ەستە قالار وقيعالار
1960-جىلى قازاق ك س ر مادەنيەت مينيسترلىگىنىڭ بۇيرىعىمەن الماتى كوركەم جانە حرونيكالىق فيلمدەر كينوستۋدياسى «قازاق فيلم» كينوستۋدياسى بولىپ وزگەرتىلدى.
1970-جىلى ماگيسترالدىك بايلانىس جەلىسى قولدانىسقا بەرىلدى. ول شىعىس قازاقستاندىقتاردىڭ ماسكەۋدەن ورتالىق تەلەۆيدەنيە مەن الماتىدان قازاق تەلەۆيدەنيەسىنىڭ حابارىن كورۋىنە مۇمكىندىك بەردى.
1993-جىلى گەرمانيا فەدەراتيۆتىك رەسپۋبليكاسىندا، يران يسلام رەسپۋبليكاسىندا، فرانسيا، ازەربايجان، ارمەنيا، بەلارۋس، گرۋزيا، قىرعىزستان، مولدوۆا، تۇرىكمەنستان، وزبەكستان، ۋكراينا رەسپۋبليكالارىندا جانە رەسەي فەدەراتسياسىندا قازاقستان رەسپۋبليكاسىنىڭ ەلشىلىكتەرى اشىلدى.
2007-جىلى قازاقستان رەسپۋبليكاسى پرەزيدەنتى نۇرسۇلتان نازاربايەۆ قازاقستان رەسپۋبليكاسىنىڭ يوردان حاشيميتتىك كورولدىگىندەگى ەلشىلىگىن اشۋ تۋرالى جارلىققا قول قويدى.
2007-جىلى الەمگە تانىمال مارافونشى قاراعاندىلىق پاۆەل سيروتين «بەيبىتشىلىك ەلشىسى» اتاعىن الدى.
2006-جىلى جەلتوقسان ايىندا 70 جىلدىعىن اتاپ وتكەن سپورتشى ءومىرىنىڭ تەڭ جارتىسىندا مارافوندىق جۇگىرۋمەن اينالىسىپ كەلەدى. ول بىرنەشە رەت 100 شاقىرىمدىق قاشىقتىققا دا جۇگىرگەن. پاۆەل سيروتين ءوزىنىڭ مەرەيتويىن دا كەزەكتى مارافونمەن اتاپ ءوتىپ، تەمىرتاۋدان قاراعاندىعا دەيىنگى 32 شاقىرىم قاشىقتىقتى جۇگىرىپ وتكەن بولاتىن.
مەرەيتويىنىڭ قۇرمەتىنە بەرىلگەن قۇرمەتتى اتاقتى پ. سيروتين جەر بەتىندە بەيبىتشىلىك ورناتۋعا قوسقان ۇلەسى ءۇشىن - دۇنيەجۇزىلىك بىتىمگەرشىلىك فەدەراتسياسى مەن ءدىنارالىق جانە حالىقارالىق فەدەراتسياسىنان الىپ وتىر.
«باسقالارعا ۇلگى بولىپ تابىلاتىن ءومىرى ءۇشىن، سونداي-اق، مورال، وتباسىلىق قۇندىلىقتار، ءتۇرلى ءدىن وكىلدەرىنىڭ بەيبىت، قاتار ءومىر ءسۇرۋ يدەالدارىنا قىزمەت ەتكەنى ءۇشىن وسىناۋ قۇرمەتتى اتاق بەرىلەدى»، دەلىنگەن «سەنىم گراموتاسىندا». «بەيبىتشىلىك ەلشىسى» اتاعى بەرىلگەن ازاماتتار بىرىككەن ۇلتتار ۇيىمىنىڭ ايرىقشا قامقورلىعىندا.
2012-جىلى دىنمۇحامەد احمەت ۇلى قونايەۆتىڭ 100 جىلدىعىنا ارنالعان ەسكەرتكىش مونەتالار قولدانىسقا بەرىلدى. ول 500 تەڭگە نومينالىنداعى كۇمىستەن جانە نومينالى 50 تەڭگە نەيزيلبەر قۇيىندىسىنان جاسالدى.
