مينيسترلىك مالىمەتىنشە، ەلىمىزدە الەۋمەتتىك كودەكس جوباسى شەڭبەرىندە ازاماتتاردى جاپپاي وقىتۋ جانە ءبىلىم بەرۋ ساپاسىن جاقسارتۋ ءۇشىن نەگىزدەر قالىپتاستىرىلىپ، ول زاڭنامالىق دەڭگەيدە بەكىتىلەتىن بولادى.
بىرىنشىدەن، تەگىن وقىتۋ كۋرستارىمەن قامتىلاتىن ەڭبەككە قابىلەتتى ازاماتتار سانىن بىرنەشە ەسە ارتتىرۋ جوسپارلانعان.
ەگەر بۇرىن ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ جەلىسى بويىنشا ازاماتتاردىڭ جەكەلەگەن ساناتتارى عانا وقىتىلىپ كەلسە (بۇل شامامەن جىلىنا 500 مىڭ ادام)، ەندى الەۋمەتتىك ساناتى مەن مارتەبەسىنە قاراماستان ەڭبەككە قابىلەتتى جاستاعى بارلىق ازامات قامتىلادى (بۇل 9 ميلليون ادامعا جۋىق).
اتاپ ايتقاندا، مەملەكەت جۇمىس بەرۋشىلەردىڭ ءوتىنىمى بويىنشا جۇمىسسىزدار مەن حالىقتىڭ جەكەلەگەن نىسانالى ساناتتارى ءۇشىن قىسقا مەرزىمدى تەگىن وقىتۋ كۋرستارىن ۇيىمداستىراتىن بولادى. بۇل رەتتە ولارعا وقىتۋدىڭ ءتۇرلى فورماتتارى، ونىڭ ىشىندە skills.enbek.kz پلاتفورماسىندا ونلاين وقىتۋدى ۇسىنۋ كوزدەلۋدە. بۇگىنگى كۇنى بۇل پلاتفورمادا 151 كۋرس ورنالاستىرىلعان، ونىڭ 97-نەن تەگىن وتۋگە بولادى.
«جۇمىس بەرۋشىلەر ءوز قىزمەتكەرلەرى ءۇشىن جاڭا تەحنولوگيالاردى ەنگىزۋدى نەمەسە جاڭا وندىرىستەر اشۋدى ەسكەرە وتىرىپ، بىلىكتىلىكتى ارتتىرۋ، قايتا بەيىندەۋ كۋرستارىن ۇيىمداستىرادى. وقىتۋ جۇمىس بەرۋشىنىڭ تاڭداۋى بويىنشا جۇمىس ورىندارىندا، وقۋ ورتالىقتارىندا نەمەسە ءبىلىم بەرۋ ۇيىمدارىنىڭ بازاسىندا وتەتىن بولادى. ازاماتتار الەۋمەتتىك مارتەبەسىنە بايلانىستى مەملەكەت نەمەسە جۇمىس بەرۋشىلەر ۇيىمداستىراتىن تەگىن كۋرستاردان وتە الادى نەمەسە اقىلى كۋرستاردى ءوز قالاۋى بويىنشا تاڭداي الادى»، - دەلىنگەن مينيسترلىك مالىمەتىندە.
ەكىنشىدەن، ەلىمىزدىڭ جوعارى وقۋ ورىندارى مەن كوللەدجدەرىندە وقىتۋ ساپاسىن جاقسارتۋ ءۇشىن كەشەندى شارالار قابىلداۋ كوزدەلىپ وتىر. ۇلتتىق بىلىكتىلىك جۇيەسىن قايتا جۇكتەۋ وسىعان باعىتتالعان.
«جۇمىس بەرۋشىلەر كاسىپتىك ستاندارتتار ارقىلى ءبىلىم بەرۋ باعدارلامالارى جاڭارتىلاتىن جۇمىس كۇشىنىڭ داعدىلارىنا تالاپتار قوياتىن بولادى.
كاسىبي بىلىكتىلىكتەردى تانۋ ورتالىقتارى كاسىبي بىلىكتىلىكتەردى، ونىڭ ىشىندە رەسمي، بەيرەسمي جانە ينفورمالدى ءبىلىم بەرۋ ارقىلى الىنعان مامانداردىڭ جەكەلەگەن داعدىلارىن باعالايدى جانە ءتيىستى سەرتيفيكاتتار بەرەدى»، - دەدى ۆەدومستۆودان.