اقمولا مەن كانادا اراسىندا ساۋدا اينالىمى 9 ميلليون دوللارعا جەتتى
بۇل تۋرالى اقمولا وبلىسى اكىمىنىڭ ورىنباسارى ەگور كاپپەل مەن قازاقستان رەسپۋبليكاسىنداعى كانادا ەلشىلىگىنىڭ حاتشىسى داررەن سميت كەزدەسۋىندە ايتىلدى، دەپ حابارلايدى قازاقپارات ءتىلشىسى.
كەزدەسۋدە ەكى جاقتى ىنتىماقتاستىق جانە ەكونوميكالىق بايلانىستاردى ودان ءارى دامىتۋ مۇمكىندىكتەرى قاراستىرىلدى. اقمولا وبلىسى مەن كانادا اراسىندا ىنتىماقتاستىق سوناۋ 2004-جىلدان باستاۋ الادى.
وتكەن جىلدىڭ قورىتىندىسى بويىنشا ەكى جاقتى ساۋدا اينالىمى 12 ميلليون دوللارىن قۇراعان. وسى ورايدا، تاۋار اينالىمى نەگىزىنەن، يمپورتتىق تاۋارلاردىڭ ۇلەسىنە تيەسىلى. ولاردىڭ ىشىندە اۋىل شارۋاشىلىعى تەحنيكالارى مەن قوسالقى بولشەكتەر، قۇرىلىس ماتەريالدارى بار. سونىڭ ىشىندە يمپورت ۇلەسى اعىمداعى جىلدىڭ سەگىز ايىندا 9 ميلليون دوللارعا جەتكەن.
كەزدەسۋ بارىسىندا ەكى ەل اراسىنداعى اگروونەركاسىپتىك سەكتور مەن ساۋدا-ەكونوميكالىق مۇمكىندىكتەر كەڭىنەن ءسوز بولدى. وبلىس اكىمىنىڭ ورىنباسارى ءوز سوزىندە وڭىرىمىزدە اگرارلى سالا جوعارى قارقىنمەن دامىپ كەلە جاتقانىن اتاپ ءوتتى.
«ەلىمىزدە وندىرىلەتىن استىقتىڭ تورتتەن ءبىرى ءبىزدىڭ وبلىستا الىنادى. مال شارۋاشىلىعىن دامىتۋ، ەت، ءسۇت ونىمدەرىن دايىنداۋ مەن ەكسپورتتاۋ بويىنشا دا ۇلكەن مىندەتتەر جۇكتەلىپ وتىر. اسىرەسە، استانا قالاسىنىڭ اينالاسىندا ازىق-تۇلىك بەلدەۋىن جاساۋ باعىتىندا ءبىراز جۇمىستار اتقارىلىپ جاتىر. سونىمەن قاتار، وڭىردە ونەركاسىپ سالاسى دا جاقسى دامىپ كەلەدى. سوڭعى جىلدارى وبلىسىمىزعا كانادادان اۋىل شارۋاشىلىعى تەحنيكاسى مەن ءىرى قارا مال كوپتەپ جەتكىزىلدى. مۇنى ەكى جاقتىڭ ساۋدا- ساتتىق سالاسىنداعى جەتىستىكتەرى دەپ بىلەمىز»، دەدى ەگور كاپپەل ءوز سوزىندە.
سونداي-اق، كانادالىق مەيمان ءوز سوزىندە اقمولا وڭىرىنە كەلگەنىنە وتە قۋانىشتى ەكەنىن ايتا كەلىپ، جۇمىس ساپارىنىڭ ماقساتىنا توقتالدى.
«كانادا قازاقستاننىڭ اۋىل شارۋاشىلىعى سالاسىنداعى باستى ءبىر ارىپتەسى بولىپ تابىلادى. وسى وڭىردە دە ءبىرقاتار كانادالىق كومپانيالاردىڭ وكىلدەرى بار. ولار ەكى جاقتى ساۋدا-ساتتىقتى دامىتا تۇسۋدە. ءبىزدىڭ جۇمىس ساپارىمىزدىڭ ماقساتى دا وسى ىنتىماقتاستىق جانە ەكونوميكالىق بايلانىستى ودان ءارى نىعايتۋ»، دەدى بۇل ورايدا، داررەن سميت ءوز سوزىندە.
كەزدەسۋدى قورىتىندىلاعان ە. كاپپەل الداعى ۋاقىتتا ەكى ەل اراسىنداعى قارىم-قاتىناس تاپ وسىلاي وربيتىنىنە سەنىم ءبىلدىردى.