قازاقستاندىق 9 جاسار بالا يسپانياداعى كاسىپقوي فۋتبول كلۋبىندا جاتتىعادى
اناسى الما ءىلياسوۆانىڭ ايتۋىنشا، نازار ءۇش جاسىنان ورال قالاسىنداعى FKU ورال (football Kids Uralsk) كلۋبىندا تاجىريبەلى باپكەر بولات شالايەۆتىڭ قولاستىندا جاتتىقتى.
«اكەسى سەرگەي دوليا وتكەن جىلى جازدا سوچيدەگى لاگەرگە اپارىپ ەدى. سوندا يسپانيادان باپكەرلەر كەلىپ، قاراعان كەزدە نازار بىردەن كوزگە ءتۇسىپ، ۇناعان. سوسىن سەرتيفيكات بەرىپ، ۆالەنسياداعى فۋتبول اكادەمياسىنا قارالىمعا شاقىردى. قارالىمنان ويداعىداي ءوتىپ، كاسىپقوي فۋتبول كلۋبىمەن ەكى جىلعا كەلىسىمشارت جاساستى. جارتى جىل يسپانيادا بولىپ، ءبىر اي دەمالىسىن ورالدا، ۇيدە وتكىزىپ، قايتادان كەتتى. ويتكەنى كەلىسىمشارت بويىنشا جاتتىعۋدى قالدىرماۋ كەرەك. قىركۇيەكتىڭ ورتاسىنان باستاپ سول ەلدەگى مەكتەپكە بارادى. ۇلىممەن بىرگە اجەسى گۇلجامال ۇنەمى بىرگە. مەن ءوزىم قازاقپىن، اكەسى - ۋكراين، قاراپايىم كوپ وتباسىنىڭ ءبىرىمىز»، - دەدى ا. ءىلياسوۆا.
نازاردىڭ فۋتبول اگەنتى ماريا كوۆاليەۆانىڭ سوزىنە قاراعاندا، قازاقستاندىق بالعىن ويىنشى Global Football Total Levante UD اكادەمياسىندا قارالىمنان ويداعىداي ءوتتى. اكادەميادان ونى Levante UD كاسىپقوي فۋتبول كلۋبى اتتاي قالاپ الدى. ەندى فەدەراتسيا دەڭگەيىندە كلۋبتا اپتاسىنا ءۇش رەت جاتتىعاتىن بولادى. بۇل، ءبىر قاراعاندا، ازداۋ بولىپ كورىنۋى مۇمكىن. الايدا يسپان ەلىنىڭ زاڭدىلىعىنا، سونداعى كلۋبتاردىڭ قاعيداتىنا سايكەس بالانىڭ جۇرەگىنە كۇش تۇسىرۋگە، دەنساۋلىعىنا نۇقسان كەلتىرۋگە بولمايدى. سوسىن وزدەرىنىڭ فۋتبول ليگاسىندا اپتاسىنا ءبىر ويىنعا قاتىسادى. ولاردىڭ ءوز چەمپيوناتىندا Levante UD كلۋبى ابسوليۋتتى جەڭىمپاز بولدى.
«نازار Global Football Total اكادەمياسىنىڭ بازاسىندا قارالىمنان ءوتۋ ءۇشىن يسپانياعا بيىلعى قاڭتار ايىنىڭ اياعىندا باردى. وندا ءبارى دە وزگەشە. باستاپقىدا مۇندا كەلگەندەر ءتىلدى بىلمەيدى. باسقا ورتا، تاماعىنا دەيىن باسقا. اسىرەسە، جاتتىعۋ بارىسى، ويناۋ مانەرى مۇلدە بولەك. سونىڭ بارىنە بەيىمدەلىپ كەتۋ سىرتتان كەلگەندەرگە وڭاي ەمەس. نازار ءبىرىنشى كۇننەن باستاپ الاڭدا ءوزىن كورسەتە ءبىلدى. ءبىر اپتا وتكەننەن كەيىن كلۋب ديرەكتورى كەلىپ قارادى. اقىرى نازاردىڭ Levante UD فۋتبول كلۋبىنا قابىلداناتىنى بەلگىلى بولدى. سودان كەيىن اي جارىم ۋاقىت قۇجاتتاردى دايىنداۋعا كەتتى. سونىڭ ناتيجەسىندە نازار ليتسەنزيا الىپ، تولىققاندى ويىنشىعا اينالدى. ەكى جىلعا كەلىسىمشارت جاسالدى. مۇندا باسقا كلۋبتار دا جاس تالانتتاردىڭ ويىنىن قارايدى، سوندىقتان ءتۇرلى ۇسىنىستار ءتۇسۋى مۇمكىن. نازار ءقازىردىڭ وزىندە بولاشاعىنان ۇلكەن ءۇمىت كۇتتىرەدى، قالعانىن ۋاقىت كورسەتەدى»، - دەدى قازاقپارات تىلشىسىنە ماريا كوۆاليەۆا.