ا ق ش ءبىر اپتادا يەمەنگە 260 رەت سوققى جاسادى

استانا. KAZINFORM – ا ق ش اسكەري كۇشتەرى سوڭعى ءبىر اپتا ىشىندە يەمەن اۋماعىنا كەم دەگەندە 260 اۋە سوققىسىن جاساعان. بۇل تۋرالى يەمەندەگى «انسار اللاح» (حۋسيتتەر) قوزعالىسىنىڭ جەتەكشىسى ابدەل مالەك ال-حۋسي مالىمدەدى، دەپ جازادى ت ا س س.

- وسى اپتادا امەريكا بومبالاۋشى ۇشاقتار مەن باسقا دا اسكەري تەحنيكانى پايدالانا وتىرىپ، (يەمەندەگى) ازاماتتىق نىساندارعا 260 تان استام سوققى جاسادى، - دەدى ال-حۋسي «Al Masirah» تەلەارناسىنا بەرگەن سۇحباتىندا.

حۋسيلەر جەتەكشىسىنىڭ ايتۋىنشا، جولدار مەن كوشەلەرگە، بازار مەن زيراتقا شابۋىل جاسالعان.

2023-جىلى گازا سەكتورىنداعى قاقتىعىستىڭ ۋشىعۋىنان كەيىن حۋسيتتەر يزرايلگە قارسى ارەكەت ەتەتىندەرىن، سونىمەن قاتار يزرايلمەن بايلانىستى كەمەلەردىڭ قىزىل تەڭىز بەن باب-ەل-ماندەب بۇعازى ارقىلى وتۋىنە توسقاۋىل جاسايتىندارىن ەسكەرتكەن.

قاڭتار ايىنىڭ ورتاسىندا گازا سەكتورىندا ۋاقىتشا ءبىتىم ورناپ، حۋسيتتەردىڭ شابۋىلدارى توقتاعان ەدى. الايدا ناۋرىزدىڭ باسىندا ءبىتىم بۇزىلعان سوڭ، ولار قىزىل تەڭىزدەگى يزرايلدىك كەمەلەرگە قايتا سوققى جاساي باستادى.

15-ناۋرىز كۇنى اقش پرەزيدەنتى دونالد ترامپتىڭ بۇيرىعىمەن يەمەندەگى حۋسيتتەرگە قارسى اۋقىمدى اسكەري وپەراتسيا باستالدى. ا ق ش ورتالىق قولباسشىلىعى بۇل ارەكەتتەرىن «ەلدىڭ مۇددەسىن قورعاۋ جانە تەڭىز جولدارىنىڭ قاۋىپسىزدىگىن قامتاماسىز ەتۋ» دەپ ءتۇسىندىردى. جاۋاپ رەتىندە «انسار اللاح» قوزعالىسى قىزىل تەڭىزدىڭ سولتۇستىگىندەگى Harry Truman اتتى امەريكالىق اۋە تاسىمالداۋشى كەمەگە شابۋىل جاساعان.

ايتا كەتەيىك، ا ق ش- تىڭ ەل-حودەيدا پروۆينتسياسىنداعى راس-يسا مۇناي پورتىنا جاساعان اۋە سوققىسىنان 74 ادام قازا تاپقانىن جازدىق.