اتاۋلى كۇندەر
حالىقارالىق جەمقورلىقپەن كۇرەس كۇنى
بىرىككەن ۇلتتار ۇيىمىنىڭ باستاماسىمەن اتاپ وتىلەدى. 2003-جىلى ءدال وسى كۇنى مەكسيكانىڭ مەريدا قالاسىندا وتكەن جوعارى دەڭگەيدەگى ساياسي كونفەرەنسيادا 2003-جىلى 1- قاراشادا باس اسسامبلەيا قابىلداعان ب ۇ ۇ- نىڭ جەمقورلىققا قارسى كونۆەنتسياسى قول قويۋ ءۇشىن اشىلدى.
قۇجات بويىنشا وعان قول قويعان مەملەكەتتەر پارا، بيۋجەتتىك قاراجات پەن جەمقورلىق تابىستاردى كادەگە جاراتۋ قىلمىس دەپ جاريالاۋعا مىندەتتەلەدى.
كونۆەنتسيا بارلىق قۇرىلىمدارى ۇلتتىق ءال-اۋقاتقا زيان كەلتىرەتىن جەمقورلىق جايلاعان ەلدەر ءۇشىن وتە ماڭىزدى.
حالىقارالىق گەنوتسيد قۇرباندارىن ەسكە الۋ، ولاردىڭ ار-نامىسىنا قۇرمەت كورسەتۋ جانە وسى قىلمىستىڭ الدىن الۋ كۇنى
2015-جىلدىڭ قىركۇيەگىندە ب ۇ ۇ باس اسسامبلەياسى ارمەنيانىڭ باستاماسى بويىنشا 9- جەلتوقساندى حالىقارالىق گەنوتسيد قۇرباندارىن ەسكە الۋ، ولاردىڭ ار نامىسىنا قۇرمەت كورسەتۋ جانە وسى قىلمىستىڭ الدىن الۋ كۇنى دەپ بەلگىلەدى.
1948-جىلى 9- جەلتوقساندا باس اسسامبلەيانىڭ گەنوتسيد قىلمىسىنىڭ الدىن الۋ جانە ونى جازالاۋ تۋرالى كونۆەنتسياسى قابىلدانعاندىقتان وسى كۇن تاڭدالىپ الىندى.
ەستە قالار وقيعالار
1991-جىلى قازاق ك س ر مينيسترلەر كابينەتىنىڭ قاۋلىسىمەن قازاقستاننىڭ ا. پۋشكين اتىنداعى مەملەكەتتىك كىتاپحاناسى قازاقستان رەسپۋبليكاسىنىڭ ۇلتتىق كىتاپحاناسى بولىپ وزگەردى.
1996-جىلى ەلباسى جارلىعىمەن جەلتوقسان كوتەرىلىسىنە قاتىسىپ، قۇربان بولعان بوزداق قايرات رىسقۇلبەكوۆكە «حالىق قاھارمانى» اتاعى بەرىلدى.
1997-جىلى تەگەراندا يسلام الەمىنىڭ ەكولوگيالىق اپاتتاردان زارداپ شەككەن ايماقتارىنا: ارال تەڭىزىنىڭ باسسەينى مەن سەمەي يادرولىق پوليگون ايماعىنا كومەك كورسەتۋ تۋرالى قارار قابىلداندى.
2008-جىلى قاراعاندىدا ۇلى ابايعا ارنالعان ەسكەرتكىش اشىلدى. ەسكەرتكىش اۆتورى - ءمۇسىنشى اسقار نارتوۆ. بيىكتىگى بەس مەترلىك ءمۇسىن قاراعاندى وبلىسىنىڭ كوركەمدىك-وندىرىستىك كومبيناتىندا قۇيىلعان.
2009-جىلى الماتىدا بەلگىلى كينووپەراتور، حالىق ءارتىسى، كينەماتوگرافيستەر وداعىنىڭ مۇشەسى ەسكەندىر تىنىشبايەۆتىڭ 100 جىلدىعىنا ارنالعان پوشتالىق ماركاسى شىعارىلدى. ەسكەندىر تىنىشبايەۆ (1909-1995) - قازاقتان شىققان تۇڭعىش كاسىبي كينووپەراتور.
ول تۇسىرگەن استام دەرەكتى جانە عىلىمي- كوپشىلىك فيلمدەر قازاقستاننىڭ كينو ءوندىرىسىنىڭ التىن قورىنا ەنىپ، وپەراتورلىق ونەر بويىنشا وقۋ قۇرالىنا اينالدى.
2010-جىلى كەدەن وداعى جوعارى ورگانىنىڭ وتىرىسىندا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ، بەلارۋس رەسپۋبليكاسى پرەزيدەنتى الەكساندر لۋكاشەنكو، رەسەي فەدەراتسياسىنىڭ پرەزيدەنتى - دميتري مەدۆەديەۆ «ءبىرىڭعاي ەكونوميكالىق كەڭىستىك قۇرۋ تۋرالى» دەكلاراتسياعا قول قويدى.
