ءانشى ادەل ۇزاقمەرزىمدى شىعارماشىلىق ءۇزىلىس جاسايتىن بولدى

استانا. KAZINFORM - بريتاندىق ءانشى ادەل قازىرگى كونسەرتتىك تۋرى اياقتالعاننان كەيىن مۋزىكالىق مانسابىندا ۇزاق ءۇزىلىس جاساۋدى جوسپارلاپ وتىرعانىن ايتتى، دەپ حابارلايدى BBC.

«مەنىڭ كۇش-قۋاتىم سارقىلدى. جاڭا مۋزىكا جازۋ تۋرالى ەشقانداي جوسپارىم جوق. وسىنىڭ بارىنەن كەيىن مەن ۇلكەن ءۇزىلىس جاساعىم كەلەدى»، - دەدى جۇلدىز ميۋنحەندە وتەتىن 10 كۇندىك كونسەرتتەر سەرياسى الدىندا نەمىستىڭ ZDF تەلەارناسىنا بەرگەن سۇحباتىندا.

ءانشىنىڭ سوڭعى البومى 2021-جىلى شىقتى. ول سوڭعى ەكى جىل بويى دەمالىس كۇندەرى لاس-ۆەگاستا ونەر كورسەتتى جانە جاقىندا Caesars Palace ساۋىق كەشەنىندە كونسەرتتىك رەزيدەنتسيا اياسىندا ءوزىنىڭ 90-شوۋىن وتكىزدى. ول قاراشا ايىندا اياقتالادى جانە ادەل بۇل تاجىريبە ونى ەموتسيونالدى تۇردە السىرەتكەنىن ايتتى.

ونىڭ گەرمانياداعى كونسەرتتەرى لاس-ۆەگاستاعى قويىلىمدارىنان مۇلدە وزگەشە بولادى، مۇنداعى كونسەرتتىك الاڭ 4 مىڭعا جۋىق كورەرمەندى سىيدىرادى: ميۋنحەندە ءار كەش سايىن ونىڭ ءانىن ارنايى سالىنعان ۋاقىتشا ستاديوندا 74 مىڭ جانكۇيەر تىڭدايدى.

ءانشىنىڭ كونسەرتتەرى 2-تامىزدان باستاپ وتەدى، ءبىراق بارلىق بيلەت ءالى ساتىلعان جوق: نەمىستىڭ DPA اگەنتتىگىنىڭ مالىمەتىنشە، بيلەتتەردىڭ 5 پايىزى قويمادا قالدى.

پروموۋتەر مارەك ليبەربەرگتىڭ ايتۋىنشا، كوپتەگەن بيلەتتەر باعا دياپازونىنىڭ ەڭ جوعارعى جانە تومەنگى جاعىندا قالدى. ەڭ ارزان بيلەتتەر 79 ەۋرو، ال ەڭ قىمباتى 430 ەۋرو تۇرادى.