اۋە ديسپەتچەرلەرىنىڭ جۇمىسى تۋرالى نە بىلەمىز؟

استانا. قازاقپارات - جۇزدەگەن جاندى الىپ ۇشقان اۋە كەمەلەرىنىڭ قاۋىپسىزدىگىن قامتاماسىز ەتۋ - اۋىر مىندەت. ال بۇل مىندەت اۋە ديسپەتچەرلەرىنە جۇكتەلگەن.

ولار جەردە وتىرىپ، كوكتەگى ۇشاقتىڭ امان-ەسەن قونۋىنا نەمەسە دىتتەگەن باعىتىنا ىركىلىسسىز ۇشىپ كەتۋىنە جاۋاپتى. جەكسەنبى كۇنى الەم جۇرتى حالىقارالىق اۋە ديسپەتچەرلەرى كۇنىن اتاپ وتەدى.

استانا اۋەجايىنا تاۋلىگىنە ءجۇز ۇشاق قونادى. ءجۇز ۇشاق ۇشىپ كەتەدى. جازدىڭ كەزىندە ءتىپتى كوبەيەدى. ال ولاردىڭ امان-ەسەن ۇشىپ-قونۋى 45 مەترلىك مۇنارادان باسقارىلادى. بۇگىن بىزگە اۋە ديسپەتچەرلەرىنىڭ قىزمەتىمەن تانىسۋدىڭ ءساتى ءتۇستى.

اعا ديسپەتچەر ولجاس شالابايەۆ بالا كەزىنەن ۇشقىش بولۋدى ارماندادى. الايدا اڭساعان ارمانىنا قولى جەتكەن جوق. دەگەنمەن ولجاس اۆياتسيا سالاسىنان الىس كەتپەۋدى ءجون كوردى. 13 جىلدان بەرى اۋە كەمەلەرىنىڭ ۇشىپ-قونۋىن قامتاماسىز ەتىپ كەلەدى.

ولجاس شالابايەۆ، «قازايروناۆيگاتسيا» ر م ك اعا ديسپەتچەرى:

- اۋە ديسپەتچەرىنىڭ جۇمىسى ەڭ قيىن جۇمىستاردىڭ ءبىرى بولىپ ەسەپتەلەدى. ويتكەنى جاۋاپكەرشىلىگى وتە كوپ. ويتكەنى ءبىر ۇشاقتا 100، 200، 300 ادام بولۋى مۇمكىن. ءبىزدىڭ جۇمىس ەش كورىنبەيدى. پيلوتتار ءبىر ۇشاقتى عانا جونەلتسە، مىڭداعان ۇشاقتى وتىرعىزامىز، قونعىزامىز، ۇشىرامىز. ءبىزدى ەشكىم كورمەيدى، بىلمەيدى. سول ءۇشىن ءبىزدىڭ اۆياديسپەتچەرلەردى كورىنبەيتىن قاھارمان دەپ ەسەپتەيمىن.

قازىرگى تاڭدا «قازايروناۆيگاتسيا» كاسىپورنىندا 700-دەن استام اۋە ديسپەتچەرى جۇمىس ىستەيدى. بۇل ماماندارعا قويىلاتىن تالاپ قاتاڭ. قىراعىلىقپەن قاتار باتىل ءارى جەدەل شەشىم قابىلداۋ قاجەت. سونداي-اق اعىلشىن ءتىلىن دە تەرەڭ بىلۋگە ءتيىس. سەبەبى جۇمىس بارىسىندا كوبىنە اعىلشىن تىلىندە سويلەيدى.

ولجاس شالابايەۆ، «قازايروناۆيگاتسيا» رم ك اعا ديسپەتچەرى:

- ءۇش جىل سايىن ءوزىمىزدىڭ ديسپەتچەرلىك قابىلەتىمىز ەمتيحان تاپسىرىپ كورسەتەمىز. ودان باسقا ەكى جىل سايىن مەديتسينالىق تەكسەرىستەن وتەمىز، ءبىزدىڭ دەنساۋلىق مىقتى بولۋى كەرەك. ودان كەيىن ءۇش جىل سايىن اعىلشىن، اشەيىن IELTS ،TOEFL ەمەس، اۆياتسيالىق اعىلشىندى تاپسىرامىز.

كەيىنگى جىلدارى الەمدە قالىپتاسقان گەوساياسي جاعدايعا بايلانىستى قازاقستان ارقىلى ۇشاتىن رەيستەر كوبەيدى. مىسالى، كاسىپورىن بىلتىر رەكوردتىق مەجەنى باعىندىردى. 415 مىڭنان اسا ساپارعا قىزمەت كورسەتتى. ونىڭ ىشىندە 107 مىڭنان استامى - وتاندىق، 308250 رەيس شەتەلدىك اۋە كومپانيالارعا تيەسىلى. بۇل 2015 -جىلمەن سالىستىرعاندا ەكى ەسە ارتىق.

ارينە، بۇل ساپارلاردىڭ قاۋىپسىزدىگىن قامتاماسىز ەتۋ وڭاي ەمەس. ۇشاقتارعا قالىڭ تۇمان، اقتۇتەك بوران دا كەدەرگى كەلتىرۋى مۇمكىن. سوندىقتان ورتالىق ماماندارى كۇن رايىن دا تۇراقتى باقىلاپ وتىرادى.

مەيىربەك ابدۋللين، «قازايروناۆيگاتسيا» ر م ك ديسپەتچەرى:

- بىزدە مىناۋ «كرامس» دەگەن ءبىزدىڭ ەكرانىمىز، ديسپلەيىمىز بار. سوعان قاراپ، ول كەزدە مەتەورولوگيالىق بارلىق اقپارات مينۋتتىق رەجيمدە بولادى. ءار مينۋت سايىن «ۆيديموست» دەيدى، كوزبەن كورۋگە بولاتىن قاشىقتىق، ۆەرتيكالدى قاشىقتىق، سيفرلاردىڭ بارلىعى وزگەرىپ وتىرادى. سونى ءبىز ۋاقىتىندا پيلوتتارعا راتسيامەن بەرىپ وتىرامىز.

«اسىرەسە كوكتەم مەن كۇزدە ۇشاقتاردىڭ ۇشىپ- قونۋى قيىندايدى»، - دەيدى ماماندار. ويتكەنى بۇل مەزگىلدەردە كۇن رايى تابان استىندا قۇبىلادى. جاڭبىر جاۋىپ، ارتىنان كۇن سۋىسا، ۇشۋ الاڭى كوك مۇزعا اينالۋى مۇمكىن. سوندىقتان اۋە ديسپەتچەرى كەز كەلگەن جاعدايعا دايىن بولۋعا ءتيىس.

24.kz