قازاقستاندا بىلتىر تەرروريزمدى ناسيحاتتايتىن 9 مىڭعا جۋىق سايت جابىلدى
بۇل تۋرالى ق ر اقپارات جانە كوممۋنيكاتسيالار مينيسترلىگىنىڭ كەڭەيتىلگەن القا ماجىلىسىندە ق ر اقپارات جانە كوممۋنيكاتسيالار ءمينيسترى داۋرەن ابايەۆ ءمالىم ەتتى، دەپ حابارلايدى «قازاقپارات» ح ا ا ءتىلشىسى.
القا ماجىلىسىندە ءسوز سويلەگەن مينيستر 2017 -جىلدىڭ 28 - جەلتوقسانىندا پرەزيدەنتتىڭ اقپارات جانە كوممۋنيكاتسيالار جونىندەگى زاڭ جوباسىنا قول قويعانىن اتاپ ءوتتى.
«بۇل زاڭ ءبىزدىڭ ازاماتتاردىڭ قۇقىعىن قورعاۋدىڭ مەحانيزمدەرىن كۇشەيتەدى. ب ا ق سالاسىنا، بايلانىس وپەراتورلارىنىڭ جۇمىسىنا قاتىستى تالاپتاردى وڭتايلاندىرادى»، - دەيدى مينيستر.
داۋرەن ابايەۆتىڭ ايتۋىنشا مينيسترلىك اقپاراتتىق كەڭىستىكتە ءتيىستى زاڭنىڭ ساقتالۋىن قامتاماسىز ەتۋ بويىنشا جۇمىستى جالعاستىرماق.
«وتكەن جىلى تەرروريزم مەن ءدىني ەكسترەميزمدى، سۋيتسيد، زورلىق- زومبىلىقتى ناسيحاتتايتىن 9 مىڭعا جۋىق سايتتىڭ جۇمىسى توقتاتىلدى. الەۋمەتتىك جەلىلەردە وسى سارىنداعى 230 مىڭ ماتەريال جويىلدى»، - دەدى مينيستر.
اۆتور: ايان بەكەن ۇلى