پاۆلودارلىق 9 جاسار قازاق قىزى مەنتالدى اريفمەتيكادان دۋبايدا وتەتىن حالىقارالىق وليمپياداعا قاتىسادى
توعىز جاسار ءدىلناز قازبايدىڭ بۇعان دەيىن باعىندىرعان بەلەستەرى از ەمەس. ول - ويشا ەسەپ شىعارۋدىڭ جۇيرىگى. كوپ تاڭبالى سانداردى كوبەيتۋ جانە ءبولۋدى ەسەپتەۋ قۇرىلعىسىن قولدانباي-اق شىعارا بەرەتىن وقۋشى قازىرگى تاڭدا UCMAS Kazakhstan حالىقارالىق مەنتالدى اريفمەتيكا اكادەمياسىنىڭ پاۆلودارداعى فيلالىندا قوسىمشا ءبىلىم الادى.
ءدىلناز اعىمداعى جىلدىڭ مامىر ايىندا استانا قالاسىندا وتكەن مەنتالدى اريفمەتيكا وليمپياداسىنىڭ رەسپۋبليكالىق كەزەڭىندە 1000 عا تارتا قاتىسۋشىنىڭ ىشىنەن ەكىنشى ورىنعا يە بولعان. سول جارىستا ول قاراشا ايىنىڭ 11 ءى كۇنى بىرىككەن اراب امىرلىكتەرىنىڭ دۋباي قالاسىندا وتەتىن XXI حالىقارالىق وليمپياداعا جولداما جەڭىپ العان.
- دۋبايعا الەمنىڭ 22 ەلىنەن 7 مىڭعا تارتا بالا بارادى. قازاقستاننىڭ بارلىق وبلىستارىنان 60 تاي وقۋشى جولداما الدى. پاۆلوداردىڭ نامىسىن جالعىز ءدىلناز قازباي عانا قورعاماق. ول ءبىزدىڭ ورتالىققا بىلتىردان بەرى كەلىپ ءجۇر. شەتەلدەن جاقسى ناتيجەمەن ورالارىنا سەنىمدىمىز، - دەيدى UCMAS Kazakhstan حالىقارالىق مەنتالدى اريفمەتيكا اكادەمياسىنىڭ پاۆلودارداعى فيلالى ديرەكتورىنىڭ ورىنباسارى ايزادا قاسىموۆا.
ايتا كەتەرلىگى، مەنتالدى اريفمەتيكا اكادەمياسى 4-12 جاس ارالىعىنداعى ەرەكشە دارىندى بالالاردى قابىلداپ، ويشا ەسەپ شىعارۋ قابىلەتىن ودان ارى دامىتادى. بىلتىر نيۋ دەلي قالاسىندا وتكىزىلگەن XX بۇكىل الەمدىك جارىستا 52 مەملەكەتتىڭ اراسىنان قازاقستان بۇلدىرىشىندەرى 5 التىن جانە 11 كۇمىس مەدالمەن ورالعان.