسى مۇشەلەرىنە قارسى تەرگەۋگە قاتىسقان تۇلعالارعا قارجىلىق جانە ۆيزالىق سانكسيالار قولدانىلاتىنى ايتىلعان.
ترامپتىڭ بۇل قادامى وتكەن اپتادا ا ق ش سەناتىنداعى دەموكراتتار رەسپۋبليكاشىلداردىڭ يزرايل پرەمەر-ءمينيسترى بينيامين نەتانياحۋ مەن بۇرىنعى قورعانىس ءمينيسترى يواۆ گالانتتى تۇتقىنداۋعا وردەر بەرۋىنە نارازىلىق رەتىندە ح ق س- قا سانكسيا سالۋ ارەكەتىنە توسقاۋىل قويۋىنان كەيىن جاسالدى.
نەتانياحۋ قازىر ۆاشينگتوندا ءجۇر.
- ح ق س يزرايل پرەمەر-ءمينيسترى بينيامين نەتانياحۋ مەن بۇرىنعى قورعانىس ءمينيسترى يواۆ گالانتتى قاماۋعا الۋعا نەگىزسىز وردەر بەرۋ ارقىلى ءوز وكىلەتتىكتەرىن اسىرا پايدالاندى - دەلىنگەن جارلىقتا.
وندا ا ق ش پەن يزرايل «سوعىس زاڭدارىن قاتاڭ ساقتايتىن اسكەرلەرى بار گۇلدەنگەن دەموكراتيالىق ەلدەر» ەكەنى اتاپ وتىلگەن.
- گااگادا ورنالاسقان حالىقارالىق قىلمىستىق سوت ءوز قىزمەتكەرلەرىن ىقتيمال شەكتەۋلەر جاعدايىندا قىزمەتكەرلەرگە ءۇش ايلىق جالاقىسىن الدىن الا تولەۋ ارقىلى ا ق ش- تىڭ ىقتيمال سانكسيالارىنان قورعاۋ شارالارىن قابىلدادى، - دەپ حابارلادى Reuters اگەنتتىگىنىڭ اقپارات كوزدەرى.
بۇل - سوتتىڭ ا ق ش- تىڭ جاۋاپ شارالارىمەن ەكىنشى رەت بەتپە-بەت كەلۋى. 2020-جىلى ترامپتىڭ ءبىرىنشى اكىمشىلىگى كەزىندە ۆاشينگتون ح ق س باس پروكۋرورى فاتۋ بەنسۋدۋ مەن يۋريسديكتسيا ماسەلەلەرى جونىندەگى ديرەكتورى فاكيسو بەنچوحوحوعا ا ق ش- تىڭ اۋعانستانداعى بولجامدى اسكەري قىلمىستارىن تەرگەۋگە بايلانىستى سانكسيالار سالدى.
قاڭتار ايىندا ا ق ش كونگرەسى وكىلدەر پالاتاسى ح ق س- قا قارسى سانكسيا سالۋعا داۋىس بەردى، ءبىراق زاڭ جوباسى سەناتتا داۋىس بەرۋدەن وتكەن جوق.
ح ق س ۆاشينگتون سانكتسيالارىن «زاڭ ۇستەمدىگىنە ارالاسۋعا جول بەرىلمەيتىن ارەكەت» ەكەنىن مالىمدەدى.
حالىقارالىق قىلمىستىق سوت 2002-جىلى قۇرىلعان. 120 دان استام ەل ح ق س- تىڭ قۇقىقتىق نەگىزى بولىپ تابىلاتىن ريم ستاتۋتىن راتيفيكاتسيالادى، وعان تاعى 34 مەملەكەت قول قويدى جانە بولاشاقتا ونى راتيفيكاتسيالاۋى مۇمكىن.
ا ق ش تا، يزرايل دە ريم ستاتۋتىنىڭ قاتىسۋشىلارى ەمەس.
ەسكە سالايىق، ح ق س - اسا اۋىر قىلمىستارمەن كۇرەستە نەگىزگى ورگان، ءبىراق ونىڭ شەشىمدەرى ءجيى داۋ تۋدىرىپ، حالىقارالىق قاۋىمداستىقتى پولياريزاتسيالايدى.
ايتا كەتەيىك، حالىقارالىق قىلمىستىق سوت نەتانياحۋ مەن گالانتتى قاماۋعا الۋعا وردەر بەرگەنىن جازعانبىز.