كەزەكتەن تىس پرەزيدەنتتىك سايلاۋ 9 - ماۋسىمدا وتەدى - قاسىم- جومارت توقايەۆ
13:09, 09 - ءساۋىر 2019
نۇر- سۇلتان. قازاقپارات - اعىمداعى جىلدىڭ 9 - ماۋسىمىندا ەلىمىزدە كەزەكتەن تىس پرەزيدەنتتىك سايلاۋ وتەدى. بۇل تۋرالى بۇگىن رەسپۋبليكالىق تەلەارنالاردان قازاقستان حالقىنا ۇندەۋ جاريالاعان مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«بۇگىن ەلىمىزگە جانە ءارقايسىمىزعا قاتىستى اسا ماڭىزدى ۇندەۋ جاريالاعالى وتىرمىن. ەلىمىزدىڭ كونستيتۋتسياسىنا سايكەس ق ر پرەزيدەنتىنىڭ كەزەكتەن تىس سايلاۋىن 2019 -جىلدىڭ 9 - ماۋسىمدا وتكىزۋ تۋرالى شەشىم قابىلدادىم. مەن بۇل جاۋاپتى شەشىم بويىنشا ەلباسىمىز نۇرسۇلتان ءابىش ۇلى نازاربايەۆپەن اقىلداستىم. پارلامەنتتىڭ قوس پالاتاسىنىڭ سپيكەرىمەن، پرەمەر- مينيسترمەن كەڭەستىم. كونستيتۋتسيالىق كەڭەستىڭ كەلىسىمىنە جۇگىندىم. پارلامەنتتەگى پارتيا جەتەكشىلەرىمەن كەزدەستىم. كەزەكتەن تىس سايلاۋ تۋرالى شەشىم قابىلداۋ وتە ماڭىزدى ءارى قاجەتتى قادام»، - دەدى ق. توقايەۆ.
اۆتور: مارلان جيەمباي