2013-جىلى عۇلاما بي، اسكەري قولباسشى، اقىن-جىراۋ جيەمبەت باتىر جايىندا «جيەمبەت باتىر» رومان- ەسسەسى جارىق كوردى. كىتاپتى دايىنداۋ بارىسىندا رەسەيدىڭ ومبى، ورىنبور، بارناۋل، قالالارىنىڭ مۇراعاتتارىنان الىنعان قۇندى قۇجاتتار مەن دەرەكتەر پايدالانىلدى.
2013-جىلى استانالىق ونەرتاپقىش باقىتجان المەنوۆ اعىنسىز، ياعني، تۇيىق سۋ كوزىن پايدالانۋ ارقىلى ارزان ەلەكتر ەنەرگياسىن الۋدىڭ جولىن ويلاپ تاپقان. يننوۆاتسيالىق بۇل جوباعا پاتەنت الىنىپ حالىقارالىق ساراپتامادان دا وتكەن. 45 جىلدىق ەڭبەك ءوتىلى بار ەلەكتر مامانى - جەنيەۆا پاتەنت بيۋروسىنىڭ پاتەنت يەگەرى.
2015-جىلى Sport Review جۋرنالىنىڭ نۇسقاسى بويىنشا سوچي وليمپياداسىنىڭ قولا مەدال يەگەرى دەنيس تەن مەن زارينا دياس 2014-جىلعى قازاقستاننىڭ ۇزدىك سپورتشىلارى دەپ تانىلىپ، ولارعا ارنايى تاپسىرىسپەن باعالى مەتالدار جانە اعاشتىڭ قۇندى تۇرلەرىنەن «ۆوستوك-ت» شەبەرحاناسىندا جاسالعان مۇسىندەر تابىستالدى.
2016-جىلى تۇركيانىڭ مەرسين قالاسىنداعى مەملەكەتتىك وپەرا جانە بالەت تەاترىنىڭ ساحناسىندا «كەروعلى» وپەراسىنىڭ حالىقارالىق قويىلىمى بولىپ ءوتتى. ازەربايجان كومپوزيتورى جانە مۋزىكاتانۋشىسى ۋزەير گادجيبەكوۆتىڭ بۇل تۋىندىسى - تۇركى- يسلام شىعىسى ونەرىنىڭ الەمدەگى ءبىرىنشى وپەراسى. باس پارتيانى «استانا وپەرا» تەاترىنىڭ جەتەكشى سوليسى جۇپار عادبۋلينا مەن قىرعىزستاننىڭ ەڭبەك سىڭىرگەن ءارتىسى، ا. مالدىبايەۆ اتىنداعى قىرعىز ۇلتتىق تەاترىنىڭ سوليسى سادىربەك جۇماشيەۆ ورىندادى.
2018-جىلى قازاقستاننىڭ سوت جۇيەسىنە كىرمەيتىن تاۋەلسىز ورگان - «استانا» حالىقارالىق قارجى ورتالىعىنىڭ سوتى (ا ح ق و) (AIFC Court) ءوز قىزمەتىن باستادى. بۇل قارجى ورتالىعى تاۋەلسىز قارجىلىق سوت پەن اعىلشىن قۇقىعى قاعيداتتارىنا جانە جەڭىلدەتىلگەن سالىق رەجيمىنە سايكەس قۇرىلعان. پرەزيدەنت تاپسىرماسىنا ساي، كەلەشەكتە حالىقارالىق جانە ايماقتىق بيزنەس حابقا اينالادى. زاماناۋي ينفراقۇرىلىم مەن وزىق تەحنولوگيالاردى پايدالانۋدى كوزدەيتىن قارجى ورتالىعى «ەكسپو-2017» اۋماعىندا ورنالاسقان.