2011-جىلى پولشا رەسپۋبليكاسىندا «پولشا پوشتاسى» ۇلتتىق كومپانياسى قازاقستان تاۋەلسىزدىگىنىڭ 20 جىلدىعىنا وراي ارناۋلى پوشتا ماركالارىن شىعاردى. ەلىمىز اۋماعىنىڭ كونتۋرى ءتۇسىرىلىپ، قازاقتىڭ ۇلتتىق ويۋىمەن بەزەندىرىلگەن ماركانىڭ بەتىنە «قازاقستاننىڭ تاۋەلسىزدىگىنە 20 جىل» دەپ جازىلدى.
2013-جىلى ق ر پرەزيدەنتى ن. نازاربايەۆ وتباسى مەن نەكەنىڭ ادامگەرشىلىك قۇندىلىقتارىن، وڭ اسەرىن ناسيحاتتاۋ، وتباسىنىڭ قوعامداعى مارتەبەسىن ارتتىرۋ ماقساتىندا جىل سايىن «مەرەيلى وتباسى» ۇلتتىق بايقاۋىن وتكىزۋ تۋرالى وكىمگە قول قويدى.
2015-جىلى الماتىدا ق ر سپورتتىق وق اتۋ فەدەراتسياسى پرەزيدەنتىنىڭ كۋبوگىندا پنيەۆماتيكالىق قارۋدان وق اتۋدا قازاقستان رەسپۋبليكاسىنىڭ جاڭا رەكوردى ورناتىلدى. ونىڭ اۆتورى - ق ر قورعانىس مينيسترلىگى ارميا ورتالىق سپورت كلۋبىنىڭ ارميالىق سپورتشىسى يۋري يۋركوۆ. 10 مەتر قاشىقتىقتا اتقىش 624,4 ۇپاي جيناپ، ازەربايجاندا وتكەن 2015-جىلعى الەم كۋبوگىندا ورناتقان الدىڭعى 622,9 ۇپايىنان اسىپ ءتۇستى.
2016-جىلى اقتاۋدا قازاقستان اسكەري-تەڭىز كۇشتەرىنىڭ كەمەلەرىنە ارنالعان العاشقى اسكەري پيرس اشىلدى.
2016-جىلى بەس دۇركىن وليمپيادا چەمپيونى، تانىمال كەڭەس گيمناستشىسى نەللي كيم ا ق ش جانە جەنيەۆادا قازاقستان حالقى اسسامبلەياسىنان الەم ەلشىسى اتاندى.
2018-جىلى «مادەنيەتتى دامىتۋعا قوسقان سۇبەلى ۇلەسى جانە ءوز ىسىنە ادالدىعى ءۇشىن» قازاقستاننىڭ حالىق ءارتىسى روزا رىمبايەۆا رەسەيدىڭ «ۇلتتىق ايبىن» سىيلىعىمەن ماراپاتتالدى.
سالتاناتتى ماراپاتتاۋ ءراسىمى ماسكەۋدىڭ كرەمل مەملەكەتتىك سارايىندا وتكەن. «ۇلتتىق ايبىن» («ناتسيونالنوە ۆەليچيە») سىيلىعى تاۋەلسىز قوعامدىق سىيلىق بولىپ تابىلادى. ول رەسەيلىك جانە شەتەلدىك قايراتكەرلەردى ىنتالاندىرۋ ماقساتىندا بەرىلەدى. سونىمەن قاتار بۇل ماراپات مەملەكەت جانە قوعام قايراتكەرلەرىنە، مادەنيەت جانە ونەر وكىلدەرىنە تاعايىندالادى.
2019-جىلى سولتۇستىك قازاقستان وبلىسى تايىنشا اۋدانى دونەتسكوە اۋىلىنىڭ ماڭىندا كونە جەرلەۋ ورنى تابىلدى.
ەگدە جاستاعى ايەلدىڭ سۇيەكتەرىمەن بىرگە بالىقتار بەينەلەنگەن كۇمىس اينا، بىلعارى قوراپتىڭ قالدىقتارى، قايشىلاردىڭ سىنىقتارى، اعاش تاراق جانە توستاعاننىڭ سىنىقتارى مەن تەمىر بىلىكتەر بولدى. تابىلعان زاتتىڭ قاي كەزەڭگە جاتاتىنىن عالىمدار انىقتاۋدا.
2019-جىلى نۇر-سۇلتان قالاسىندا دارىلىك زاتتار مەن مەديتسينالىق بۇيىمدارعا ساراپتاما جۇرگىزۋ بويىنشا زەرتحانالىق سىناق ورتالىعى اشىلدى. ورتالىقتىڭ اشىلۋى قازاقستان اۋماعىنا كونترافاكتىلىك جانە جالعان مەديتسينالىق بۇيىمداردى اكەلۋدىڭ جولىن كەسىپ، دارىلىك زاتتار مەن مەديتسينالىق بۇيىمداردىڭ ساپاسىن باقىلاۋعا مۇمكىندىك بەرەدى.