الەۋمەتتىك قامسىزداندىرۋ مەن دەنساۋلىق ساقتاۋ سالاسىنا 9 تريلليون تەڭگە قاراجات قاراستىرىلعان
بۇل تۋرالى ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ سەلەكتورلىق رەجىمدەگى القا وتىرىسىندا وسى ۆەدومستۆونىڭ باسشىسى تامارا دۇيسەنوۆا ءمالىم ەتتى.
«مەملەكەت باسشىسى بەرگەن العاشقى تاپسىرمالاردىڭ ءبىرى بارلىق الەۋمەتتىك مىندەتتەردىڭ تولىق كولەمدە ورىندالۋىن قامتاماسىز ەتۋ. 2015-2017 - جىلدارعا ارنالعان رەسپۋبليكالىق بيۋدجەتتە الەۋمەتتىك قامسىزداندىرۋ مەن دەنساۋلىق ساقتاۋ سالاسىنا 9 تريلليون تەڭگە قاراجات قاراستىرىلعان. ونىڭ ىشىندە 2015 - جىلعا - 2,5 تريلليون تەڭگە بولىنەدى. وسى سومانىڭ 693 ميلليارد تەڭگەسى دەنساۋلىق ساقتاۋ سالاسىنا، 1,8 تريلليون تەڭگە زەينەتاقى مەن جاردەماقىلاردى تولەۋگە باعىتتالادى»، - دەدى ول.
وتىرىس بارىسىندا مەملەكەت باسشىسىنىڭ 2014 - جىلعى 11- قاراشاداعى «نۇرلى جول - بولاشاققا باستار جول» قازاقستان حالقىنا ارناعان جولداۋىنان تۋىندايتىن دەنساۋلىق ساقتاۋ جانە الەۋمەتتىك دامۋ سالاسىنداعى باستى مىندەتتەر تالقىلاندى. جيىنعا مەملەكەتتىك ينسپەكتور ب. قاراسايەۆ، وبلىستاردىڭ، استانا مەن الماتى قالالارىنىڭ دەنساۋلىق ساقتاۋ باسقارمالارىنىڭ، جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ ورگاندارىنىڭ، كوميتەتتەر دەپارتامەنتتەرىنىڭ جانە مەكەمەگە قاراستى ۇيىمداردىڭ جەتەكشىلەرى قاتىستى.
اۆتور: رۋسلان عابباسوۆ