ا ق ش ب ۇ ۇ-نىڭ گازادا اتىستى توقتاتۋ تۋرالى قارارىنا ۆەتو قويدى

استانا. KAZINFORM - قاراردى ب ۇ ۇ قاۋىپسىزدىك كەڭەسىنىڭ تۇراقتى ەمەس 10 مۇشەسى ازىرلەگەن. وندا گازا سەكتورىندا اتىستى جىلدام توقتاتۋ تۋرالى ايتىلعان. قارارعا ا ق ش-تى قوسپاعاندا كەڭەستىڭ قالعان 14 مۇشەسى داۋىس بەردى، دەپ حابارلايدى Kazinform-نىڭ مەنشىكتى ءتىلشىسى.

سونداي-اق قارار گازا سەكتورىنداعى يزرايلدىك تۇتقىنداردىڭ بارلىعىن «دەرەۋ جانە ءسوزسىز بوساتۋدى» تالاپ ەتەدى. ۆاشينگتون گازاداعى اتىستى كەلىسىمسىز توقتاتۋ تالابىنا قارسى شىقتى.

ا ق ش- تىڭ ب ۇ ۇ-داعى ارنايى وكىلىنىڭ ورىنباسارى روبەرت ۆۋد نيۋ-يوركتەگى سەسسيادا داۋىس بەرۋ الدىندا ا ق ش تەك اتىستى توقتاتۋ اياسىندا كەپىلگە الىنعانداردى دەرەۋ بوساتۋدى ناقتى تالاپ ەتەتىن قاراردى عانا قولدايتىنىن مالىمدەدى.

«ءبىز بۇعان دەيىن بىرنەشە رەت مالىمدەگەنىمىزدەي، كەپىلگە الىنعانداردى بوساتپاي اتىستى توقتاتۋدى قولداي المايمىز. سوعىس كەپىلگە الىنعانداردى بوساتۋمەن اياقتالۋى كەرەك. بۇل ەكى وزەكتى ماقسات ءبىر-بىرىمەن تىعىز بايلانىستى. بۇل قارار بۇل قاجەتتىلىكتى جوققا شىعاردى، سوندىقتان قۇراما شتاتتار ونى قولداي المادى»، - دەدى ا ق ش- تىڭ ب ۇ ۇ-داعى رەسمي وكىلى.

جالپى ا ق ش اتىستى توقتاتۋ گازادا كەپىلگە الىنعان بارلىق ادامنىڭ امان- ەسەن بوستاندىققا شىعۋىمەن بايلانىستى بولۋى كەرەك دەپ سانايدى.

يزرايلدىڭ ب ۇ ۇ-داعى ەلشىسى دەنني دانون اقش- قا ۆەتو قۇقىعىن پايدالانعانى ءۇشىن العىس ايتىپ، بايدەن اكىمشىلىگى «ادامگەرشىلىك پەن ادىلەتتىلىك جاعىندا» ەكەنىن مالىمدەدى.

ال پالەستينانىڭ ب ۇ ۇ-داعى وكىلىنىڭ ورىنباسارى مادجەد باميا قاۋىپسىزدىك كەڭەسىنىڭ سارسەنبى كۇنى تاڭەرتەڭ وتكەن وتىرىسىندا اتىستى توقتاتۋ كوپتەگەن ادامنىڭ ءومىرىن ساقتاپ قالادى دەدى.

«الەم جازىقسىز پالەستينالىقتاردىڭ ولىمىنە، اش جۇرگەن پالەستينالىق بالالارعا، بالالارىن الىپ، ءبىر جەردەن ەكىنشى جەرگە ءماجبۇرلى قونىس اۋدارعان انالارعا ۇيرەنبەۋى كەرەك»، - دەدى پالەستينا وكىلى.

ايتا كەتەتىن جايت، بۇل ا ق ش پرەزيدەنتى دجو بايدەن اكىمشىلىگىنىڭ يزرايل وتكەن قازان ايىندا اسكەري شابۋىلىن باستاعاننان بەرى گازا سەكتورىنداعى سوعىستى توقتاتۋدى تالاپ ەتەتىن قارارعا تىيىم سالىپ وتىرعان ءتورتىنشى جاعداي.

ەسكە سالساق، ا ق ش پالەستيناعا ب ۇ ۇ-عا تولىق مۇشەلىك مارتەبەسىن بەرۋ تۋرالى قاۋىپسىزدىك كەڭەسىنىڭ قارارىنا ۆەتو قويدى.